是咁的，照顧過我嘅護士死咗: 一百一十七、雙非問題
幾年前未停雙非嗰陣，大陸有好多中介公司，會幫啲孕婦搞文件落香港生仔。
「只要在港產子便能享有價值八百萬港元的福利」成為街知巷聞嘅宣傳口號。
作為父母邊個唔想仔女好，如果喺日本生仔就有身分證，十八子都實仆過去生，同邊個生就唔知啦。
香港嘅吸引之處在於醫療好，福利好，教育好，至少同大陸比係更加完善同有保障。
加上內地以前嘅一孩政策，生多個又罰錢又無户藉，一無户藉喺大陸就要過非人生活。無得返學無得睇醫生，失去一切公民權利。
歸根於人性嘅善，父母都好清楚無户藉嘅後果，唔會希望仔女受苦，所以落嚟生對佢地嚟講的確係對仔女最好嘅選擇。
但歸根於人性嘅惡，就係攞香港著數，用人地嘅資源幫自己養便宜仔。
香港人做父母要納稅，而雙非父母只要生完，佢地仔女就自動有福利，咁對香港人又公唔公平？