是咁的，照顧過我嘅護士死咗: 二十八、唔算深交
我一路都好好奇佢請假嗰個禮拜發生咗咩事，但佢一直都無同我講，叫我自己估。
本身仲以為佢仲嬲緊我唔同佢講加油，但我傳完紙仔之後佢都無話過我知。
所以直到依家我都唔知佢要做護士嘅原點同初衷係乜。
十八子係小兒科專科護士，同我一樣廿六歲，但出嚟做野首先做孤兒院，之後做過家計會，輾轉到前排就嚟咗新生嬰兒科。
雖然我地識咗好耐，但有關佢做護士同轉工嘅心路歷程，佢基本上都無同我講過。
但我知道佢做咗新生嬰兒科後，開心嘅日子多咗。
識咗十幾年，但精神上嘅交流唔係話太多（當然肉體都無，我唔會掂佢，佢都好少掂我，即係拍下膊頭都好少，因為驚我骨折）所以都唔知我同十八子算唔算深交。