我要係20歲之前，將女神變做女朋友: 第二十節:新願望

今日朝早嘅堂除左分組活動之外都過得平平無奇，我有我玩手機，Katarina有佢嘅訓覺，我發現佢每星期總會有一日會無精神，甚至兩日都係咁。

雖然個老師教啲野幾有趣，但係佢講野實在係太悶啦，連我玩玩下手機都頭唔順都要恰一陣。

當我起返身嘅時候已經係落堂前五至十分鐘左右，我望下周圍啲同學差唔多有成半班都訓著左，其餘半班就自己做自己野，得幾個同學係認真聽緊老師講書。

我諗住望下小櫻做緊咩先發現佢個人消失左，我無擺係心到覺得佢只係去左廁所，我醒左之後就keep住玩手機直到落堂。

當老師話落堂嘅時候其他人都即刻醒哂，仲有幾個即刻衝左出門口應該係肚餓~





等老師出左門口之後小櫻竟然攞住盒蛋糕入嚟。

"生日快樂啦阿冬!!!"

係喎!!!!我連自己生日都唔記得左添.......

"喂生日快樂呀阿冬~"

小櫻將蛋糕擺左係我面前，Jaffy亦都幫手將蠟燭插係蛋糕上面，其餘兩個組員都圍埋過嚟，阿山就應該一早知情所以準備左膠碗同餐具。





而Katarina亦都係我隔離望住我，可能佢岩岩訓醒仲迷迷糊糊，但佢都同我講左句生日快樂~

"happy birthday to you~"

小櫻帶頭開始唱生日歌比我聽，其他人亦都跟住唱，我咁大個仔除左屋企人同阿琦阿聰之外佢地係第三批人幫我慶祝生日。

佢地唱生日歌嘅時候我除左覺得尷尬之外，仲有一刻我係想喊出嚟，因為我地只係識左幾個月，但佢地已經連我嘅生日都記得。

"快啲許個願先啦!"





小櫻催我快啲許個願，我個腦依家仲係好空，因為所有野都發生得太過突然，我仲未接受到~

我瞇埋眼在腦海許左個願望，再吹熄哂啲蠟燭，小櫻拍完手之後問我:

"冬仔你許左個咩願呢?~"

"我緊係唔同妳講啦，講左出嚟就唔靈架啦!!!"

我切左一下個蛋糕之後就交左比Jaffy，佢好快手咁將個蛋糕分到每個人都有一舊。

佢切完之後就同Katarina一齊出去話買pizza返嚟，而小櫻又再襯依個機會問我:

"喂妳個生日願望係唔係關於一個人架~"

我用一個微笑嚟回應佢，佢反左個白眼，之後我再同佢講:





"多謝妳啦，我連自己生日都唔記得左，妳地竟然會記得。"

"好少野啫，到我生日你同我慶祝返就夠啦~"

依個下晝我點都唔會唔記得，我人生中第一次意想不到嘅生日慶祝，加上我身邊有佢。

下晝堂我同Katarina照舊傾下動漫玩下手機game，唔經唔覺就到放學。

臨放學之前佢問左我一句:

"喂阿冬你頭先許左個咩願呢?"

"唔話妳知喎，妳估下囉~"





"我估呀?.......我估係關於女仔嘅!~"

我無出到聲，而佢見我無出聲就順住個勢講:

"睇你個樣就知啦，我都話過你唔識講大話架啦!~"

我都係無答佢，佢講完就走左出去放書入locker，而我乘機揹書包走人，廢事佢再問落去。

今日我踏入左20歲，而我19歲許嘅願始終無實現到，但我今日已經有個新嘅願望..........