是咁的，照顧過我嘅護士死咗: 八十五、寧願唔放假

「開咗個計劃話會買返你啲假，最後鬧返你做乜賣咁多假，好野呀依啲，邊夠佢玩。」

後來醫院內部主要會安排返申請賣假嘅員工補假。

但問題係根本無時間補假。

其一係因為唔夠人而忙到本身有假放嘅日子都會被逼返多日。

講緊香港公立醫院嘅護士係要好似葉問咁打十個，夜間護士甚至係一個對廿個病人。





其二係每個護士都知自己請咗假就自然令其他人工作量大咗。

當然人不為己，天誅地滅，所以好多人都唔理得咁多，自己休息咗先算。

聽落好似好衰，但其實又唔係任何人嘅錯，只要係人就需要休息。

如果明知身體已經頂唔順仲死頂諗住幫輕同伴，結果有咩醫療事故起上嚟反而就真係害咗人。

所以為咗休息，有時都無辦法，只好增加同事嘅負擔。





不過總有啲人係寧願唔放假，都唔想增加其他人嘅負擔。

林林就係依種人。