是咁的，照顧過我嘅護士死咗: 三百六十六、決勝日

一陣暖流集中喺下半身，我亦同時張開眼。

朦朦朧朧之間將完好嘅左手伸入褲內，睇嚟因為被林林摟咗下就搞到春夢都發埋，我果然係個世界級青頭仔。

夢入面林林仲⋯⋯仲錫咗我一啖⋯⋯

一諗起就全身發熱，天已經光咗，距離起身返工嘅時間仲淨半個鐘。

腦入面無限重播琴晚林林摟實我同埋夢中被佢錫一啖嘅觸感。



春夢加上大清早，我終於都係輸咗畀男性本能，打咗個丁。

點知打到就嚟完事之前，左手加速嗰陣用錯力，咔一聲之後，我痛到尻都縮埋，慘叫咗出嚟。

「⋯⋯痛痛痛⋯⋯」

我約略檢查一下⋯⋯甩咗骹⋯⋯

唉，右手腕又斷骨，左膊頭又甩骹，激死⋯⋯⋯⋯咦？咪住，咁話唔定可以畀個小驚喜林林喎！



結果我打電話返公司請假，再叫埋救護車，順便帶上我嘅畫筒，心中不停哼唱自己為林林改詞嘅表白歌，確保自己唔會唱錯。

無錯，因為我唔敢再寫多次情書表白，所以我用咗另一個方式，將我想同佢講嘅說話擺入歌詞之中，希望林林聽完首歌會明白我對佢嘅感覺。

我諗林林一定會以為我正常咁行入醫院送禮物畀佢同接佢放工，我都以為會係咁，點知睇嚟會畀到個驚喜佢。

佢會發現我喺病房，而我就喺嗰度送幅畫畀佢。當然死都唔會話係因為打丁打到甩骹先入院啦，傻的嗎！

到佢放工，就請佢食飯同生日蛋糕，最後送佢返屋企，喺南山邨彩虹橋度為佢獻唱我嘅表白歌。



今日就係決勝日！魏牘金！加油呀！你得架！

今晚唔理結果係點都好，都要鼓起勇氣同林林表白！就算失敗，至少我講咗出口，唔會後悔。

無幾耐，救護車嚟到，我懷住興奮嘅心情，幻想住林林喺病房見到我嘅表情，被送入廣華醫院。