是咁的，照顧過我嘅護士死咗: 三百八十四、超級肺炎爆發

就喺我同媽媽嘈到天昏地暗，公說公有理，婆說婆有理嘅時候，我地嘅鐵閘就被人用力拍打，發出低沈嘅金屬聲。
 
「金！伯母！」啪啪啪。係阿連把聲。
 
我地兩個一時休戰，我出去開門，就見到阿連成個人慌哂咁。
 
「阿金！有無睇連狗呀？」
 
「我都未買新電話。」
 




「唔好理咁多住喇，快啲同伯母落街掃貨啦。」
 
我聽到一頭霧水：「掃乜貨？」媽媽都好奇行咗埋嚟。
 
「超級肺炎爆咗喇，依家連狗討論區好多個post都講緊呀！」
 
媽媽黑人問號咁嘅樣：「咩超級肺炎呀？新聞都無報。」
 
「係囉facebook同啲網媒都無新聞出過喎。係咪連狗啲人危言聳聽咋？」
 




「唉你自己睇啦！」阿連遞咗部手機畀我。
 
我上網睇新聞，但所有官方媒體都無任何關於依種病例喺香港爆發嘅訊息。
 
不過連狗討論區已經好多人開post話有親人中咗超級肺炎，仲有幾張心口發黑嘅相，話香港已經爆發咗，但政府將所有媒體嘅報導㩒哂落嚟。
 
我頓時記起大約個幾星期之前，林林生日嗰日喺救護車上問啲救護員做咩咁攰嘅事。佢地由凌晨到朝早不停送老人家同小朋友，而個個病人都咳到出哂血，鎖骨至胸口嘅範圍發哂黑。
 
同啲相展示嘅畫面不謀而合。
 




即係⋯⋯政府個幾星期之前已經知超級肺炎傳咗入香港。
 
「頂你個肺，又好似當年沙士咁封鎖消息。」人類總是要犯同樣的錯誤，當年大陸政府將疫情消息封鎖先會導致病毒傳入香港。
 
當日大雄有提過十八子話中國有人確診超級肺炎，但之後就無哂相關新聞⋯⋯
 
今時今日估唔到連香港傳媒都被落封口令，如果唔係有唔受監管嘅討論區傳播消息，真係死咗都唔知咩事。

「係咪有人惡作劇呀？」