愛回家之傷心速遞？！: 第七章 龍力王的算計

深夜，龍家二少的房子仍燈火通明，他在等候一個人。隨着客廳的大鐘被敲擊了兩下，一個全身包裹得嚴實的人才敲響他的大門。


「點解咁夜先來到？」等得快睡着的吳家聰不滿地問道。


「咁我要等博思訓咗至出得門吖嘛！今晚有波睇，佢好夜先訓啊！」脫掉偽裝的林美香拿出一份資料遞給龍力王，接着隨意地坐在客廳的沙發上，顯然不是第一次光顧龍力王的家。


龍力王皺着眉頭看完資料後，嚴肅地看向林美香，「爸爸真係話想宋瑞輝做佢女婿？」他手中的資料赫然是關於自己姐姐這一個月的記載。






「嗱！大龍生嘅原話係『你daddy就唔同啦！』，佢絕對冇開聲話叫宋瑞輝做佢女婿㗎！」


「睇來宋瑞輝唔簡單，用個仔就搞點咗你爸爸。」接過資料研究的吳家聰低着頭回應道。


「哼！爸爸只不過想有人陪佢斗地主啫，真係要佢嫁女，唔係咁簡單嘅。係啦！Mandy，何家嗰邊有咩動靜？」龍力王揚了揚手，示意暫時不討論宋瑞輝。






「呢幾日，何三少都冇任何表示，反而何二少日日都有派人送花來畀大小姐！」林美香如實報導。


「咁搞笑？個細佬要靠大佬幫手追女仔呀？只不過點解會係用個哥嘅名義，而唔係自己呢？」吳家聰十分不解。


「何恭梓先係何家背後真正嘅話事人，家姐果然冇令我失望。」龍力王非常開心，看到吳家聰開口想問什麼，他打斷了對方，「舅父你唔好理咁多啦！外婆生得你咁英俊，唔係要你來做唸嘢咁粗重嘅功夫㗎！」






吳家聰感到很氣餒，他不是第一次感到自己與外甥之間的距離。龍力王的智商太高，以至於他常跟不上對方的思維，也正因此，他對外甥的某些行徑感到擔憂。「其實你為乜要同呢班有黑社會背景嘅人打交道啊？你究竟想做咩，你唔係仲唸住同魏德信鬥啊？喂！佢家下搞毒品啊！唔通你又要跟住搞呀？你堂堂龍家二少來㗎！」


無視舅父的喋喋不休，龍力王把林美香打發走。他無法向舅父多做解釋，因很多事情他也仍未看清。他常常覺得自己被困在一個迷宮裏，周圍的濃霧讓他摸不清方向，他只能跌跌撞撞地向四周探索。為了找到出口，即使要頭破血流，也在所不惜。