是咁的，照顧過我嘅護士死咗: 三百一十一、大方唔起
由於等醫生都有排等，我托住右手托得攰，十八子就會幫我托一陣。所以我嘅左手、佢嘅左右手都會輪流扶住無力嘅右手腕。
「愈嚟愈多人⋯⋯」我作為病人嘅觀感，只有愈嚟愈多人，等見醫生嘅時間愈嚟愈長。
而且眼中所見，十個有六七個都唔係香港人嚟。
「薯片。」十八子低聲叫咗我一聲。
「⋯⋯依家冷靜咗啲，其實我明你講咩。微觀嚟睇，你個林林的確唔係依度依班大陸人。但你又明唔明白我？當個大環境係咁樣，事實擺在眼前嘅時候，我會懷疑佢同唔鍾意佢⋯⋯都無可厚非。」
終於回歸到理性討論嘅層面，我諗依刻嘅我同十八子都多多少少理解到對方嘅睇法。
「就算我唔歧視大陸人都好，香港嘅醫療系統就嚟捱唔住，係事實嚟。」
「我都知係事實，但林林為香港嘅醫療系統出咗一分力，亦係事實。」
如果有為香港出力嘅人，佢地就應該受香港嘅福利保障。問題只係依家太多無貢獻嘅寄生蟲落嚟食免費餐，仲要嫌唔係自助餐。
只講本土其實好自私，但香港嘅情況實在大方唔起。