是咁的，照顧過我嘅護士死咗: 三百八十二、我決定

我揸住封信，全身喺度震。

又開心，又悲傷。

原來⋯⋯林林都鍾意我⋯⋯

即係我人生第一次，同一個女仔兩情相悅。可惜我同佢就差咗一日。

水煙壺店入面，店面同內室都有斷斷續續嘅低泣聲。





我盡力冷靜自己，收好林林封信，無聲咁向大家姐講多謝，就離開咗水煙壺店。

我依然未能夠咁快放低失去林林嘅傷痛，但知道佢對我嘅心意之後，多少舒服咗啲。

而且我喺林林嘅情信入面，搵到我可以為佢做啲咩。

所謂救到一個人就代表救唔到另一個人，係因為我地每個個體嘅能力都有限，喺有問題嘅體制下我地唔能夠救到、幫到所有人。

既然係咁，就應該改變體制。令醫療系統改革變成一個，就算我救唔到，佢都救得到，佢救唔到，仲有其他人救到嘅完善系統。





依家嘅白色運動已經變成有足以逼政府正視問題嘅示威力量，可以改革嘅機會就係依家。

我唔可以再留喺屋企喊，就算喊，都要去政總外面喊，至少可以增加多一個示威者。

我唔想⋯⋯依個社會再出現多一個林林同德仔，我唔想其他人都要承受我嘅痛苦。

我希望自己可以出一分力，等天上嘅林林睇到，集合大家嘅力量，就可以做到救到一個病人，同時救埋另一個病人。

我決定，參加白色運動。