是咁的，照顧過我嘅護士死咗: 四百零七、出發

瞓醒之後，大概係下午兩點左右，媽媽為我準備咗午餐，食完我就出去。

今日嘅午餐，係餐蛋飯。我食返細個食過嘅味道，媽媽最拿手就係整餐蛋飯。

不過後來話午餐肉無益會致癌，食得多蛋又會膽固醇過高，所以愈嚟愈少煮，估唔到今日食得返。

食完飯梳洗好，就收到醫院嘅電話。媽媽聽完，面色凝重，我睇佢個樣已經知道佢收到咩消息。

「⋯⋯佢⋯⋯情況⋯⋯惡化咗⋯⋯」





我極力抑壓自己嘅情緒：「仲有希望⋯⋯只要佢捱得過惡化依幾個鐘⋯⋯肺炎病毒就會急速衰退⋯⋯仲有機會⋯⋯」

媽媽拎咗外套同袋，戴上安全眼鏡同口罩，準備出門。
臨行前，我將幅畫交畀媽媽。

「希望佢收得到⋯⋯」

「靠你喇。」

「仔，一陣萬事小心。」





「你去到醫院都係，唔好惹到菌。」

我地互相摟實，媽媽喺我額頭錫咗一啖，代表住祝福。

媽媽起程趕去醫院，而我就喺屋入面收拾細軟，電視新聞播住示威者同防暴警察對峙嘅畫面，又轉播班高官嘅發言，話唔會出動解放軍。

我將警告牌掛上心口，熄電視，離開屋企。

我去到阿連屋企個井，拍傳佢屋企門，連媽開門。





「唔好意思呀，阿連呢？」

「個衰仔話去示威吖嘛。琴晚返嚟沖完涼就話咩忍唔住，之後就出咗去喇。唉，好學唔學，學埋班搞屎棍。」又一個有待啟蒙嘅香港人，但聽到阿連走咗去示威，我覺得好欣慰。

或者我改變唔到其他唔出嚟發聲嘅香港人，但至少，我改變咗阿連。

而我知道，阿連之後一定可以改變連媽，又再多一個，多一個，再多一個，就會愈嚟愈多人，世界就會改變。

「知唔知佢去咗邊個地點？」

「無眼睇佢，無問呀。你又去呀？唔驚危險呀？你阿媽無叫你唔好去咩？」佢指一指我心口塊警告牌。

我向連媽有禮貌咁微笑：「無，佢支持我去。」





連媽聽到呆咗，或者佢依家仲未了解，但我相信，好快，佢就會明白。

我向連媽道別，就出發去參加白色運動。