是咁的，照顧過我嘅護士死咗: 三百四十七、你太怕孤獨喇

係，人生在世永遠有選擇權，為勢所逼都仍然出污泥而不染嘅人亦唔少。

但喺大環境之下，人往往選擇委曲求全。

就算明知係錯誤，都唔會有意志力去堅持正確。

如同六七十年代嘅香港，未有廉署之前貪污盛行嘅警隊，一個警察無得唔收賄款，依個就係大環境對個體嘅摧殘。

人係群體動物，要埋堆就要同大多數人擁有類近嘅特質。





林林要融入唯一願意接納佢嘅大家姐嘅群體，就要擁有不良少女嘅特質。

當然林林可以選擇唔埋堆，咁就唔需要為自己油上暴戾嘅保護色，但同時亦意味住要繼續得自己一個。

偏偏林林最忍受唔到嘅，就係自己一個。

「嫲嫲要做野都陪唔到你，你要咁做先會有朋友架嘛，唔跟佢地一齊做，又會無哂朋友。既然係咁，就做啦，嫲嫲唔會鬧你。」

於是林林明白，點解自己每日要戴上面具返學。點解喺成班姐妹大笑嘅時候，自然會掛上相同嘅笑容。





連自己都唔自覺嘅問題，嫲嫲只係一句就講得清清楚楚。

「林林，你太怕孤獨喇。」