是咁的，照顧過我嘅護士死咗: 一百九十九、講大話

「講個秘密你知吖。」

林林無望我，只係好期待咁睇住頭上嘅黑色布幕。

佢唔知，我已經注視咗佢好耐。

林林嘅眼中係夜空，我嘅眼中係林林。

「我細個嗰陣，嫲嫲成日帶我嚟依度玩。」





我彷彿見到細個嗰陣，佢嫲嫲抱佢坐上拱型欄杆嘅畫面。

「有一次，嫲嫲話如果佢有一日要去好遠好遠嘅地方，佢會喺依度見我最後一次。」

嫲嫲話，動物死咗，靈魂就會去彩虹橋。佢死咗，依度就係佢嘅彩虹橋。

「後來嫲嫲走咗之後，有一段好長嘅時間，我好唔開心，晚晚落嚟依度，自己一個呆坐。」

一直，一直都係自己一個。





佢呆呆咁等，因為嫲嫲同佢講過，依度係佢嘅彩虹橋，佢一定會返嚟見林林最後一面。

講大話。

人死咗之後，會過奈何橋，唔係彩虹橋。