轉生異世界的香港家庭

星期日嘅早上，小社區裏唯一嘅茶樓理所當然滿哂座。而喺人聲沸騰嘅茶樓內其中一張四人枱中坐左一家人，六十來歲嘅父母同二三十歲嘅兄妹。全家人都邊低頭滑手機邊飲茶食點心，但四個人都用手機做緊唔同嘅野，大哥喺度玩偽LOL，細妹玩緊育成大叔，老母就玩candy crush，而唔打機嘅老豆就睇緊蘋果動。

「嘩！樓價又升喇！達仔你仲唔買樓仲點娶老婆啊？」地中海嘅老豆托左一托副老花眼鏡，用比平時大嘅聲量說，深怕比背景人聲蓋過。
「咪煩啦！打緊機啊！打埋呢鋪先講啦！」達仔拉左一拉頂cap帽，繼續沉醉喺手機游戲之中。
「暫停先咪得囉，咁緊張做咩啊？係啊！你兩個陣間記住比家用啊！」老母放低手上電話（應該係冇哂心心），斥責兩個仔女。
「你地啊，應承左今年帶阿爸阿媽去旅行架，而家唔去，遲啲冇機會去架喇，人地隔離屋林太個仔請左阿林生林太去歐旅兩個禮拜啊，你睇下你地丫。」老母講完就即刻托腮嘆氣，入戲十分。達仔同阿妹抬頭互相望左一望，做左個無奈笑容，兩人繼續機不離手。

佢地萬萬都估唔到，自己即將會去到比歐洲仲遙遠嘅地方。