是咁的，照顧過我嘅護士死咗: 二百六十四、永遠還唔清嘅債

由於無錢請人睇住我，我連廁格都瞓過。棟塊牌喺最尾嗰格外面話維修，到時到候就入去餵奶。

「好彩你細個夠乖，唔係好喊。」

但咁嘅日子，好似永無止盡。每日瞓醒又再開始嘅無間地獄，再堅強嘅內心都會被蠶食殆盡。

「嗰陣會諗，我到底做錯乜野。愛一個人應該無錯，但偏偏就留低我一個受罪。每日都問點解，醒嘅時候問，瞓著發夢都會問。」

但點問、點諗都搵唔到答案。





痛苦嘅日子，好似一條見唔到終點嘅賽道，雖然心知欠債總有一日還得哂，但每個廿四小時都係煎熬，令嗰一日好似永遠唔會來臨咁。

「而我承認，有好大嘅部分嘅原因，係因為你。」

媽媽從來有嗰句講嗰句，叫我放棄藝術嗰陣係咁，依家亦係，誠實到令人心傷。

「點解你唔可以好似其他蘇蝦咁，正正常常呢？我心諗已經要還咁多錢，但還完之後仲有你，你無可能好返，啲醫費好似無底洞咁只會將我賺嘅錢吸乾哂。」

終於媽媽承受唔住，抱住我，走上天井，低頭望住呑噬過無數生命嘅愛民邨鬼門。





「你就好似一筆⋯⋯我永遠還唔清嘅債咁。」

聽到媽媽咁講，為我內心添上咗另一層烏雲。