為左一千蚊，成班港豬幫建制做PTGF: 2.3

佢既轉變，令我難以置信。到底佢要經歷過咩事先會有咁大既改變?

定還是佢由一開始已經係投機主義者，只係我地既觀察力太差，又或佢既掩飾力太好。

呢個永遠都係一個謎，因為建制派既人從來唔會同你講真話，只會帶你遊花園。

唯有利益，先至係真心。

「阿樂，以前既我仲後生，根本唔明白何謂政治，何謂民主，當我慢慢成長，我先真正明白特區政府既苦心，國家對一國兩制既重視，我希望有生之年可以減少社會撕裂，令社會明白祖國既強大。」





陳永信冇眨眼，佢已經練成講大話唔眨眼既技倆。

一招年少無知，接著係祖國偉大，先破後立，黎個釜底抽薪，將過去既自己打得體無完膚，睇怕佢應該都係師承三姓家奴。

「嗯。」係呢一刻，我真係唔知比咩反應佢。

「阿樂，我相信你都明白政府既苦心。好多謝你今日黎支持修例。」陳永信拍拍我既膊頭。

佢係大學時期經常咁樣拍我膊頭，但呢一刻就連呢個動作都令我好陌生而且感到心寒。