[sheshe] [校園] [驚嚇/奇情] 《被女神溝到手之後，我先發現自己瀨咗野》: 第二章
九月一日早上八時許，學校。
上課鐘聲早已響過，領袖生在校門口替遲到學生擇名。一個飛快的身影完全無視領袖生，直接閃過人群跑入學校。領袖生掉轉頭一望，悻悻然只當無事發生。
「嗰個一定就係好出名嘅鍾旋學姐啦。算啦，做細嘅唔好惹高form。」領袖生暗道。
另一邊廂，鍾旋正以九秒九的速度直奔上五樓的課室，始終開學第一天就遲到，實在太瘀。
她跑到5B課室門口，才真正明白到：上學真的會職業性失聰。
只見全班在老師失蹤的情況下，完美地把鳩叫和高八度笑聲融冶為高分貝噪音。
太不尋常了，不可能第一天便high成這樣子。鍾旋滿心疑惑地走到課室後方坐下。她還未丟下書包，就被人猛力拍着手臂叫喚。
鍾旋回頭一望，不禁直呼：「原來你就喺度！」
一個無比熟悉的微笑浮現在前方可愛的臉蛋上，教鍾旋心頭一陣溫暖：「馮懿欣！！！」
「鍾旋！！！頂你呀咁遲，仲以為你開學都唔返！！！」
「我呢啲模範學生嚟嘅，點會啫。」鍾旋用手指在桌上打圈：「而且，都唔捨得唔返嚟見你啦。」
「屌，講呢啲。」馮懿欣語氣聽似毫不上心，但她卻立即把通紅的面孔別過去，不讓鍾旋看見。
鍾旋笑笑，心想大概只有對着這種老友，才可以如此開玩笑吧。
胡鬧過後開始上堂，鍾旋亦順理成章地開始補眠；但一到小息，全班竟然又一次失控，勁嘈。
鍾旋眼看全班吵成一團，忍不住大吼：「好啦喎，嘈嘈嘈又唔話比人知咩事，想點先？」她這個出了名的運動健將是個萬人迷，不過遲了幾分鐘回校已經和其他人出現代溝，對她而言不免太差。
「嗱，旋爺今次呢，就走寶啦。」全班公認最識食的咸濕仔露出淫邪的笑容，鍾旋不禁莫名其妙地抓抓頭，心中盡是黑人問號。
「佢想講我地班有插班生。」鍾旋的兄弟費道弘開口，用他一貫的零起伏聲線說。
「咦，睇嚟今鋪真係柒咗，咁都睇唔到。喂不過呢，個女仔係咪真係正先？？」
「質素唔差。」
如果，鍾旋能夠看得出費道弘表情那個極微妙的變化，故事的結局可能就截然不同了。