因為一次意外我獲得神奇力量可以隨心所欲，結果........: Ch.4 點解仲係咁多野煩(2)

興隆銀行客戶經理房
 
余立信正在Derek研究下一季度的生意戰略，他當上了客戶經理只不過是短短半年之間，銷售成績已經躍升至全興隆銀行的頭五十名位置。
 
「我已經將主任級既保險客介紹比SUE做基金，如無意外佢將會係今個月渡過安全線。」除了令自己成績躍進之外余立信也幫忙其他成績低迷的同事，目的就是培植自己在分行的勢力。
 
「咁樣SUE就變左自己人，Chris真係犀利。」Derek由衷佩服其收買人心的手段。
 
「都係因為有你呢個契仔係到李太(Counter既阿Head)先至會企係我地呢邊。」余立信也充份利用Derek在分行的人脈。
 




「咁都要有你呢個靚仔用美男計冧掂Counter班妹妹至得啦，聽講你同Connie呢排行得好埋。」
 
余立信又是對這半年的回憶十分含糊，他只記得自己考獲了車牌而買了一輛名貴房車，在外面租置了一個物業偶然會到那兒住住，雖然腦海沒有了甚麼回憶但他覺得並不重要。
 
「有乜女仔可以逃出我手指罅呀哈哈哈！」余立信得意地道。
 
「但係我地仍然有阻力，Michael此終有個舅父喺工商部照住，佢成日射啲基金客俾Jimmy班人對我地好大壓力。」
 
「老何真係幾犀利，工商部咁多大老闆都俾佢馬住，Michael有咁既舅父真係好彩。」余立信言語之間不敢滲出妒忌。
 




「佢有手段服侍得啲大陸佬貼貼服服，其實何生之前都有同玲姐合作不過最後大家都傾唔埋冷，而且Michael又自私要一個人立曬啲貨唔分比其他RM，唔係佢地根本可以控制到成個分行。」
 
「Michael算得係咩？如果我有個舅父咁把炮既我成績高過佢十倍啦，你話我地可唔可以係工商部插旗呢？」
 
「邊有可能呀，我地一向都冇同佢地來往。而且大家既瓣數唔同好難夾既。」
 
「你有冇辦法可以攞到工商部既員工名單同performance 。」
 
「好容易啫，我條女係人事部做。但係你要黎做乜？」
 




「我係到諗其實我地個盤既客都有好多係自己開公司，如果可以refer商業貸款呀或者開吓戶口一定做到互惠互利。」
 
「我都明，許生都有叫我地refer一啲客俾工商部，但係射完俾佢地又如何？佢地都唔會同我地keep到個關係呀。」
 
「我係到諗，每個部門中實會有啲人係唔掂唔夠數，如果我地能夠雪中送炭既話情況極有可能扭轉。」
 
Derek 看見余立信的眼神閃出一陣異彩，似乎他的腦海浮出了下一步戰略，事情一切的發展都會如余立信的運勢般順利無阻。