【幸運了，然後呢？】: 後記 【一】

這間「Starrynight Pub」的客人絡繹不絕，漸漸成了該區的一間人氣小店，每位來到這裡的客人也有他們的故事，而很多客人來到這個地方的時候，總不其然的心生疑惑，有的更會詢問這裡駐場的老闆；
 
為甚麼只掛了一幅掛畫，明明還預留了一個位置？
 
是不是找不到合適的掛畫？我有介紹。
 
而這裡的老闆一律作此回應，
 
「點知我個拍擋諗咩呀？仲話呢個位唔準搞，搞咗無兄弟做，可能風水問題啦。」
 




「係咩？咁另外嗰位老闆去咗邊？」
 
「佢今日放假，做到我得返半條人命。」
 
「係呢，我見呢度啲裝修幾有英倫風，你地好鍾意英國嘅嘢？」
 
「呢啲係我個拍擋決定，而重點唔係佢鍾意英國，係英國有佢鍾意嘅人。」
 
話音剛落，這裡的老闆不禁笑了一笑，繼續埋頭苦幹洗著杯子，聽著店內播放著一首歌曲，讓老闆想起曾幾何時，在昏暗燈光的酒吧，聽著嘈雜震耳的搖滾樂，或者浪漫令人陶醉的歌曲擁著美女在舞池跳舞，打量著眼前擺滿在案上的酒樽，看著別人瘋狂痴迷的舞步，眼前的一切如像夢幻泡影。
 




而在另一個地方，有兩位女孩不約而同的在異地遇上，然後趁著彼此認識的人的死忌相約一起回港，一個在異地讀著藝術完成往生者的夢想，另一位當上幼稚教師，實現摰友的遺願。
 
一邊淺酌一杯，一邊聊起往事，有人說過，當朋友變成敵人時是最可怕的對手，但當敵人變成朋友時是最了解自己的知己。
 
到底這兩位女孩現在是敵還是友？沒有知曉，至少今晚她們停戰了，以懷念一位曾經愛過的朋友和親人。
 
她們喝得微醺了，再聊起自己的事情，喝得有點醉意，再交換著各自的心事。
 
「Jessica你今次返咗嚟香港唔揾你男朋友？」
 




「怕一揾咗就唔捨得。」
 
「但可能唔揾嘅話，就錯過咗最好嘅時機。」
 
「嗯，咁你呢？」
 
「我？唔需要男人。」
 
「哈，到底係唔需要男人，定係需要嗰個男人但唔敢愛。」
 
「咁樣幾好呀，佢有愛佢嘅人照顧佢，我叫擁有過佢嘅愛。」
 
「如果撞到佢，咁你會點？」
 
「哈，邊有咁容易？如果喺我清醒嘅時候撞到佢，我會攬佢一下，跟住可能變返陌生人，你知架啦，喺酒吧度，啱Feel咪攬下囉。




 
「你唔再怕啦咩？」
 
「唔知啦。」
 
「咁如果喺你醉咗之後呢？」
 
「但如果喺我醉到無晒知覺嘅時候，就當我地無緣。」
 
「咁我好想睇下你地有緣定無緣啦。」
 
「唔好玩啦，邊有咁易開口中，香港話大唔大，話細都唔細。」
 
「開口中呢樣嘢，我好信自己嘅幸運。」
 




說著說著，另一位女孩不知不覺間已經醉得睡著了，而Jessica輕輕推了她一下，還左顧右盼的叮嚀著酒保給她一杯暖水，就在她感到躊躇的時候，有一位男生遞了一杯暖水過來，而Jessica還未來得及道謝的時候，該男生用手撫了醉掉的女孩的額頭一下，Jessica起初誤以為他是色狼準備把他推開的時候，卻看到那位男生眼神充斥著懷念，報以一抹懷念的微笑，並輕聲喚道，
 
「子瑜！歐子瑜！做咩今次到你咁狼狽？」
 
Jessica疑惑地問，
 
「你識佢？」
 
男生的視線離不開眼前的那位，搖了搖頭說，
 
「唔識而家嘅佢，我只係認識曾經嘅佢。」
 
說罷，男生動身離開，在臨別前說道，
 
「希望你唔好同佢講，有個死肥仔趁佢醉咗時候寸佢抽佢水。」




 
有人說過，多少次一個不經意的轉身，一抹淺淺淡淡的眼神，是旁人和她看不懂的情深。
 
在兩個人相遇的瞬間，酒店裡播放著的是Ed sheeran - Perfect！