簡介
今日放學喺金鐘站轉車，無啦啦見到一個中國古裝嘅女性嘅口入邊流住血...
《今日放學後搭地鐵，冇啦啦見到.......》
| 作者 | 澄澄 |
|---|---|
| 類型 | 搞笑 |
| 狀態 | 已完結 |
| 更新日期 | 16-01-2022 14:36 |
| 文章字數 | 1797 |
| 點擊次數 | 1552 |
每日手記
十月三十一日(三) 天氣：陰風陣陣陣陣...
秋風起嘅一個傍晚，個天望落特别橙，「夕陽無限好，只是近黃昏」，我不禁吟咗一句古詩。不過頭先搭地鐵嗰陣時，發生嘅嘢真係畢生難忘！！！
我照住平時一樣，準時18:15離開駱克道公共圖書館-學生自修室，去灣仔地鐵站，搭18:25開出嘅地鐵去金鐘轉南港島綫喺海怡半島落車，返歸吔飯，每日例牌喺金鐘站2號月台嘅第八卡第一對門落車，行前去轉lift，搭下去L5層 再行落去L6層-南港島綫月台轉車，搭18:31由5號月台開出嘅班次，點解時間同位置咁著重，早又唔得，遲又唔得？因為我有嚴重强逼症，我試過為咗一個小數點，同老師嘈足10分鐘。 平時都係獨行俠(冇女嘛)，但今日有一個老死一齊行，佢就係天不怕、地不怕嘅Ben。
喺L5層行緊嗰陣時，見到一個著住中國古裝嘅女性在隔離行過，佢突然擰轉頭，佢塊面充滿血漬，啲血喺口仲流緊落件衫到。我嚇一嚇，企喺隔離嘅Ben問：
「你冇嘢吖嘛？」
我細細聲問佢：
「你見唔見到鬼呀？著中國古裝呢？塊面仲有血嘅？」
「黐線，你都戇居嘅！今日又唔係農歴七月十四，點會有鬼呀？仲有！個個著正常返工返學look，如果著古裝，咁吸睛一定見到啦！」 Ben 充滿自信咁笑我。
「你望多次啦，佢喺前面咋！」
我臉青口唇白咁同Ben講
「你問我十次又好，一百次都好，總之冇就冇。地鐵站入面又咁多燈，又多人，鬼影都冇隻啦！」
我哋行落月台，去到車尾等上車。塞凳ly *喺旁邊有陣陰風喺隔離吹過，我同Ben不約而同咁望過去。
「鬼呀呀呀！」
我哋驚到勁大聲嗌咗出嚟，月台周圍嘅人都望住我哋。
鬼女頂唔順出聲
「點睇我都係人啦！如果我係鬼，你兩隻嘢就唔喺度同我吹水啦，已經死鬼咗啦！同埋今日係十月三十一日，係Halloween、萬聖節呀，乜你哋唔知咩？」
我哋兩個由於頭先喺月台大嗌嘅關係，搞到唔少人望住我哋，加上鬼女呢一番説話，我哋呢一刻好想揾窿捐，覺得自己Seven到上天並衝出大氣層！
原來今日係Halloween，啲人去海獅公園，因為海獅公園有鬼屋玩，仲開到夜一夜添。點解我哋唔知？因為温書温到黐咗綫囉，最重要係...
冇錢呀！係窮呀，哈利！
最後祝大家萬聖節快樂，記得温書，考好UT，同埋撳個like表示支持
* 塞凳ly =Suddenly
-
本故事純屬虛構，如有雷同實屬不幸
IG：chingchingstory