《106與她的邂逅》: 第三集-司機日誌
「司機視角」
司機澄叔今朝同平時一樣五點出門口撘穿梭巴士去杏花邨車廠簽到開工。今日派車部派兩轉來往灣仔北至小西灣藍灣半島嘅8P同埋一轉來往小西灣藍灣半島至黃大仙嘅106。澄叔一心諗住揸吓新車。點鬼知車廠派更部就俾咗部舊車-5070畀澄叔，澄叔晴天霹靂，不過都冇辦法啦！鬼叫要返工咩。
-
澄叔走上車廠天台攞車，行到去5070前面，發現司機位嘅車窗冇閂實，好彩尋晚冇落雨，唔係就瀨瀨屎嚕。佢巡例環繞巴士一週，檢查完冇問題就㩒太平門制開車門上車。喺佢踏上車嘅第一步，佢踩到啲嘢跣親。澄叔望真啲，地上面嘅竟然係一大疊溪錢，佢嚇咗一跳。澄叔諗諗吓，其實應該係冇閂窗先俾風吹入嚟啫，所以就踢咗啲溪錢落車，再揸出去載客。
-
順利咁揸咗兩轉8P後，喺東區走廊返緊總站期間，澄叔發現巴士嘅客鐘不斷響。正所謂「輸人唔輸陣」，響到澄叔都嗌三聲壯一壯膽。明明先前嗰轉8P都冇事，但而家「叮」足全程。個客鐘由東區走廊一直叮到小西灣總站。澄叔返到小西灣總站要求站長換車，但係總站冇晒後備車可以換。於是，佢硬住頭皮攞咗牛皮膠紙封咗個鐘聲。
-
︻
「15歲女情困 東區走廊巴士爆窗跳橋死亡」
［本報訊］一名15歲吕姓女子因與男友分手，於東區走廊巴士爆窗跳橋自殺死亡。肇事巴士為行走來往灣仔至小西灣的8P線，有目擊乘客指，該名女仔在銅鑼灣上車後一直喪哭，當巴士駛至東區走廊近北角殯儀館對出時，女子拿走巴士上的玻璃槌打爆玻璃，跳下車後再跳橋自殺。警方調查指案件無可疑，並在巴士上檢獲遺書。死者家屬指，吕成績優異，在港島區數一數二的女子名校高材生，性格樂觀.......
︼
-
「嘩頂！乜咁後生就睇唔開㗎？」
-
澄叔喺站頭見到上星期發生嘅報道後，原來肇事巴士正正就係佢揸嘅5070。佢再諗返一上車見到嘅溪錢，東區走廊行車期間落車鐘不斷響，就可能係個女仔靈魂仲喺架車度。咁啱得咁橋，巴士總站有車返到嚟，站長批准澄叔即刻換第二部車。佢比原定時間遲咗5分鐘開出-10：05小西灣藍灣半島開車，一直行車暢順，十一點半準時到達黃大仙。
-
咁至於10：00開出嘅班次又係點嘅呢？原來係鬼世界同現實世界唔小心連接咗，呀一同女仔唔小心踩到入鬼世界，而呢班車係由扮澄叔嘅鬼魂開出。自殺女子扮成澄叔，令其他「人」覺得係正正常常去黃大仙嘅106。然後帶成車「人」遊佢嘅新屋-冥府。呢個女仔好關照「人」，所以當巴士去到維多利亞公園前，佢經WhatsApp send 咗message比全車「人」，問佢哋去唔去冥府旅行團。全車「人」睇完WhatsApp後落晒車，但係呀一手機冇曬數據，所以睇唔到Whats App。而喺維多利亞公園分站上車嘅女仔就更加唔知情。為咗讓遊客好好自由體驗冥府旅程，所以運用冥府全新科技-無人駕駛方式行車。因此「司機」喺入隧道前瞬間消失。
-
為咗保持神秘，當巴士穿越冥府，返回地府，駛出隧道後，司機扮若無其事咁上返車，再載佢哋去地府嘅紅磡世界殯儀館總站。
-
另一邊廂，正常人間嘅澄叔已經到咗黃大仙放緊lunch喇！
-
（待續 To be continued）
-
IG：chingchingstory