是咁的，照顧過我嘅護士死咗: 三百、合理理由

德仔嘅事終於告一段落，之後都唔會再有咩相關嘅儀式。

一個人就咁樣永遠離開。

往後嘅日子，只會存在喺我地嘅回憶之中。

我照舊同林林每隔幾日就閒話家常，得閒就傳啲得意搞笑圖畀佢。

我亦發現林林只要一返工就唔會上線，休息食飯都唔會㩒手機，唯獨佢放咗工先會回我。





往往一等就係成日，無八粒鐘以上佢都唔會得閒覆機。但林林基本上一定會回我，除非我打表情符號咁佢就唔再回。

但林林從來唔會主動搵我，唔知係太忙定係對我嘅另類拒絕呢？

「女仔對你有好感點都會主動同你開話題架。」

有啲唔使覆診嘅日子，好似今日咁，我就會借啲已約十八子喺醫院食野，但其實真正目的係鼠去骨科睇林林。

如果佢問我點解無啦啦嚟醫院，我答：「無呀得閒咪嚟見下你。」一定會嚇親佢，非親非故做乜無啦啦見佢，成個跟蹤狂咁，諗起都頭皮發麻。





我係女仔聽到都會即刻好感度大減。

但同咗十八子食飯就唔同，我有哂充分理由，可以名正言順話啱啱同朋友食完飯先順便睇下佢，成件事就舒服好多。

「唔曉講大話咩你？」

「我唔想呃林林吖嘛。」我知道人同人之間交往無可能百分百誠實，但我唔想呃佢。

講返今日，多得十八子我先入到嚟職員飯堂。





佢亦著住護士服，一邊食麵食到雪雪聲，一邊同我討論林林唔主動搵我係咩原因。