是咁的，照顧過我嘅護士死咗: 七十二、百合花

我本身打算返課室，但我記起地下嗰層嘅木工室都有白板筆，所以就去咗嗰邊，縮短咗來回嘅時間。

拎咗白板筆想走嗰陣，腦中浮起十八子失望嘅低語。

我只係想喺道別嘅時候，會有花陪下我啫⋯⋯

依個十八子真係⋯⋯

好啦，等本毒撚氹下你啦。

我喺木工室拎咗張紙仔，喺上面畫咗朵百合花，花語係祝福你。

我攞住白板筆同畫上百合花嘅紙仔，向小花園出發。

喺學校大門櫃臺嘅阿姨叫我快啲返屋企，我話送埋花就返去，仲沾沾自喜諗緊十八子嗰個覺得我無聊但又有少少心甜嘅樣。