[高中][少甜]《如陽光伴我》: 三十七，「心願成就」（下）
到達河口湖之後，已經可以清楚看到富士山的蹤跡。天氣很完美，說不上很熱，但幾乎沒有雲層擋着，可以說是能很清楚地看到富士山山頂。
雖然是盛夏，山頂仍然結上一層雪。在地球上距離太陽愈近的地方居然是愈寒冷。
車站旅客服務中心的職員告訴我們，如果以纜車登上天上山公園的話，可以清楚看到在對面的富士山。又或者到河口湖的另一邊看，會看到不同的面貌。
晴對於兩個選項都沒有甚麼意見。不想再到海拔高的地方了，我坦白地說。
好吧，就去河口湖的另一面，詩晴隨和的附和我。
我們坐觀光巴士來到湖的對岸，隨便找了一個比較少遊客，但是仍能清楚看到富士山的地方下車。隔着湖泊看山景，整個富士山的倒影像複製品一樣貼在湖面。原來有些時候，「複製」和「貼上」這兩個指令可以締造出這麼賞心悅目的一幅畫。
「好靚。」晴說。沒有更加簡單直接但貼切的形容方法了。
「嗯。」
她拾起好幾塊石頭，逐塊逐塊把石頭掉進湖內。
「你做咩？」我問。
「想片石仔，點解唔得嘅...」她說。
「你咁樣拋落去緊係唔得啦。」我拾起幾塊片狀的石頭，然後從背後，用右手捉住情她右手，稍為彎身，以輕平的角度用柔力擲向水面，石頭在湖面上彈了三、四下才掉進湖底。
「你點識嫁？」
「以前係德國學。住嗰度附近係一條好長好長嘅河流，心情唔好就會去跑步，跑到攰，就會去近河面嘅地方玩石仔。好無聊，不過久而久之就識左。」
我沒有放開她的手，晴放鬆用背靠向我的胸膛。
「你好叻啊！」晴表揚我。
「唔叻。可以彈到三、四下，就算十下其實都係無咩意思，最終都只會卜一聲跌入湖底。剩返係湖面既除左係漣漪都係漣漪。」
「吾…咁係因為你掉錯野！如果你掉既係氣球、油仲有...水，咁佢地就會一路浮係湖面！」
「嘿，邊有人會掉咁既野落湖？」我笑著說。
「唔知啊，只要可以令你笑，我連自己都可以扔落個湖。」
「就算係晴…都會每日跌入湖底。」
「嗯嗯，但晴每日都會由湖底重新升上高空！」她說，「每－日－如－是！所以唔好諗住我會走啊！」
我摸摸她的頭。
過了一會兒，晴從背囊中拿出一個包裝袋送給我。
「我有啲嘢俾你啊！」
「我都有。」然後在自己的袋中拿出昨天為她祈的護身符，說：「幫你求㗎，學業一切順利。」
「嘻...多謝你。」她笑著收下，「乜咁啱嘅...」
「下？」
「你快啲拆開佢啦！」她著急。
我拆開包裝包，是一個黃色護符，寫着「心願成就」。
「琴日去咗吉祥寺參觀，順便買嫁。日文心願成就即係心想事成嘅意思，希望你想要咩都可以得到。就算你嘅心願唔係我都好...」
「點會唔係你呢？我嘅心願係你學業美滿，順利升到入大學。」我認真地對她說。
「咁願望唔止得一個㗎嘛！如果你，仍然都係好鍾意心如嘅話，我明嫁。」
「唔係，唔係咁。」我不知道怎樣解釋才對，「咁你嘅心願呢？」
「就係你可以對住個湖底大叫自己心入面嘅煩惱！」她說。
「啊...我嘗試下。」我想了想。
「啊！！！我喺湖底啊！！！有無人嚟救我啊！！！！」我向著河口湖大叫，然後湖的對岸又傳來輕輕的回音。
「乖！講完有無舒服啲啊？」晴問。
「啊...好似有...少少？」
「有少少就好啦，我會幫你繼續叫嫁。」她趣怪的笑著，
「點幫？」我問。
「『啊！！！我喺湖底啊！！！有無人嚟救我啊！！！！』」她接著電話上的播放鍵。
「喂！快啲del咗佢！」我哭笑不得。
「唔得呀！唔得呀！喺我救翻你上水之前，呢段錄音都要係我嘅電話鈴聲，每當有人打俾我、又或者鬧鐘響起嘅時候我就會聽到你把聲，咁樣我每日一起身、每次聽完電話，我就會諗返起我而家最大嘅任務就係將你喺湖既深處打撈，直到我救翻你之前，我都唔會轉鈴聲！」
「點解你要對我咁好？」
「我覺得係命中注定嘅事。我係你專屬既『陽光救生員』，呢段日子我係為左『拯救』而活著，之後就算要我離開都可以。」
「多謝你...」
「大哥哥你放心啦，好快我就會許埋最後一個願望，考埋文憑試，再救返你上水面。跟住你同我就冇拖冇欠，唔會再煩住你㗎啦！」她說著。
「唔係。唔係咁。我從來都冇咁樣諗過...一秒都冇覺得你煩。只係有時，我唔識點樣表達自己嘅感受。」
「豪，你啲朋友叫你阿豪係咪啊...」
她抱緊我，雙手纏著放在我腰後。
「我明㗎。我真係明，所以你唔使講。雖然識你時間唔係好長...可能你會覺得我好傻好奇怪，不過我真係好喜歡你。從來都冇試過咁喜歡一個人。」
我輕掃著她的背。
「如果你要離開我，或者有一日唔再應我WhatsApp，唔再睇我send比你既Snap，我一定會喊到抽筋。」她說，「不過只要你開心嘅話，我好快就會冇事。」
「真嫁。唔好因為唔捨得我喊，所以先勉強同我講嘢。我好堅強架！」她說。
「睇吓我，我冇喊嫁！」我看著她晶瑩剔透的雙眼，看得出她的決心和堅定。
陽光緩緩在西邊落幕，夕陽從藍色的湖面沉下去，湖水把光吞噬。晚霞的餘暉在夜空中飄蕩著，晴倚在我的肩膀。心中有無限句說話想說出口，卻找不到任何能表達的用語。
回程的時候，晴一直也沒有作聲，我也沒有找到合適打破沉寂的缺口。晴已經將所有想告訴我的話說出來，等待的只有是我的回覆。
我想起幾年前的事，開始分不清無法擺脫的是對心如的感覺，還是那一整段往事揮之不去的陰影。
我決定打破沉默，將有關心如的所有事告訴詩晴。