是咁的，照顧過我嘅護士死咗: 二百九十七、出色

「好彩趕得切！」一個女仔帶住男朋友跑過嚟，喺德仔相前獻花。

「你係林太？節哀順變。」

林林仍然企喺德媽面前，表情仲係咁唔友善，但眼淚已經喺佢眼眶打轉。

一個老婆婆喺屋企人嘅輔助下慢慢行過嚟，我地讓開，佢好虔誠咁合十雙掌向德仔嘅遺照唸經。

「咁偏僻架個位。」一個阿叔唔耐煩咁望住手機搵路，一抬頭先發現已經到咗目的地。





阿叔走到德仔面前三鞠躬，再轉向德媽：「你實係德仔老母喇，堅持住，有咩要幫手出聲。」

「斯遮尼吧？」一個大陸大媽，眼望望，直到見到德仔張遺照先行過嚟。

大媽下跪咁向德仔參拜，叩頭落地。大媽起身，捉住德媽隻手：「哎呀，唔巧更傷先，德寨係個巧巧嘅烏士嚟。」

「快啲啦。」又有新人加入，三個青年，向德仔鞠躬之後，送上一張大型嘅心意卡。

之後又有一對夫婦過嚟向德仔行禮，個老婆喊得仲勁過德仔啲家屬。





佢摟住德媽：「多謝你個仔⋯⋯唔係有佢發現份手術表格錯咗，我依家已經無咗對腳喇⋯⋯」

醫院嘅後巷，愈嚟愈多人，全部都係入院嘅時候，被德仔照顧過嘅病人。

一班無歧視德仔，而且由衷感激佢照顧嘅病人。

德媽嗰塊好似鐵板嘅面皮，慢慢軟化。

「林護士，多謝你照顧我，安息。」





「德哥，多得你同我傾計我先無悶死咋。」

林林嘅眼淚終於流咗出嚟。

人仍然源源不絕嘅走過嚟。

「多謝你呀德仔。」

「好彩有你。」

「林太，節哀順變。你個仔係一個好好嘅護士。」

不知不覺間，德媽嘅眼眶都開始泛紅。心底嘅悲傷被感動勾出嚟，壓制咗滿腔怒火。

「唔係架。」林林再一次重申。





我走到德仔面前，三鞠躬。

「德仔！多謝你解釋咁多醫院嘅野我知！多謝你照顧我！」

到依一刻，德媽終於忍唔住，淚水總算成功逃出眼底，流落嚟。

林林堅定咁講：「林德棠，係一個好出色嘅護士嚟。」

德媽環視在場咁多個曾經被德仔照顧過嘅人，男女老幼，一個又一個，都係嚟送德仔最後一程。

「⋯⋯衰⋯⋯仔⋯⋯」

林林輕微咁摟住德媽。





「喊啦。」

「⋯衰仔⋯嗚⋯⋯⋯」

德仔嘅遺照，依舊微笑迎人，燭火嘅光隨風晃動，將一啲啲分暖，分畀在場每個人。

最後嘅最後，德媽終於知道，佢一直覺得無出色嘅仔，到底有幾出色。