三國江湖: 第40章 三人主義
P.117
唐周手下突然說，有一個男人從廣西載了一批軍火來，這是兩年前唐周訂購的機關鎗和手榴彈。
該貨車司機下車，一個約二十出頭的男子身材高大，玉樹臨風，外貌俊朗氣宇軒昂，一身王者風範！這個人一眼就可看出是人海中的主角，王中之王！他穿了一件黑皮西裝，相當帥氣。張飛是認識的，還打過交，他是香港唯一的雙花紅棍Kenny！
他本來是和英堂坐館，當了一個月後就無故失蹤，原來到了大陸發展，還搞軍火買賣，買家剛好就是唐周。本身Kenny和張飛已有牙齒印，雖未至於深仇大恨，但這種情況，相遇多不是好事。張飛就裝作不認識他，繼續觀察，靜觀其變。
Kenny一進門口兩個黃巾左右各一支鎗指着他，再在Kenny背後搜出一支曲尺手鎗拿走。
Kenny：［你就係唐周，咩你要咁樣同人做生意架？］
唐周：［姑爺文叫你嚟同我做交易，佢除非同你有仇，一係就係你自己戇撚鳩，上次條仆街搞我老婆，我知道咗嘈起上嚟我老婆搞到去跳樓，而家癱咗仲喺醫院。］
Kenny：［你唔好喺度嚇鬼！你同佢有咩屎忽數，屎忽關係我就唔知，只不過我之前同佢拍住撈嘢，而家由我接。佢咁即係擺我上枱，佢當初搞你老婆你有種就應該隊冧佢。出得嚟行最緊要恩怨分明，清清楚楚！］
唐周拿起鎗向Kenny連發五鎗：［收聲啦！仆街！］鎗聲過後他沒事，他淡定得不像一個正常人。背後牆上有五個子彈洞，剛好圍著他頭打了一個半圓形，好險呀！近看Kenny額頭在標冷汗！
唐周用鎗指住Kenny頭：［我就睇下你有幾唔驚死？］
Kenny：［驚！我驚我死得不明不白，要死都等埋你跟姑爺文兩個落咗地府，狗咬狗骨我先死。出得嚟行，預咗有日擺橫！］
唐周：［ 你信唔信我而家拍咗你喇？］
Kenny：［你又信唔信我死咗，出面啲軍火會好快爆炸。我裝咗個計時炸彈十分鐘就爆！你哋全部都要死，咁多人陪我，怕咩呀？嚟啦！開鎗呀！如果你覺得隊冧我，唔怕益咗條死鬼姑爺文嘅，你殺咗我囉！］
Kenny突然發難捉住唐周的手一扭，動作飛快搶鎗，反指著唐周頭部：［屌你老味！又話拍低我，講就兇狠做就碌撚。冚辦爛咪撚郁呀，郁親打爆佢個頭！］
唐周：［你知唔知支鎗冇子彈呀？］
Kenny不為所動：［你大我呀？係咪要試下先？］
唐周：［打死我你唔怕益咗姑爺文條早死仔呀？打死我你都走唔甩啦。］
Kenny：［聽你咁講，支鎗肯定仲有子彈啦，打死你就算冇用，起碼走唔甩都攞返個尾彩呀！］
唐周笑着拍掌：［你好嘢呀！細佬有種呀！我哋傾返生意。］關羽和張飛在房內，見他倆坐下密勘交易細節 。抽了幾支煙時間，Kenny不斷望向關羽張飛那邊，看來有了共識，跟著和唐周指向他兩人。
Kenny：［錢我可以唔要，我要佢兩個。］
唐周：［你有冇本事幫我運啲軍火去香港？］
Kenny：［可以呀！］唐周揮手示意手下向兩人打開繩索。才剛鬆開了少少，正以為兩人有救時，唐周突然一手按著Kenny肩膊，一聲令下：［同我殺咗佢兩個！］唐周做法合理，解開兩人，三人可能聯手，到時他們死了，錢和軍火一樣沒有，怪不得錢也不要只要人，三人有可能早已認識的。
P.118
一名黃巾舉手正向關羽開鎗，Kenny飛快用手撥開唐周再用腳踢開他，另一手捉着黃巾的持鎗手，砰！一聲子彈打歪了，救了關羽一命。Kenny扯直黃巾的持鎗手，自己另一隻手向他手踭一打，一手相反方向大力屈曲，卡！一聲，他手踭甩骹。Kenny手執他的鎗，向張飛方向開鎗，砰！砰！連開兩鎗，原來有人想殺張飛。再向前面黃巾連開三鎗，幾個黃巾被打傷。沒子彈了！眼前剩下五個黃巾和唐周，情況依然危急！
當下不容细想，擒賊先擒王Kenny以一對六，他跳起雙飛腳踢唐周，唐周一檔，Kenny一腳落地，另一腳再起飛膝重重打中他的下巴飛開。其他人一湧而上，Kenny衝前進攻，以一對五大家互有攻守，對手是黄巾Kenny竟然稍為上風。好厲害！他出腳快而準，是跆拳道。有人說跆拳道這功夫，不利真實格鬥，其實任何門派功夫本身沒有強弱之分，重點在於使用者的修為，單純以腳法之華麗姿勢，他甚至在關羽和張飛之上，以前一定下了不少苦工。
有兩個黄巾樸前，Kenny用上掃堂腿，重重掃低兩名黃巾，再前面又有個黃巾持刀撲殺他，他後發先至一記飛腿直蹬其頭部，就將眼前這個體型大，身體重的黃巾打至失魂落魄。兩黃巾左右同時夾擊，Kenny側身一記虎尾腳，踢開左面一人，面前手執刀的黃巾刺向他，他一手撥開，再兩手捉着該黃巾的持刀手的前臂向内一屈，本來向前刺，變了反方向刺回自己腹部，流血倒地。
Kenny剛解決五個同時，原來唐周幸運執起地上手鎗，在遠處指著他：［咪郁！兄弟！起身同我打！］大好形勢被一支鎗逆轉。其他黃巾起來將Kenny痛打一頓，打得他魂飛魄散，滿面是血！眾人把他拉在一張書枱前，唐周大叫：［攞佢隻手出嚟！］兩名黃巾捉他的左手放在枱上，如何用力睜不開，肉隨砧板上。唐周一刀直插Kenny左手手掌，一聲慘叫！刀鋒向外，插穿手掌，如釘一樣釘在書枱！
唐周：［你老味！我睇你點樣走，你究竟係咩人？ 有錢唔要要人，你以為我咁蠢真係同你交易！無端端叫我放佢兩個，點解呀？你哋識得㗎？你一定想過我一棟？我殺咗你，唔好以為我搵唔到人幫我運嗰批軍火去香港！］ Kenny不作一聲，看見眼前這個穿皮草的惡魔咄咄逼人！自己命懸一線！唐周把手鎗插進自己褲頭前面，隨時可以拔出將自己了結，右手被兩個健碩的黃巾按着，後面還有一名持刀的，完全被包圍。
唐周：［你口硬嘛？你唔講我拍低一件先。］唐周示意後面持刀的，先把仇深似海的關羽斬首。
Kenny大叫：［唔好！有事慢慢講。］
唐周：［求我呀？我習慣啲人求我係跪喺地下度求！］Kenny面有難色，要跪！還要跪在你這人渣面前？
P.119
男兒膝下有黃金，真的要嗎？為了一個不相識的關羽跪下？這情況對於寧死不屈的關羽和張飛，是不可能發生的事。仕可殺不可辱！特別是張飛，他心想你跪了，我死了也看不起你。
唐周示意黄巾動手指嚇，刀已架在關羽頸，開始流血。Kenny就不理了，單膝跪在地上：［放過我哋！］眾人見他就範也笑起來，Kenny不服的眼神厲向唐周。
唐周：［仲未夠誠意吖！你雙膝跪啦，做咩呀，想打我呀！］
只是Kenny笑了一笑，好！我就打你！他作了一個全場人都估不到的驚人舉動，他連手也不要，左手向後一拉，硬生生把左手扯離釘着枱面的刀！刀就一樣插在枱上。跟著不理痛楚，飛快緊握拳頭全心全力向唐周面上送上轟轟烈烈一拳！卡！一聲！把唐周的下顎骨打甩，跟著手順勢滑落握住唐周插進褲頭的鎗，馬上扣上板機，砰！一鎗轟向唐周下陰，他那話兒從此報廢。跟著起身向右邊一撞，向右手兩個黃巾拉遠距離，手鎗飛快打向右邊兩個黃巾，即時死亡，再退後保持距離。三個黃巾持刀衝前，被Kenny一鎗一個，快而準連斃五人，可惜唐周趁亂開車走了！
好快！好鎗法！有勇有謀，而且為了顧全大局，適當時候能屈能伸。關羽張飛威猛有餘，但如果剛才換轉是他們，寧死不屈的，三人那還有命。識時務，進退有序，又以大局為重，等待良機全力出擊獲得最後勝利。放下尊嚴去取得更大的尊嚴！這方面Kenny表現得更成熟，更配做大哥！
現在黃巾前後十人全倒下，唐周逃脫，他一言不發向著關羽和張飛解開麻繩，跟著向貨倉外邊張望還有沒有伏兵。就走向唐周的軍火倉，用迷你相機拍了幾張照片，倉庫中有張寫字枱，枱上有一部電腦。Kenny打開電腦，從西裝袋拿出記憶体，他要從電腦下載，唐周的軍火買賣和存貨紀錄。
Kenny相當心急，他知道有一個高大身影行近也不理。那人用鎗指著他的頭！是張飛：［你係乜人？］Kenny只望了他一眼，就自顧望著電腦不斷用滑鼠去按，完全不放張飛在眼內。他在賭張飛未了解他前，不會貿然開鎗。
重傷的關羽慢慢步出說話：［阿飛！放低鎗，有事慢慢講，係佢救咗我哋。］這個叫Kenny是和英堂龍頭大佬，他剛才的持鎗手法，並不是普通古惑仔或賊匪懂得的，必定和關羽張飛一樣，受過最頂尖特種部隊訓練，身份可疑。
張飛：［你救我哋有咩目的，唔好迫我開鎗呀！］
Kenny突然從後腰拔鎗向著張飛開鎗，出手好快！張飛也同時開鎗！砰！砰！
張飛絲毫不損，Kenny肩膊被子彈擦傷，他一手握傷口，手垂下流血。後面有一個男人倒下，中正額頭即時死亡！剛才是Kenny先開鎗，張飛才開，Kenny就打中目標，而且是打死人。張飛原來背後還有一個黃巾未死，剛從門口持鎗走出來，目標是張飛，他第二次救了張飛。由於Kenny似要開鎗打張飛，於是張飛因誤會便開鎗。張飛雖然刻意手下留情只打肩膀，但也深感內疚。
P.120
張飛放下鎗連聲對不起，幫他包紮傷口，關羽手持鎗偵察外圍後，再去看黃巾是否完全死亡。為他們護法，幸好張飛準確地刻意用子彈擦過Kenny肩膀，用力按壓下止血包紮。同時電腦檔案亦完成下載。
Kenny終於開口：［關羽你好！我係香港人我叫Kenny。你啲事我都好清楚，而家我已經掌握張角同唐周嘅犯罪證據，佢哋啲私買軍火數量龐大，而且仲有大量迷你液體炸藥，加埋足以炸平半個九龍。佢一部份打算運落香港，你都知鄧大人兩個月後會南巡，佢哋好可能等鄧大人嚟到搞政變，甚至有機會用炸藥以廣東或者香港作威脅，萬一失敗香港都可以成為佢哋嘅退路。如果我哋合作，以你手上張角嘅情報，再有你幫手我哋生摛張角救鄧大人，加埋我手上啲證據直接交畀鄧大人，就好似去咗北京上訪伸冤一樣，張角肯定玩完，香港有救。張角衰咗而你做過嘅嘢都死無對證，你要殺佢都變得名正言順，出師有名。］
關羽的確沒有選擇餘地，就算手持張角的罪證，報警也沒用，在廣東官商軍政教，有誰不是張角的人，隨時原告變被告。
現在每天新聞報導，都必會報導前國寶運動員關羽在廣州和張寶命案有關失了蹤。廣東政府以傳媒發放消息，尋找關羽有高昂賞金，全國全民皆變成狗仔隊，若果關羽被擒，就會遭到秘密處決。不以通緝犯名義，這舉動也是免北京難堪，中央培訓出國寶關羽，如果輪為連環殺手被鎗斃，國家顏面何存。現時全民追蹤，黃巾追殺，實際已經和通緝犯沒分別。但關羽也沒有即時答應，他和張飛一樣未確實Kenny的身份，不會答應任何事情。
至於張飛對於剛才Kenny的大計劃，他好像只叫關羽，只重視關羽？就連看自己一眼也費事。我的能力不下於關羽，是看不起我嗎？你這傢伙盲了眼嗎？他竟然不打算拉攏自己？跑慣江湖的張飛，明知這是心理戰，但知道又如何？心中依然極不是味兒。
越想越怒！在地上執了一把刀就叫：［Kenny你救咗我，我張飛唔想欠你嘅，我還番一刀畀你！］就向自己手臂直插。其實自己在賭，到到底有無人阻止自己，Kenny出手了，一手截著張飛的刀：［張飛！你想還番畀我，幫我做嘢咪得囉。］
表面上是張飛逼他開口，實際上是中了Kenny的計，因為Kenny是故意的。關羽就沒有選擇，而且行動切合他的路線，說服他容易。只要能說服關羽，張飛自然會跟來，還可以順便消消張飛的氣燄。如果先說服張飛，成功的話關羽同樣會跟來，但和他曾有過節，難度甚高，一個搞不好關羽也會跑掉，自己的秘密計劃亦因此曝光，所以這次游說是不能有失敗餘地。
其實Kenny這次在交易前，從廣東的流氓得知，有兩人被唐周捕獲，Kenny原來打算生擒唐周，再取罪證。也估計兩人是剛跳崖的關羽和他朋友張飛，真幸運真的是他們。於是故意將交易時間拖延到今天。只要能順道救走，欠下自己人情，再有明確計劃再作游說，就有機會成功。如得到兩大神人幫助，這個九死一生危險計劃，就由零可能變成有可能。Kenny算得好準，意外的是過程他受了重傷。
張飛又再挑戰Kenny：［我哋唔清楚你真正身份，我哋唔會幫你！再有意義嘅事都好，只要應承你做，就各安天命。但你連自己身份都未講，保持神秘，邊個唔會懷疑係個騙局？］
P.121
Kenny：［好我講！就算你哋聽完反口唔做都好，當係報答我救命之恩。應承我幫我保守呢個秘密，有事唔係我死咁簡單，全香港好多人，都可能會畀張角炸死！我信你兩個係君子，我唔會睇錯人！我係臥底，皇家香港警察飛虎隊總督察，我真名叫劉備！］
兩人心頭一震，但答案好合理。張飛：［你直屬上司係邊個？］
劉備：［我做臥底，我嘅臥底上司唔可以講，咁會影響大家安全。我未執行臥底任務前，上司係而家嘅高級警司盧植，佢亦都係我以前飛虎隊嘅教官。］
張飛：［盧植我識佢，我啱啱坐正嗰陣，佢逗過我。講多啲你以前喺警察部嘅嘢聽下。］劉備於是講述他認識的幾位督察名字，和以前破了什麼案件。
一輪故事後張飛肯定他身份：［好！我信你真係警察，你知我係洪飛社管理人，你就擺明話係臥底，社團最憎二五仔，我點知你係咪戙我，再講！有冇諗過傾唔掂數，我即場喺度拍低你！］這時張飛邊說邊拿起鎗用布抹鎗身，火藥味濃！
劉備：［張飛，你放心！我嘅目標唔係你，我埋姑爺文身，起初係要查佢私運毒品，我已經破咗案。但係後尾原來佢仲私賣軍火俾唐周，我冇理由唔跟埋落去。老實講，我救你兩個同時都好希望你哋幫手，我之前個臥底上司死咗，新嗰個我冇應承同佢做嘢亦都冇會過面，所以我身份都係同你一樣係古惑仔，我亦都預咗成世要做古惑仔。
我唔可以用警察身份去請國際刑警幫手，就算我係古惑仔唔代表想睇到香港畀張角炸開一忽，盜亦有道。黑社會都唔一定每一個都係壞人，我相信張飛你諗法同我一樣。我知你張飛嗰條Line冇掂毒品同嚴重罪行，所以我都希望你呢個坐館可以繼續做落去，靠你去維持黑暗秩序，你係好人！就算你係黑社會，只要憑良心去做事，你就係好人！好人唔會見到嚴會壞事發生而唔去阻止。］
這番話的確打動張飛，他的眼角閃過一絲淚光，是最後那幾句憑良心做事的好人，令他想起亡妻的遺言。其實劉備早看穿張飛想參與行動，張飛邪中帶正，骨子裏有著一股俠氣，只可惜出於污泥，英雄情懷無處施展！好！打妖怪救世人！哪怕刀山火海槍林彈雨！但雙方合作張飛需要贏得尊重，他己經得到，再說就是交代細節。
張飛：［你起碼要說服我，我就畀機會你。但好醜我都係一幫之主，要聽命一個已經表明身份嘅二五仔警察，話去救香港救國家，超人打怪獸救地球喎，我古惑仔嚟㗎嘛！荒謬啲啩！如果唔知箇中原因，真係人唔笑狗都吠！］
劉備：［ 我知古惑仔做親嘢都要出師有名，放心！我唔會白使人，咁你當係一盤生意咁去做囉！如果呢單嘢成功，警察部會批大概七位數字以上嘅花紅。我雖然知道你老哥大把錢唔志在，等一陣間我會講我身份同出生。我會有好多生意畀你做，絕對多過你成個洪飛社嘅總和。只要有生意做，先有生錢番，你先養得起啲兄弟夥記，呢啲先係你想要，一陣我慢慢講你聽。］
張飛笑說：［就算係！得嗰九三友想炒起人哋千軍萬馬同背後利益集團，會唔會太天真太幼稚呢？雖然係咁，不過我鍾意喎！我嘅人生正正係啲小子成長橋，橋段必定會有以下犯上呢個環節喇，咁我跟番劇情走啫！］
劉備：［冇撚有錯，態度正確！做大事就要有呢一份天真！呢啲就係人類進步嘅動力。一百年前啲人話人類會飛都好天真啦，結果月球都去埋。你唔敢去想唔敢去做，人類重停留喺石器時代揼緊石仔呀。今次任務係危險啲，唔可以力敵都可以智取啫。你睇阿關羽一個都同佢掐到尾，而家仲要有三個，呢個無敵組合去到邊都有運行呀！］
張飛：［唔好開心住，我唔知你講嘅嘢真定假，我信住兩成先，我考慮下！］ 況且任務難度極危險，有冇命使他的錢也成問題，他目光不期然落在關羽上。大家都看著關羽，等你！
關羽：［我自己都係只差一步就搞掂晒，依家搞成咁....其實我個人冇乜運，我怕連累你。］
劉備：［做人千祈唔好話自己冇運，形勢幾差幾惡劣都永遠同人講自己鴻運當頭，唔會有人鍾意同冇運嘅人合作。有咩關鍵時刻，啲人都唔敢揾你決定，你同人講我好有運，人哋就不斷咁搵你做嘢等於畀咗機會你，機會嚟多咗，亦等同有運行！］
關羽笑說：［ 有見地， 呢啲就係正能量，好！我應承你，就咁決定！］
張飛：［小羽哥，你去我去！做兄弟共同進退。］
劉傋：［錯！我哋係共同進，冇退嘅！］三人笑起來。三雙手交疊起來向下一壓，大喝一聲，同聲歡呼！目標一致，只要齊心就事成！
P.122
這三個人命運注定要走在一起！
一個雖然得到一切卻失去愛妻，人生早已失去目標，喪妻之痛令他有著自毀傾向的男人。
一個原本是國家榮耀，為了正義為了愛淪為喪妻男更落得一無所有，有如過街老鼠的通緝犯。
一個有著想不到的可怕童年，長大後又墮進另一個無間地獄，失去身份沒有明天的臥底警探。
三個失意男人在困頓中湊在一起，發出了驚天動地鬼哭神號的吶喊！誓要撥開雲霧見青天！男人在落魄失意時，就是要找回他的尊嚴！這叫作 ― 英雄本色！
只要三人聚首，就有強烈化學作用， 一鳴驚人，潛龍升天！那管面前千軍萬馬，刀山去火裏去絕不皺眉，無堅不摧，無人能擋，關關難過關關過！
出了貨倉，劉備把軍火車駛至附近村落，給錢村民用禾稈草蓋過，作長期停泊。貨倉外黄巾留下的車，找不到車匙，張飛於是找了一條鐵線就勾起車門，汽車被他很快弄著，偷車手法相當純熟，這是每個特種部隊成員也要學的事。他到村落接回劉備，就開車去關羽的地厙家養傷。張飛找來在廣東絕對可信賴的醫生朋友，來幫手治療兩人，打算養好傷再從長計議。
沿途張飛說：［劉大哥！你記唔記得你應承同我打多次交，搞掂呢壇嘢記得找數。］
劉備：［我都希望可以找到數，即係我同你都仲健在，因為今次任務，老實講九死一生。］
由於關羽當時並未認識兩人，沒有參與他們的過節。換言之他倆最後能打得成，就代表平安。那麼自己呢？這個奇怪的想法最後真令關羽劫數難逃！
劉備：［知唔知上次同你打完，你個拳打裂咗我三條肋骨。］
張飛：［你算好嘢啦，你係我第一次見仲企得返起身，第二個就係關羽。如果你肯上擂臺，應該啲杯杯碟碟都唔少。我就算贏你，最多都係十招內嘅事。］
劉備：［咪玩啦，講打我點夠你兩個南北拳王打，我有咁勁呀，就係調轉頭你搵我做嘢啦！只不過你係都要我陪你打咋！］劉備說話適當時候會坦白，應保留時會保留，三言兩語就說服兩大神人聽命於己，但又不失感情真摯，他天生就有一種魅力，能令賢能之仕追隨自己。他就像一個帝王，一站出來就散發著帝王之氣，天生的領袖！這份魅力來自兩個字 ― 道義！
這個人絕不簡單，怪不得只用一年時間，冇任何人事關係，可以由一個最基層的黑道門外漢，晉升至龍頭大佬。上位速度之快比張飛還要厲害多，這個男人到底是如何煉成的？
＜關羽篇＞完結