愛回家之傷心速遞？！: 第九章 顧影自憐的老人

西貢一棟臨海的別墅裏住了一位可憐的老人，他每次都要用盡各種手段才能來到這兒透氣，以至於訓練出反跟踪的技巧。他每日都會被自己的兩位妻子騷擾，而她們的要求很簡單，就是要他留宿在自己家。大女兒小的時候，他還可以抓着她傾訴自己的不快，可大女兒長大後，居然搬出去，還整天忙東忙西的，讓他再也沒有可以每日傾訴的對象，也難以隨時掌控大女兒的行踪，他覺得自己是全世界最可憐的人。


「大龍生，你究竟有冇認真聽我報告？」看着龍敢威再次陷入哀怨模式，林美香不得不開口提醒對方。


「Mandy，你話女大係咪就一定外向呢？一隻狗居然仲緊要過個爸爸！嗰個何恭梓真係好手段，居然唸到用隻狗來綁住我個女！」越講越生氣的龍敢威覺得一定不能讓女兒嫁給對方。


「大龍生呀，即係咁，其實大小姐一啲都唔中意何二少，你係咪諗多咗呢？呢幾年來，你都已經趕走咗唔少大小姐嘅追求對象喇！你再咁樣落去，大小姐遲早會知道㗎喎！而且呢個何二少唔惹少！聽二少爺嘅語氣，何家啲黑色產業嘅真正話事人係佢，你如果要出手嘅話，可能會畀二少爺知道。」林美香嘗試拉回龍敢威的理智。






「我用咁多錢請你翻來唔係要聽你分析呢啲嘢！個Terry又係衰嘅，自己家姐都要利用，想掂黑嗰範咪自己搞囉，而家搞着我要同佢執手尾。」龍敢威恨鐵不成鋼的反應讓林美香忍不住翻了個白眼。龍敢威把她安插在大房兩位子女身邊，卻總是不相信她對龍力蓮的分析，認為龍大小姐會是一個輕易被勾走的小綿羊。事實上，龍力蓮從未對這些人動心，龍敢威根本不需要做任何事，就能讓女兒和這些由龍力王安排的對象沒有任何發展機會。


「大致嘅情況就係咁多，冇其它嘢嘅話，我要趕住出翻市區同博思撐枱腳。」


「等等！個金城安係咩一回事？佢唔係已經放棄咗，話要去德國發展嘅咩？」龍敢威的問話讓林美香放下手中準備戴上的口罩。






「你唔捉大小姐入醫院嘅話，點會引呢隻安少翻來喎！我呢排為咗趕走佢，死咗唔少腦細胞啊！」看到龍敢威開始不悅的表情，林美香不敢繼續抱怨下去，「咁你上次講嘅嘢鼓勵咗Philip仔，搞到佢一日到黑來大小姐辦公室推銷佢daddy，有次安少上來仲聽到佢話要幫daddy約大小姐出街，咪搞到安少啲危機意識出曬來囉！你都唔知熊家隻啤啤幾慘啊！成日畀佢綁架出來，搞到對啤啤冇興趣嘅Nikita都忍唔住要同情佢！」


「個死仔包真係唔識寫個死字！你同我打畀令熊，叫佢做翻啲嘢！」


「但熊家嗰邊會好難交代喎！」林美香覺得有必要提醒對方。






「我而家係咪得罪唔起先！」龍敢威吹鬍子瞪眼地問道。


「得！得！得！你當然得罪得起！我系驚你之後清醒咗會後悔啫！」


聽到這話的龍敢威愣了愣，似乎想起什麼不太好的往事，最終，他揚揚手，「算了，做少少嘢都咁多廢話！我遲啲親自約熊樹根出來傾啦！」正想把林美香打發走的龍敢威想起她剛剛的話，「你話Philip仔家下玩推銷佢老豆？」


「係啊！搞到宋瑞輝勁尷尬，次次來都要講對唔住。難得嘅係大小姐居然冇阻止Philip仔來搞搞震，明明佢之前唔中意Philip仔成日過來㗎？」對於龍力蓮前後的轉變，林美香就是想破腦袋也無法弄明白。


「咁宋瑞輝對阿蓮冇意思吖嘛！不過佢都唔錯，起碼好過嗰隻金城安同成日痴住阿蓮嘅Jacky。」






「吓？佢有個仔㗎喎！」


「總好過一個變態同一個唔肯為咗我嗰女放棄家族嘅鵪鶉嘅，我睇佢似乎幾乖，陳Sir之前幫手查嘅資料顯示佢都幾乾淨，而且Philip仔咁得人中意，冇所謂啦！你得閒幫我探下宋瑞輝嘅口風，睇下佢接唔接受入贅呢樣嘢。」把宋瑞輝作為後備女婿的事情居然就這麼兒戲地定下了，林美香開始想像龍力蓮知道這事後的反應。