灰姑娘計劃Project Cinderella: 最後一幕
最後一幕
時間：星期日凌晨十二點
地點：山頂
人物：Terence、Ming爺、Tracy
場景：在山頂上還原灰姑娘
隨住舞王大賽的結束，舞會也曲終人散，來賓也走得七七八八，餘下管家和侍應在收拾清潔。
「少爺、小姐，你哋上房休息吓先，呢度我哋會搞掂。」管家對Terence和Tracy說。
「唔駛，我未攰，我送Tracy返屋企先，呢度麻煩你喇。」語畢，Terence拖著Tracy離開了別墅。
時間接近凌晨，別墅外的射燈都關上了，街燈也只剩數盞亮著，因為身處少光害的近郊，整個環境幾近漆黑一片，天空的星星顯得分外明亮。
「呢度個View好靚呀，你睇吓啲星星，好多呀，我都未試過見到咁多星星，仲有個月亮呀，好光好大，呢個新月係我見過最靚嘅新月。」Tracy看得著迷，連忙拿出手機想拍下眼前這光景。
Terence在旁看著，不發一言，靜靜的看著Tracy；而Tracy則連拍十數張夜空還意猶未盡。
「時間唔早喇，要行喇。」Terence看看手錶，發覺已經十一時半，然後再說：「係送你返去之前，我想帶你去多一個地方先。」
「但係……」Tracy說話帶點抖震，有點想哭的感覺，Terence一時間也不知如何反應，Tracy轉個頭，用楚楚可憐的樣子對Terence說：「我……我影極都影……影唔到呀，淨係得黑色，啲星星……星星影唔到，個月亮都好細粒。」
「哦……原來係咁喳，呢度咁黑，影唔到好正常，用我部手機影完Send返畀你喇，我呢部影夜景最強。」Terence借了手機給她，影完後便上車往山頂去。
「真係好靚呀，唔該你，我哋而家去邊呀？」
「啱啱你睇完大自然嘅美，而家帶你去睇人造嘅美。」
「唔明喎，即係咩呀？」
「帶你上山頂睇東方之珠呀，一定令你畢生難忘又可以經常回味。」
駕車上到山頂無人的一角，停好車後，他們往旁邊的觀景台走去，距離十二時還有五分鐘，一切盡在掌握之中。
Terence帶Tracy去到指定的位置，一個觀看夜景最美的位置，好讓Tracy能盡情欣賞美景，而Terence則只看著Tracy，偶然為她整理弄皺了的晚裝，兩人就這樣安靜的站著。
早早到現場準備，現在在遠處埋伏拍攝的Ming爺也屏息以待，準備捕捉最後最精彩的一幕。
而女主角Tracy則仍蒙在鼓裡，興奮的看著香港夜景，拿著手機在拍照。
時間尚餘一分鐘，Terence按照計劃找藉口開溜，留下Tracy一人在觀景台等候。
「五、四、三、二、一、零，夠鐘。」
Ming爺和Terence同時眼看著錶心在倒數，而十二點來臨的同時，不知哪來的鐘聲也「噹」的響起，這突如其來的鐘聲把專心拍夜景的Tracy嚇了一跳，同時間她身上的Dress Of Cinderella晚裝也隨著鐘聲變成殘破污糟的連身裙。
不消十秒鐘，Tracy由公主變成灰姑娘，身上除了玻璃鞋外，其他Terence給她的衣著、首飾也不見了，只餘下一身骯髒的衣服。
經歷著這一切，Tracy驚惶失措，除了無助外，她根本無能為力，最終淚水亦奪框而出，她不知如何向Terence解釋晚裝的事，因為她根本不知道發生了什麼事，她只能跪坐地上嚎啕大哭。
不知哭了多久，她開始聽到腳步聲，腳步聲越行越近，越來越多，她用手擦乾眼淚，抬起頭看，發覺這些腳步聲的主人正圍著自己，在微弱燈光映照下，她認得出其中一些人，他們正是舞會上的嘉賓。
他們正笑著，面目猙獰的嘲笑著，Tracy完全不知原因，但被人圍著嘲笑把她弄至崩潰了，她把自己盡力的縮作一團，用手摀住耳朵不讓嘲笑聲進入，用力的緊閉雙眼不想有任何影像透進雙眼。可是嘲笑聲仍舊響徹腦袋，影像依然在緊閉的雙眼中出現。她想逃走，但被人圍著。
「有無人可以帶我走出呢個地獄，邊個可以？Terence你係邊？救命呀……」Tracy心裡默念，但始終沒有人來。
又不知過了多久，嘲笑聲停止了，一把熟悉的聲音猶如天使般降臨地獄帶她脫險。
「Terence！」Tracy哭了，一下撲上前攬著他瘋狂哭泣：「我好驚……唔知發生咩事，救我！」
「傻瓜，發生咩事？講畀我聽。」
「我都唔知，你送畀我啲衫變哂污糟衫，之後啱啱舞會啲人圍住我嚟笑，我唔知咩事，我好驚。」
「人？呢度邊度有人，得我同你喳喎，你唔好嚇我。」
Tracy張開眼看看四周，真的一個人也沒有，但衣服始終是破舊的連身裙。
「對唔住，條裙……」
「條裙唔緊要，著咗全日靚衫做公主，而家變返普通人係咪好唔慣，好掛住公主生活？」Terence拖著Tracy走回馬路。
「認真都係嘅……」
「哈哈。」Terence停住腳步，對天大笑。
「做……做咩事？」
「你估你真係可以飛上枝頭變鳳凰咩？你係灰姑娘喳，你估你真係公主呀？由識你開始到而家一直都係一個局，一個要教訓你呢啲發公主夢想變鳳凰嘅死港女嘅局，我哋仲全程拍哂片，遲啲Youtube見喇。辛苦大家喇，出嚟一齊笑尻佢喇，哈哈。」Terence歇斯底里的咆哮著，彷彿想用聲音掩蓋自己的情緒一樣。
Tracy真的徹底崩潰了，一日內經歷人生高低令她崩潰了，但她沒有哭，她笑了，甜笑著、苦笑著、嘲笑著、狂笑著，比在場所有人也笑得大聲。
她一直笑，直到所有人都離開了，她還在笑。
這段片有沒有令Terence和Ming爺爆紅沒有人知，Terence的FYP結果如何也無從知曉，但令勝利者姿態的Terence和失敗者姿態的Tracy兩個人的心徹底傷透則是鐵一般的事實。
❨男士結局❩