[高中][少甜]《如陽光伴我》: 二十一，存在和離開的意義（上）

到那霸市後，軒在國際通附近找了一間燒肉店，說要幫我好好洗塵。沖繩很傳統印象的日本很不同，說是日本地方，但一切的建築都有很濃厚的台灣、韓國甚至中國大陸的感覺，較好的說法是集百家之大成，難聽的也可以說是四不象。國際通是沖繩其中一條最熱鬧的街道，算得上是比較五光十色，但人流也不算多。感覺上，在沖繩旅遊觀光的人比居民還要多好幾倍。
 
「試下呢到啲沖繩麵，好好食。」軒告訴我。
「沖繩麵？呢度燒肉店喎...」我半信半疑。
「叫你試就試啦。」他還等不到我回應，就用他用流利的日文，向女侍應點了菜。
 
「你叫左咩？」
「問咩姐？一陣你咪知。」
「懶神秘。」
 


「你做咩無啦啦咁好過嚟搵我？」他喝了一口綠茶，問道。
「掛住你唔得咩。」
「你唔好玩啦，憂鬱小王子，有嘢唔開心咋話？」軒笑着說。
 
軒一直很理解我，他跟我讀一同在德國讀商業，我記得好像是他先主動找我聊天，聊著聊著，就成為了好朋友。一直以來好朋友這個概念也與我非常無緣，要數傑、邦，之後便是他了。他鄉遇故知啊今次真係，我記得他第一天認識我的時候就這樣說。
 
在德國的日子，很多時也是非常鬱悶，好像一直很努力去追趕一些東西，最後卻連半根的草皮也抓不住。除了偶爾用文字記錄下來，我從來不會怎樣說自己的煩惱，大概是害怕打開自己的心窗，會受到更大的傷害。
 
軒也從不會逼我說些甚麼，他只會坐在旁邊，跟我喝着悶酒，說無聊的話。倒是他很願意跟我說自己的夢想、困境，甚至愛情的難題，我當然也很樂意傾聽他的故事。比起我，他總是更加清楚自己的目標，更加容易從失敗中重新站起來。雖然他這個人社交能力很強，但意外地和我一樣，對商業社會的興趣不大，要不然以他的交際手腕和成績，要進大公司的MT根本輕而易舉。
 


「冇咩特別，純粹想行開下。」我說。
「知你啦，成日扮晒野咁，有嘢未又係想匿埋係哥哥到喊。」他打趣地說。
「...其實你係唔係基？」我印象中問過很多次。
 
「係啊，今晚你記得拉埋門訓。我係一仔。」
「…門有無得鎖？」我問。
「你話啦，大雄阿媽拉開大雄度門，有無拎鎖匙？」
「救命。」
 
「總之我哋不醉無歸啦！」女侍應正好放下一大瓶燒酒，然後替我們各倒了一杯。


「…我好擔心我屁股。」
「飲啦頂！」
「飲杯。」我說，然後把燒酒一飲而盡。
 
「你喺呢面咩環境？」我問。
「一句講晒，好境！你知我本身都有潛水牌嫁啦，喺呢邊淨係做香港人生意都夠做，發達就唔得㗎啦，不過夠食有突囉。最緊要係鍾意做就做，鍾意唔做就唔做，好似你話過嚟，我即刻放自己一星期假都仲得。」
 
老實說，這種彈性上班時間，跟我平常的工作也十分類似。我們兩個的性格可算是截然不同，倒是都不若而同地喜歡自由。
 
「見你好似幾開心。」
「開心啊，不過日本妹唔係想像中咁正，靚嘅一半都去曬做明星。」
「另一半呢？」
 
「都係明星，不過唔同題材嘅電影。日本人好尊重佢地同三文魚。」他再飲一口燒酒說，「一開始日文唔叻都好辛苦，而且點都會有少少排華，不過日本人就算幾唔鐘意你，都同歐洲人唔同，永遠都四萬咁口。至少消費唔洗受氣俾人黑口黑面啦。總體來講，都係好舒服。我暫時俾呢到8分。」
「咁香港呢？」


 
「2分，同德國一樣分。」他說。
「其實你留喺香港都唔開心嫁啦，不如摺埋間補習中介，過嚟搵我啦，又或者喺呢度做都可以。兩兄弟拍住上，一人搵返一個新垣結衣。」
「唔啦。」
 
「你唔捨得香港咩？咁你當初又過去德國。」
「我去德國係有原因，你都知㗎。而家我冇咩原因要離開香港。」
「咁你又有咩原因要留喺香港呢？」他問。
 
在我腦海閃過的，是不見了的橙、還有好像很討厭我的晴，想真的是沒有任何理性的原因了。
 
「其實冇咩太大嘅原因。有時甚至覺得都無咩原因要留係世上，香港又好，德國又好，日本都好，有時我真係搵唔到任何原因而活。」
「仆街仔，唔准講呢啲野。」他拍我的頭，「你唔記得我地喺德國科隆大教堂最頂許下嘅盟約啦？」