【幸運了，然後呢？】: Chapter 17 【 仇人的來訪 】

那個晚上，「武田玲奈」沒有找我，不過換上是別人的話，男色當前，誰也懂得選擇吧，這年頭有人性的人很少。
 
下班回家，整晚無眠，因為那種無奈和揪心揮之不去，直到翌日上班的時候，經理好奇走了過來問道，
 
「樂哥，你無事嘛？」
 
「無呀。」
 
「你對眼紅紅地嘅？係咪攰唔夠瞓呀？聽日放假好好休息下啦，條數跑唔到就由佢啦，我地睇開啲啦，呢個額真係根本得旺角同銅鑼灣至跑到。」
 




「唉，可惜上面班人睇唔開嘛。」
 
「樂哥，聽講今日會有神秘顧客派人嚟巡舖，叫啲細醒定啲好喎。」
 
「次次個神秘顧客報告都話我地欠缺主動性，員工笑容不足，人手不足個個追更咁返，假就放唔足點笑呀？」
 
有一把女聲打斷了我和經理的話匣，
 
「唔好意思呀，我想問呢度點樣行去xxxx box？」
 




眼前突然走來了一位雙目炯炯有神，肌嫩勝雪，清美稚雅間帶點靈巧的女生，有一種難以言喻的魅力，而那種魅力令異性不敢直視，但內心卻為之驚嘆，至少一向審美眼光嚴格的經理也不禁望了兩眼；
 
經理搶著回答，
 
「呢度行過去都有一段路程，你可以去坐二期度坐接駁巴士。」
 
那位女生冷冷的點頭道謝便離開了，驟眼看來總是覺得有點眼熟。
 
而那位女生離開了一會，經理便對我說，
 




「嗱，呢啲至係真正嘅靚女呀！邊似你班友，見啲女露下條腿露下個波就話係女神，人地就咁著件T-shirt牛仔褲都羸你地班女神唔知幾多條街。」
 
倘若是一般人走來問路的話，經理見狀只會回答，前面有客戶服務可以查詢。
 
我沒有理會經理的話，只是不由自主的說了一句，
 
「佢真係好熟口面。」
 
「係靚女都熟口面架啦，溝女開場白呀嘛。」
 
說實，我總是覺得不知在那裡見過這位女孩。
 
另外，今天好像不見「武田玲奈」，難道她昨晚......
 
唉，別想太多，畢竟人的幻想很可怕，但更可怕的就是現實的恐怖往往超乎自己的想像。




 
翌日，是「武田玲奈」沒有找我的第二日，今天是我的休假，每逢休期除了睡到日上三竿之外，起床後到老人院探望婆婆是必需的事。
 
婆婆最近的身體差了，畢竟年紀大，但精神狀況卻比以前愈來愈好，不過她依然還是拿著那張優惠券跟我說中了六合彩頭獎外，意識也開始清醒了一點，至少她認出了我是誰，雖然記憶還是一時停留在我六歲時的階段，一時便回到現在，她記憶中的時空也是十分跳脫。
 
「今日咁好探婆婆呀？」
 
「係呀，今日放假。」
 
「做晒功課未？」
 
「......」
 
「死仔，今日係平日喎，放咩假呀？你學人走堂？」
 




「今日教師發展日呀。」
 
「咩教師發展日呀？你唔係返工咩？」
 
「......」
 
「你係咪有心事呀？」
 
「我無呀。」
 
「我唔識睇相，但睇咗十幾年，點都識睇下人嘅眉頭眼額。」
 
「算有嘅。」
 
「係咪唔夠錢用呀？定係返工壓力大呀？」




 
「唔係呀。」
 
「咁即係好攰啦，我都話咗攰就唔洗探我，你有你自己生活同人生；我年紀大啦，都想除咗想你努力返工之外，都想你有你個.....「拉夫」。」
 
「哈哈，識英文喎。」
 
「我成日睇電視，點都學到少少英文！所以我唔會寂寞，而且呢度啲姑娘幾好，啲老友記都幾好人呀，你得閒放假就休息下，或者約下女仔啦。」
 
「而家咪約緊！」
 
今天婆婆變回了從前的她，雖然記憶有點混亂，但比起往時精神了很多，算是一個好開始吧？
 
「好啦，傾咗咁耐，你都返去做功課啦，知唔知呀？」
 




「但係.....」
 
「唔好講咁多啦，返去做功課呀，你次次唔想做功課就揾婆婆做藉口。」
 
「係，知道。」
 
「仲有呀，張六合彩快啲兌咗佢呀，知唔知呀？」
 
話音剛落，婆婆遞了那疊過期已久的百佳優惠券給我，為了應付她的要求，於是我把那張優惠券放進銀包的夾層。
 
在我離開老人院的時候，我回頭望了正在看電視的婆婆一眼，有時候我覺得像婆婆現在這樣的人生是否好過一點？是否算得上她的第二人生？
 
想著想著，「武田玲奈」終於找我了。
 
「你今日無返工？」
 
看著我們whatsapp對話框中的上一次對話是前天的18:05，心想她突然找我是想沾一下運氣嗎？
 
「我今日放假呀，你又知嘅。」
 
「唔怪得啦，行過見你唔到。」
 
「今日戴咗Con？」
 
「咩呀，平時行過都會望下，雖然望得唔清。」
 
「我以為你個約會開心到玩足兩日。」
 
「喂呀，無你諗到咁！食完飯，我地各自返咗屋企，但我食完海鮮過敏請咗一日假，又瞓足一日。」
 
聽到這個原因，我竟然會因此有點高興，算不算壞心眼？
 
「原來係咁。」
 
「其實我有件事想同你講，因為成件事嘅來龍去脈都係得你知。」
 
「係咩事？」
 
「嗰個人今日嚟咗揾我，Lunch返到公司樓下大堂見到佢。」
 
「邊個呀？」
 
「我表姐個好姐妹。」
 
「下？咁跟住？」
 
我的腦海開始記回了一些事情，那天問路的女孩......
 
倘若我的記憶和直覺無誤的話，那位問路的女孩，如無意外就是「武田玲奈」的仇人吧？
 
「跟住佢咩都無講，又好似好怕面對我，好在嗰時有人，如果唔係我一定一巴打埋去。」
 
「咁跟住呢？」
 
「跟住.....我叫佢唔好阻住我返工，亦唔好搞到我無心情返工，叫咗佢今晚八點喺平台花園老地方度見，仲同佢講呢個地方佢一定唔會忘記。」
 
不知怎的，總是覺得「武田玲奈」如願見回仇人，縱使知道真相也不是一件可以讓她釋懷的事。
 
「其實唔去會唔會好啲？」
 
「你今晚陪我去，好唔好？」
 
「咁你個Auditor呢？」
 
「唔好提佢，有試過同佢提過，點知佢答我原諒別人等如原諒自己，算啦。」
 
「......」
 
「仲有我食海鮮敏感，佢一句安慰我嘅說話都無，仲話下次食其他嘢至約我，當我係咩？而且嗰晚走嘅時候，佢問我去唔去佢屋企附近飲杯嘢，佢住天后，仲話第二日返工都方便大家，聽到嗰下立即反感，咁我拒絕佢啦，佢立即黑面，跟住拎手機出嚟玩啦，再同我講話約咗人，之後再到佢嗰句突然話下次食其他嘢至約我，我仲反感。」
 
她會反感？這回事又讓我有點好奇？為甚麼那晚她又不會反感？
 
難怪一如Kenny這位專家所言，女人是一種雙重標準的生物，她主動邀約和被人邀約是兩回事，可以得到兩種反差的結果，更要命的是沒有原因，是他綜合多年溝女經驗得到的結論，我們只可以發揮自己的個人魅力引誘對方，讓對方採取主動或者欲拒還迎。
 
我經常覺得Kenny的偉論就像一本武功秘笈，看完／聽完都不知如何使用，只知道內含玄機，但要特定人選才能修練，同時又看著他本著這些偉論溝女無數。
 
總括而言，溝女需要「有錢」和「靚仔」。
 
「你反感？咁而家點呀？」
 
「我無揾佢，佢都無揾我，雖然佢真係好吸引，但我覺得佢好似好多女，佢以前讀書嗰時都唔係咁，但偏偏感覺仲喺度。」
 
有時候喜歡一個人，追求著一個人，很多時候都是追逐著自己所創造的幻像。
 
「人會變，又或者做朋友係一回事，到發展又係另一回事。」
 
她反問，
 
「咁你呢？」
 
「我咩？」
 
「哈哈，無呀！問你點睇咋。」
 
「無咩睇法。」
 
「咁今晚七點，你嚟我公司樓下接我？你識唔識路？」
 
「我識嘅。」
 
畢竟她的仇人也曾向我問路。
 
「咁如果你真係唔識路嘅whatsapp我呀？」
 
「好啦，到時見。」
 
今晚見吧，「武田玲奈」。
 
不過，估計今晚又會是一個令人難以忘懷的晚上。