是咁的，照顧過我嘅護士死咗: 二百二十五、有啲可愛

返到屋企，媽媽喺大廳食緊薯片睇電視。

佢一見到我地，尤其係濕哂嘅十八子，大吃一驚。

「哇哇哇你兩個搞咩呀？十八子，嚟嚟嚟，沖個涼先啦。」

「唔使啦伯母⋯⋯」

媽媽拉住十八子去廁所，畀埋毛巾佢：「痴線啦濕成咁一定要沖涼架。一陣感冒呀。」





十八子放棄抵抗，入咗廁所沖涼。

「你除咗啲衫畀我，我幫你乾衣先。」

十八子雪白嘅手喺廁所間穿出，將佢嘅連身裙同湖水綠色嘅胸圍底褲遞出嚟。

媽媽將衣物丟入洗衣機，較咗乾衣模式。

「你等陣下，伯母拎衫畀你著。」





媽媽去拎自己嘅衫，但發現太細件，就去咗拎我啲瞓覺衫褲。

「媽，你唔係啩？」

「咁我啲衫細件唔啱佢著吖嘛，用你嗰啲啦。」

就係咁，十八子就著住我嘅衫褲走出嚟。

由於我高過佢，所以上衣同四角褲都有啲oversize⋯⋯點講呢⋯⋯有啲可愛。