我要係20歲之前，將女神變做女朋友: 第二十三節:心結

果個人就係小櫻，無論我有咩唔開心佢都會第一個出嚟安慰我支持我。

仲記得第一次我因為Katarina而唔開心，小櫻係第一個比到意見我嘅人，佢無厭過我煩亦都好樂意聽我講。

唔知由幾時開始佢已經成日留意住我嘅一舉一動，甚至知道平時我唔知自己做左嘅野。

我有乜唔開心有乜煩惱佢都可以睇得出同估到我煩緊咩，就算我唔講出嚟佢都會主動開解我。

小櫻從來都無叫過我放棄，反而一直比希望我鼓勵我，比我知道自己係有可能有機會去成為佢嘅果個人。





老實講我由識小櫻嘅第一刻就無當過佢係朋友，而係當佢係我第二個阿媽。

因為佢成日都哦我，話我果樣唔岩果樣唔好，有時我覺得佢煩過我阿媽~

佢令到我知道我嘅世界唔單止Katarina一個，仲有好多人係身邊支持我，我諗佢咁講係因為佢知道我投放左好多野係Katarina身上。

我覆述返Jaffy同我講嘅野比佢聽，佢好認真咁同我講左句:

"你問心果句，你自己點諗你最清楚，你真係想試都未試就放棄?"





依句說話就係我堅持到依家嘅原因。

就好似我同Katarina之間嘅友情一樣由無野講變到無話不談，我相信總會有一日佢會對我改觀。

但係依一次我真係想放手放低所有野，我覺得就算我做左啲咩野唔會變就係唔會變，我幾努力去改變都係徒勞無功。

我諗小櫻留意到我同Katarina之間少左交流佢就主動約左我食lunch問我:

"喂你同Katarina做咩呀?"





"無野呀我地有啲咩?"

"你唔同我真話我嬲架!!!!"

我靜左落嚟乜都無講，而小櫻就望實我，我頂唔順佢嘅氣場同佢講哂所有野:

"就係我之前同你講話送佢返學果個男仔?"

我點點頭，佢再講落去:

"你肯定左果男仔係佢男朋友?"

今次我擰擰頭，而小櫻就翹埋雙手講:

"冬仔呀你唔好成日都為左啲未肯定嘅野而亂諗野啦，我上次都同你講過!!"





"我明，但係今次唔同，我唔識去表達自己依家諗緊咩，依個亦都係我唔想同妳講嘅原因......."

其實我好需要時間去比自己靜下，我放低飯錢就準備起身走，小櫻見到我想走就講左句

"你咪問過我點解咁留意你嘅，我依家答你，因為我覺得你份人好特別，同你傾過幾次計我就知道你唔鐘意同人分享自己嘅事，就算有唔開心嘅野都收係個心。
而我就係知道你係咁嘅人先會聽你講同主動關心你，因為我想你知道你身邊係有人可以聽你傾訴，我都唔長氣啦，你想走就走啦!"

小櫻講嘅依番說話我的確聽到有啲眼濕濕，佢了解我嘅程度多過我自己本身，我細細聲講左句多謝妳就走左。

我返到課室汁哂啲野入書包就走人，我嘅出席率仲好夠所以走幾堂都無所謂，落到樓下我最唔想見到嘅人出現左係我面前:

"你走啦?唔上下晝堂?"

我聽得出Katarina有啲擔心咁問我:





"嗯......"

我隨便答完佢繼續行，我行左幾步佢再係後面追問我:

"阿冬你係唔係有咩唔開心?"

我無答佢亦都無停低........