是咁的，照顧過我嘅護士死咗: 十七、奪命車禍
話說骨科病房出名臭，因為唔係純粹得我依啲閉合式骨折嘅病人，仲有好多意外，有開放性傷口同開放性骨折嘅病人。
佢地嘅傷口好多時會有爛肉同甩皮嘅情況，要爛唔爛嘅臭味好獨特，一試難忘。
所以常人以為入到骨科個個都淨係戴住個龜頭套嘅想像係錯嘅，醫院同病房始終係個核突嘅地方，骨科都唔例外。
房內好幾個病人都有唔同程度嘅傷口，問完先知琴晚巴士撞車，三死二十傷。司機無死，自然要受千夫所指。如果我係司機，死咗去好過。
我上網搵新聞，全城都講緊依單奪命車禍。
聽講個司機連日工作十三粒鐘，所以事發嗰陣作出錯誤駕駛判斷，先引致悲劇發生。
留言區指責司機不得好死，好心做咗咁多粒鐘就休息下，咁嘅司機真係累人累物⋯⋯
人都好似習慣咗要搵出一個承擔惡果嘅壞人，相反就對大機構大公司好寬容同仁慈。