《夢中的婚禮》: 00

在九龍塘某處，有一間純白色的房間，見室內設計應該是新娘房，果不其然，一對新人圍著房中圓桌正激烈地爭吵著。
 
「我已經樣樣都就晒你啦！你仲想點呀？」身穿一襲整齊黑色西裝配上灰色背心及煲呔的新郎正在咆哮著，他知道說了這些話就沒有回頭的餘地，但憤怒控制著他的大腦及嘴巴。
 
「就晒我？你乜野都唔想理，諗住撓埋雙手所有野都會自動搞掂晒？咁你同部電腦結婚得啦？」新娘也不甘示弱反擊，她憤怒地瞪著新郎，像是要把眼神化為利劍把他千刀萬剮。
 
此時，一把女聲命令道：「大家都冷靜啲先！咁樣嘈落去無結果架！依家出去行禮先，今晚再平心靜氣坐低慢慢傾好冇？」
 
「你收嗲啦！」新郎生氣得拍枱大罵：「如果唔係你，我地使搞成咁？」
 




「心平氣和，心平氣和。」另一男人見狀，立刻輕拍新郎後背，希望能減低他的怒氣。
 
「喂！你好啦喎！自己錯仲亂發脾氣！」新娘早已生氣得咬牙切齒，現在未婚夫還要連自己的伴娘也亂罵一通，誰還忍得下去？「唔結啦！」
 
新郎先是呆了，但為了面子，只有順勢而為，就是為了一啖氣。「唔好結囉！」
 
「喂！唔好亂咁講野啦！」男人像要按捺新郎怒氣似地用力拍了拍他的肩膊，並轉過頭對新娘說：「佢飲醉左先亂講野咋，阿嫂唔好嬲，嬲就唔靚啦！等陣行禮仲要影多啲靚相架嘛。」
 
伴娘欲言又止，瞄了瞄新娘，沒有再說話。
 




新娘一手拖住伴娘的手，一邊頭也不回地向大門前進，在開門前的一剎那，她的大腦內彷彿走馬燈般閃出與新郎相識、拍拖的甜蜜片段，但這些也是過去了。
 
「你記住你今日講過既野。」新娘冷冷地拋下這句說話。
 
大門關上了。