是咁的，照顧過我嘅護士死咗: 後記
終於喺依個半月chur完咗個一時衝動落筆嘅故事。大家放心所有依家感覺到嘅突兀同埋倉猝，係實體書都會修正過嚟。因為其實十八子醒咗之後仲有一萬字嘅內容我跳過左，直接講咗同林林嘅最後結局，將十八子醒咗嘅後日談留返係實體書上面， 依點令到結局又唔美滿之處還請大家原諒，但所有我買咗嘅伏筆都會喺後日談入面得到解答。唔經唔覺竟然寫咗13萬字，除咗工作之外仲要係呢個幾月入面寫好依個故事，同時腦入邊仲處理緊工作上60集劇集嘅故事，三個電影嘅故事，一個短片嘅故事，搞到成日唔夠訓眼又紅又腫手又痺又痛，但都終於捱過咗個，我要好多謝每一位願意留言、正皮、推文嘅讀者。真係非常非常多謝你哋，如果唔係有你哋嘅支持我，一定捱唔過呢個月。
講返創作原點，今次主要其實想講返前線醫護人員嘅現況，亦都希望盡量還原到發生咩事同埋啲政策同改善方案出咗咩問題。希望睇完故事嘅讀者會對醫護人員多一份尊重同埋包容，而唔係根本未了解佢哋嘅苦況就講一大堆批評同埋風涼嘅說話。我始終相信呢個世界只要多一啲尊重同包容的話，一定會更加溫暖同美好。我亦係因為咁先至會寫依啲同社會議題相關嘅故事。由於想儘量貼近現實所以做咗好多資料蒐集，睇咗好多關於醫護人員嘅新聞同埋香港醫療制度依家出現嘅問題，我唔想俾人話我無病呻吟同埋為咗幫醫護人員說話而特登作故仔。其實入面好多個案同埋情節都係我睇完新聞之後借用同改編而成。所以基本上故事入面睇到嘅內容都係真實發生過嘅事。此外都好多謝做緊醫護人員或者準備成為醫護人員嘅讀者願意為我提供好多第一手嘅資訊。因為有你哋提供嘅資料，我先至可以更加立體咁樣創造今次護士故嘅故事世界，非常多謝你哋。
用三個護士其實想表達嘅最主要有三點，其一為理想同控訴體制而死，其二因為工作量太多而猝死，其三係前線是醫護人員面對疫症嘅時候係我哋嘅最後一道防線，佢哋面對疫症嘅時候仍然堅守崗位盡力為香港人服務，呢種精神其實唔應該被遺忘。雖然2003年嘅沙士已經嚟我哋好遠，但我希望呢一種精神唔會被香港人所遺忘，亦都唔好忘記醫護人員其實為咗病人做咗好多嘢，而唔係指控個個都純粹為高人工而工作。
除此之外亦都好想以我嘅文字去記錄一次示威，將雨傘運動當時我見過嘅情況以自己嘅文字記錄落嚟，因為唔知將來仲有冇機會可以將社會運動嘅場面寫入去故事入面。有好多人話雨傘運動係一場失敗嘅革命，但係至少我所見到嘅係香港人為民主同自由依啲崇高嘅理想出一分力，我覺得同沙士當年為香港人努力嘅醫護人員嘅內心理念都係一樣，係想保護香港呢個地方，想香港呢個地方變得更加好。於是我用文字向當年嘅謝婉雯醫生致敬，同時向當年曾經參與雨傘運動嘅每一個香港人致敬。如果有細心留意，其實故事入面警察放催淚彈嘅時間就係當日9月28號雨傘運動警察放催淚彈嘅時間。
好少何打咁長嘅後記，因為今次呢個故實在太多感觸亦都寫得太過辛苦所以先咁多野想講。曾經有人話過香港嘅運動同革命之所以失敗係因為冇死過人，電影〈十年〉入面亦都講過依據對白，所以我嘅故事入面魏牘金就係第一個為香港社會運動而死嘅人，可以話俾大家聽，係實體書會公開嘅內容入面，就係因為金仔嘅犧牲，先會令到白色運動成功，歷史上亦將依場運動改稱白色革命。
仲有一點就係阿連依個代表港豬嘅角色，佢由批評示威者，唔了解香港時事，政治冷感，開始慢慢被阿金改變嘅過程亦都係我好想表達嘅另一個重點。即使一個唔了解社會議題嘅人，只要我哋願意慢慢去解釋同埋講清楚社會議題發生左咩事，出現咗咩問題，終有一日可以令到佢哋了解同埋企出嚟。如果金仔唔願意同阿連溝通，唔願意心平氣和咁（當然我明白有時都會燥底，故事入面嘅金仔亦都有發過脾氣）話比佢聽其實發生左咩事，阿連一定唔會有咁嘅轉變。如果真正要令香港有改變，我哋要做嘅唔係鬧嗰堆未清楚一切嘅人，而係話比佢哋聽到底發生咩事，當然有一群會對真相充耳不聞，扮瞓覺嘅人你叫唔醒。但係我相信仲有好多人其實純粹係唔清楚同唔了解發生咩事，一旦佢哋知道來龍去脈，就會多一個人加入我哋嘅陣營，好似德仔所講，我改變唔到呢個世界，但我可以去改變我身邊嘅一個人，而依個人又可以改變到佢身邊另一個人，另一個人又再改變佢身邊嘅另一個人，咁就會越嚟越多人願意為香港發聲同出力，只有聚集咁樣嘅力量先至有機會改變世界。
我知道自己嘅故事同埋書都未能夠改變世界，但係我可以慢慢逐一咁去改變我身邊嘅人，好似我媽媽本身都係一個政治冷感嘅人，而家佢終於都明白社會發生緊乜事，對社會議題嘅觸覺仲敏感過我。我知道我所講嘅說話同我嘅故事至少可以影響到一個人，而依個人又可以再影響多一個人，我哋可以做嘅就係逐一咁去改變我哋身邊嘅人，最後就會有機會改變香港。
最後嘅最後，多謝大家聽我依個講故佬講咗咁耐故事，又睇咗篇咁長又唔知講乜嘅後記。非常非常多謝你哋願意支持小弟嘅故事，唔理係由2016年開始就支持小弟嘅讀者，定係新加入嘅讀者，小弟都衷心咁多謝你哋。最後都係果句，多謝支持。書展見！