灰姑娘計劃Project Cinderella: 第九幕
第九幕
時間：星期六下午
地點：遊艇
人物：Terence、Ming爺、Tracy
場景：離開餐廳上遊艇，在遊艇上兩人各種互動。
「食飽我哋行喇。」Terence温柔地對Tracy說。
「嗯。」Tracy小聲問Terence：「唔駛埋單先？」
「哈哈，唔駛埋嘅喇，佢哋之後會寄張單畀我管家，管家會搞掂。」Terence走到Tracy旁邊，今天紳士風度滿溢的他替Tracy拉開椅子，好讓她可以容易點起來。
兩人離開餐廳，按照計劃的下一步是上遊艇。
「食完飯，不如去吹吓海風傾吓偈。」Terence替Tracy打開車門，同時提出下個行程。
「你話事喇，吹海風都好，無咁熱。」Tracy邊繫安全帶邊說。
計劃進展非常順利，Terence駕車前往中環碼頭，在馬路旁把車停好，帶Tracy到岸邊。
「我哋坐喺嗰面呀，有櫈。」Tracy指著遠遠沒有人的長櫈，未等Terence說話便推著他走。
Terence轉身阻止了她，對她說：「其實我哋唔駛坐喺度，我同得你講吹海風，點會無準備呢？」語畢，他指著岸邊一艘遊艇，續說：「你睇吓嗰面，我哋坐佢出去吹海風傾偈，行喇。」
未等Tracy反應過來，Terence便推著她登船。這遊艇從外面看並不特別，只是比別其他遊艇大一點，但內部的裝修才是關鍵。金碧輝煌不在話下，上中下共三層中間大廳有一百吋曲面大電視，隨時變身私人影院，還有酒櫃，爐具等；下層房間有三間，每間房有獨立電視、廁所，其中最大的一間更有按摩浴池；上層有一個可容納十數人的露天茶座，衛星電話、Wifi上網一應俱全，更需要有水手協助船才能正常運作。
Tracy看著這艘船，徹底被震驚，良久說不出話來，Terence只好繼續推她進大廳坐下，然後吩咐船長開船。
Tracy不由自主的參觀整艘船，而Terence則從酒櫃拿出一枝早已準備好的紅酒，開了出來透氣，準備待會兩人邊談心邊喝。
「嘩！艘船好豪華呀，下面有按摩浴缸，呢度有咁大個曲面電視，好似戲院咁，好正呀，我第一次坐遊艇，以前都係坐小輪喳，好多謝你呀Terence。」Tracy難掩她興奮之情，四處看四處拍照，而Terence則是從容的坐在椅上品嚐著紅酒。
「對唔住呀，我係咪好失禮？」Tracy回過神，想起剛剛的舉動，覺得有點羞愧。
「唔緊要，反而我覺得你好Pure好True。」
「你真係識氹人，但我哋著到咁，啱出嚟遊船河咩？」
「放心，泳衣我準備咗，就喺下面轉左嗰間房度。」
「咁細心？不過你架車點算，就咁泊喺碼頭得唔得嘅？」
「哈哈，講細心我遠遠唔及你，連架車你都記得，我都已經唔記得，我即刻打畀管家幫我揸返屋企先。」說完後，Terence便拿出電話假裝找管家，而Tracy則去換上泳衣。
「又會咁啱身嘅？套泳衣Cutting好靚，一定好貴，我今次著完，洗乾淨畀返你。」
「錢唔重要，你鍾意就最得喇，我特登去揾個Designer設計嘅，獨一無二，唔駛畀返我，送畀你嘅，想報答我就著多啲畀我睇喇。我都去換先，等等我，一陣一齊落水玩吓，你飲住紅酒先，透哂氣，呢杯係畀你嘅。」
Terence落了下層走入房內，而Ming爺一早已經在此等待。
「點？你狀態掂唔掂？佢有無起疑心？」Ming爺著急地問。
「你同我定喇，我咁好演技，點會穿崩？反而我怕你拍唔到啲精彩鏡頭喳。」
「無可能，我點會拍唔到？條片一定好精彩，放心。」
「好，咁就交畀你喇，我上返去繼續做埋下半場先。」
Terence返回大廳，發覺Tracy不在，於是他走到上層查看，發覺Tracy坐在船頭，還拿著紅酒，狀甚享受，Terence便下去找她。
「原來你喺度，同我玩捉迷藏？」
「唔係喇，只不過我覺得坐喺度吹住海風望風景舒服啲，始終大自然感覺係唔同啲，平時都無咁嘅機會，所以今次真係好多謝你畀咁好嘅嘢我。」
「你鍾意嘅我哋出嚟多啲，我都好鍾意大自然。」
「好呀，不過要等我放假先得。」
「或者唔好返喇，人工咁低又咁辛苦。」
「你呢啲有錢人唔知咁多嘅喇，我自己揾之餘仲要畀屋企，我都唔想做，但唔做屋企開飯都成問題。」
「咁我都明嘅，我都窮過，我屋企一直都唔會點喺金錢上支持我，我所有駛費基本上都係自己揾返嚟，只係之前我阿爸過咗身，而家繼承咗啲遺產，所以先變得環境好咗。」Terence說到這裡，眼淚不自覺的流了出來，Tracy伸手替他抹掉。
「Sorry，提起你啲傷心事，唔好喊喇，今日我哋出嚟玩，要開開心心嘅，快啲笑返。」Tracy安慰裝哭的Terence。
「你講得啱，我應該開心先係，嚟，我哋飲杯先。」他們一飲而盡，在一望無際的海景下沉醉了良久，但其實Tracy的視線從未離開過Terence，只是默默的看著，直到水手出現才打破沉默。
「少爺，我哋到咗目的地，可以落水玩喇。」水手Ming爺大聲說。
「喂，我哋落水玩喇，唔好喺度乾曬。」Terence拖著Tracy往船尾下水處走。
「你……識唔識游水嘅？」Tracy小聲問。
「識呀，你呢？」
Tracy搖搖頭，然後Terence二話不說的便將水泡套在Tracy身上，自己手拿浮條率先下水，再對著Tracy說：「放心落嚟，我接住你，唔駛驚。」
Tracy膽怯的下水，Terence在旁拖著她的手，在船周圍漂浮。
「不如我教你游水。」Terence忽發奇想：「有我教好快學識，我以前做過游水教練。」
「但我好蠢，學極都唔識，細個都有學過，但都係唔得。」
「放心，信我，我教你實識，你而家有水泡，唔會有事，試吓挨前個身踢吓水。」
有Terence在旁扶著，Tracy放膽的跟著Terence所說去做，很快便有成果。
「做得好呀，學得幾快，試吓用埋手撥水，跟住我個動作咁做就得。」Terence做出自由式的划水動作，Tracy照辦煮碗，在水泡的協助下，成果很快便出來。
「你真係好叻，三兩吓手勢就教識我游水，我越嚟越欣賞你。」
「係你自己有天份啫，唔關我事。」
兩人游了一會感到疲累，便在浮床上休息。
「其實我今日真係好開心，你竟然肯應我邀出嚟陪我，開心過中六合彩。」
「唔駛咁誇呀？本身我以為只係好普通咁行街睇戲食飯，點知你安排咗咁多唔同嘅行程，我真係發夢都無諗過原來你係咁有心思。」
「哈，睇小我？對於我有興趣嘅人，我係唔介意花啲心思。」
「有興趣嘅人？」
「係呀。」說到這，Terence坐了起來，對著Tracy深情的說：「喺Canteen第一次見到你我就已經對你有興趣，估唔到咁啱我哋Take同一個Course，到同你熟咗啲之後我先敢膽粗粗去約你，幾驚你會拒絕我，好彩無喳。」
「講到我好唔平易近人咁嘅，哼！」Tracy故作生氣，把浮床划遠。
Terence立即划近Tracy，然後對她說：「無論你划到幾遠，我都會划返去你身邊陪你、保護你，所以你唔好划走喇，划嚟我身邊，同我同一張浮床，等我照顧你、保護你喇。」
Tracy雙頰發熱，面紅耳赤，一時之間不知所措，只好別個頭迴避Terence目光，而Terence則乘勝追擊，伸手把Tracy的頭轉向自己，心裡很想對她說：「做我條女。」但由於計劃是要令Tracy覺得自己是Terence的女朋友但實際上卻不是，所以Terence絕對不可以對Tracy表白，所以最後Terence對Tracy說：「玩你喳，睇吓你個樣幾怕醜幾好笑，哈哈。」
「真係玩我？定而家先係玩我呀？」Tracy有點怒氣。
「唔好嬲，你咁好邊會鍾意我呀，大把比我好嘅人追你喇。」
「但係我……」
「夠鐘回程喇，要上水喇。」Tracy的話被水手Ming爺打斷。
「你想講啲咩？」Terence問。
「都係無嘢喇，我哋快啲上水喇，唔係一陣丟低你一個喺海漂浮嘅喇。」
他們上水後，船也啟航回程。他們簡單沖洗後，又再拿著酒杯在船頭聊天。
「今日真係好多謝你，我玩得好開心，不過時候都唔早，我要返屋企喇。」
「咁早？我屋企準備咗晚餐，預咗你嗰份嘅喎。」
「咁快就上屋企？我唔係咁隨便嘅。」
「講呢啲？就係知你唔隨便我先特登預備好啲，唔係隨便準備嘅，唔係唔賞面啩？」
「唔係，只係我出咗嚟咁……」
「唔係就得喇，一於咁話，今晚食完飯先走，平時食飯得我一個，難得今日有客，真係好。」
「嗯……好喇咁。」
「喂喂喂，你睇吓，係鹹蛋黃呀。」
「嘩，係喎，好靚呀。」
「啱呀，本身日落已經夠靚，但出海睇仲靚，不過我覺得今日個日落比平時更加更加靚，知唔知點解？」
「因為今次距離近咗？」
「嗯……都算啱嘅，不過唔係同日落嘅距離，而係同你嘅距離，有你係身邊，咩都比平時靚十倍。」
「又笑我？」
「奴才不敢呀娘娘。」
伴隨著日落，船也慢慢向另一個舞台──Ming爺夢幻的別墅駛去。