是咁的，照顧過我嘅護士死咗: 一百一十九、愛嘅表現？
當然清潔姐姐唔係討厭屎尿，而係屙屎尿嘅人。
因為亂咁屙背後嘅訊息就係依班人無公德心。
久而久之清潔姐姐心中，「大陸人無公德心」依個形象就會深深植根。
至於做孤兒院嘅十八子唔係見屎尿，而係被遺棄嘅bb仔，佢所解讀嘅背後訊息就更加深入，會由心討厭大陸人都係無可厚非。
「但會唔會⋯⋯都係愛嘅表現呢？」
十八子一聽到同佢價值觀相衝嘅意見，就好似啲貓咁弓起背脊。
「你諗下，如果依啲bb喺大陸出世，唔使問都知死亡率會高過留喺香港。」
「咁唔通你覺得抛棄係啱架咩？」