是咁的，照顧過我嘅護士死咗: 一百六十五、德仔，你真係男人嚟
「你同大籮一齊做過野就會知幾難頂。我發誓自己上咗去之後，絕對唔會變成好似佢咁嘅老屎忽。」
德仔講起自己嘅夢想，平時無神嘅雙眼好似射出金光，死蛇爛鱔咁嘅背脊亦挺到直一直。
「大佬，我地做醫護嘅已經日日面對生離死別，仲要被一大堆病人同家屬發洩，點解大家同事之間做野唔可以多份尊重呢？點解一定要狗眼看登記護士低呢？點解成日鬧到人喊呢？」
德仔望一望手錶，佢差唔多時間要返去。
「大家都係做護士，都好清楚係幾辛苦。既然有痛苦嘅共鳴，咁多一份理解唔係好難啫？但其實唔止我地嘅大籮，其他科嘅老屎忽數量都唔少。」
佢停一停，堅定咁望住我：「我知道就算我一個做咗阿爺都改變唔到大環境，但如果我令到成隊同事都做得開心，佢地又視我為目標，咁以後就可能再多幾個想成為好阿爺好sister嘅護士。之後佢地又各自成為另一班新護士嘅目標，咁就會慢慢變得愈嚟愈好。」
依一刻，我覺得德仔佢，前所未有咁man。
「我知自己力量好小，但我想改變一啲野。依個就係我留喺公立醫院嘅理由。」
德仔，你真係男人嚟。