[高中][少甜]《如陽光伴我》: 負二，在地平線上也有我為你打氣（中）
「講起M2堂…唔經唔覺你都就快離開左香港兩年。」
「時間真係過得好快。」
「我唔再係當日嗰個陽光補習學會既主席，唔再係中學生，唔再係足球隊成員，同阿邦阿傑都唔再係日日見面。有時諗返起，真係覺得所有事都好唔真實。最意想唔到係我居然會向你示愛，而你竟然會接受。」
「我其實…一路都對你有好感。不過你真係蠢過隻豬嫁！」
「如果我可以早啲同你講就好…好多傷心既事都唔會發生，分分鐘你可以連英國都可以唔去。」
「吾…」心如搖搖頭，「你有無聽過決定論？」
「無啊。」
「呢個世界根本就無如果。我同你會坐喺到傾計，係因為之前發生既所有事。例如我地喺陽光補習社既經歷、喺K房發生既事，是但一樣無發生既話，可能而家你拖住既就係第二個女仔。」
「點會呢？」
「真嫁。所有既事情之所以會發生都係基於我地既性格，好似邦會提出搞補習學會係因為佢想識女仔，咁樣我同你先會有更多既見面機會。同樣道理，受制於我同你既性格限制下，無論點你都唔會喺高中既時候就同我示愛，而你既性格呢，就係基於再之前發生既事而形成，一直循環。所以就算再經歷一百次重來，都改變唔到呢件事。要發生既事，無論點都會發生，記住啊。」
「吾…」我皺起眉想了想，然後笑著說，「我諗我明啊，你既意思係，我同你既相愛係命中注定，所以就算可以時光倒流一萬次都好，我都係會同你喺埋一齊一萬次。」
「嗯…都可以咁理解。」她也笑了起來。
我吃了幾粒葡萄，又把一片橙放進心如的口內，她小心地從結他袋中拿出結他。
「琳知道左我同你一齊既時候呢，好開心啊。個傻妹話佢係我地紅娘喎！我好想可以請佢食飯，不過…可能無機會啦，你可唔可以幫我請？」
「真係要請佢食飯，一次又一次鬧醒我…不過點會無機會請啊你！如果你唔返香港既話，我都唔返，所以...幫唔到你啦。」
「佢仲俾左條片我睇，係有個傻仔喺歌唱比賽自彈自唱…」她禁不住大笑了起來。
「喂啊…搞錯啊。」竟然把這件事說出來，有機會一定要打死琳。說笑而已，能和心如走到這一步，我感謝她都來不及。
「咩喎，你唔係本來就想唱俾我聽嫁咩！」
「邊有喎。」
「快啲啦！快啲啦！我而家想聽啊...」她把結他遞給我。
「嗯…咳。」
我清一清喉嚨，努力想起到底應該怎樣彈這首惟一我學過的歌，「啊...唔得啊，首歌咁Sad，我地而家好開心喎！」
「咁你改下啲歌詞啦，又唔係第一次…」她沒有停過笑，我從來沒有看過她這樣開懷。
「又笑我…咳嗯…」我想了一回兒，嘗試唱了起來。
「♫和你每天早晚要相擁
忘了你的體重
再抱再入夢♫」
「♫從前為了不想失約
連病都不敢痛 到這一天 才會想起♫ …你蠢啊」
我停下來飲了一口蘋果汁。
「點解係我蠢喎！」心如問。
「因為你係，無得解。」
「快啲唱埋落去啦。」
「諗唔到啦…原歌詞太傷感，我又無林夕一成既才華。」
「點會無！不過唱第二首都得，你要同我一齊唱嫁…」她想了想，從我的手上拿起結他。
這是我第一次聽她自彈自唱。
「♪人無法走過每天 為求沒有帶著遺憾活到終點 就是你 讓感覺從此不再簡單 平凡♪」
「♪到處也是彩色 只因歲月印有你我的足跡 情從未變 歷練了多少變遷♪」
「♪還記得 當初的手臂 滿載了浪漫與歡喜 好比櫻花盛開日期 我會替你統統儲起♪」
我伴著節奏輕搖著身，心如指著我示意，讓我繼續唱下去。
「♫願你沒有牽掛遠飛 在地平線上也有我為你打氣♫」
「♫去吧 我會永遠珍惜你 直到下世紀♫」
「♫人無法走過每天♫」
「♪每天～♪」心如和唱著。
「♫為求沒有帶著遺憾活到終點
就是你 讓感覺從此不再簡單 平凡♫」
「♫到處也是彩色♫」
「♪彩色～♪」
「♫只因歲月印有你我的足跡
情從未變 歷練了多少變遷♫」
「♫還記得 當初的手臂 滿載了浪漫與歡喜
好比櫻花盛開日期♫」
「♫我會替你統統儲起♫」
「♪你要為我統統儲起♪」
「♫願你沒有牽掛遠飛♫」
「♪願我沒有牽掛遠飛♪」
「♫在地平線上也有我為你打氣♫」
「♪在地平線上也有你為我打氣♪」
「♫去吧 我會永遠珍惜你♫」
「♪去吧 你要永遠珍惜我♪」
直到下世紀。
如輕快彈著結他笑著，將半個身倚在我的懷內。
「多謝你，傻仔。」她說。
「有咩要多謝喎。」
「你完成左我既夢想。」
「仲差左煮野食俾我地食既邦傑仲有阿琳阿雯，如果你想既可以叫埋阿俊都得。」
「等佢地要等到幾時喎。」
「好快嫁啦，等到琳同埋雯仲有你入埋u，我會叫埋佢地過嚟一齊玩。一定會好開心，當然啦，大部分時間我地都要二人世界嫁，我諗佢地唔會做電燈膽既。啊，可以叫阿傑帶埋女朋友，咁樣就有四pair情侶，大家都搵到自己最愛既人，實在係太開心啦…」
「多謝你…」
「你所有既夢想我都會幫你實現。」
「仲有一個願望喳。」她笑著說。
「咁係咩呢？」
「聽日至話比你知。」
「成日懶神祕！」我說，「心如，我一直想問你一個問題…到底你係幾時開始對我有好感嫁？」
「嘿，唔話你知。」
「咩都唔講！」
夕陽很快就要下山了。在不知不覺間，事情都過得這樣快，這樣此料不及。
日落後她帶了我去一間中餐廳，硬要請我吃了飯，說是答謝我去倫敦找失蹤的她。她問了我意見後，叫了一整枱的餸菜，塞了一大堆食物給我，生怕我在德國沒有中餐吃住不慣。
「你做咩唔食呢兩碟既？」我問。
「吾...我唔食豆豉同埋蕃茄。」她說。
「傻妹你做咩唔講啊！唉我又係，做人男朋友連基本野都唔知，從今以後啊，你要同我講曬你食咩唔食咩，想要咩唔想要咩，我會就曬你。」
「你食得夠、食得開心未得囉，我真係無所謂嫁，本身都食唔多野嫁啦。」她溫柔的說。
「辛苦曬你啦...又要你請我食飯、又要Plan曬行程，仲要就埋我既。正宗又食又拎。」
「拎左咩？」她笑著說。
「快樂。」
「咁呢樣我都有拎走。」
「下次旅行Plan行程、請食飯要交返俾我做啊，知唔知？」我說。
如好像有點猶豫的想了想，望著我輕輕點頭。
「喂。」她說。
「嗯，做咩啊？」
「點解你琴晚個人縮到咁開啊？」
「我驚你唔鐘意…」我說。
「我想你攬住我訓。」她臉紅地說。
「嗯，其實我都想...」
回到酒店後，我先等她沖完涼才進去洗手間，出來的時候她已經處於沉睡的狀態，連頭髮還沒有完全吹乾。看到她累壞這個樣子，當然不可能為了吹頭而叫醒她。
雖然睡著了，但心如亦一直保持甜笑著。我不知道她這刻在發甚麼夢，但我肯定能讓她這麼快樂的人就是我。我靠向她的身體，攬著她的腰睡。她偶爾會轉動身子，呼吸稍為急促，但很快又會變會平靜，甜笑著。
那天晚上，她那可愛的樣子一直讓我無法忘懷，有一段很長的時間我覺得，也許在夢中，才是那個完全無憂的世界。我花了很長的時間才睡著，睡得很沉。