凶港: （23）大結局[下］
一入到去內室，只見一大塊螢幕，同一大堆控制器材。
女神BB同我觀察住螢幕上顯示嘅野，阿鋒就去搵有用嘅資料。
螢幕上顯示住嘅係世界地圖，有天譴會嘅地方就會以黑點標示，而佢地「核心地」就會以藍點表示... 「你睇，果d地方點解隔離會有個骨頭符號嘅...？」女神BB好奇問。
我再睇，只見地圖上極大部分地方都已經被標示咗一個骨頭。
阿鋒望向螢幕，大驚：「唔係掛？」 「乜事？」我問。
阿鋒攞起一本書，打開其中一頁，指住一個地方，我望一望。
噢！
原來骨頭符號代表果個核心地已經守唔住，俾喪屍入侵咗。
我再望螢幕，原來只得番香港，冰島同埋澳洲未陷落。
唔係掛？天譴會無預算到病毒會失控？
突然間螢幕閃現，取而代之係Paolo嘅即時通訊畫面。 「算你好彩，死𡃁仔！」佢切齒。
我冷笑一下，威脅Paolo：「哈哈，宜家你地班仆街嘅命運就控制喺我地手上，仲咁口響？」 「哈哈哈，宜家世界上只係得番三度地方仲有人類，你只要熄咗電源，港島上面所有人都要死，包括你阿媽！哈哈哈！」Paolo大笑不止。 「我阿媽未死？」我驚訝。
Paolo笑得更為瘋狂。令我諗起軒神。 「蠢才，依個咁好嘅籌碼，唔通真係殺咗佢？哈哈哈，你宜家會點做？」 我咬牙切齒。
女神BB過咗嚟我身邊，搖一搖頭，睇嚟佢唔想港島陷落。
阿鋒都搖頭。佢都唔希望我關閉電力。
只要我一㩒，天譴部隊會被殲滅，但係連平民... 佢地係無辜... 仲有阿媽，原來佢無事。
我無理由要害死阿媽... 我一籌莫展，心中極度掙扎... 「哈哈哈哈哈哈哈，再見啦！」Paolo再一陣狂笑，好似黎自地獄既厲鬼咁。
轟轟！
突然間，發射站嘅門爆開咗。
喪屍群衝入嚟! 「弊！」阿鋒大嗌。 「唯一一個出口都...」我心諗。
女神BB拍拍我，指住一條通往地下嘅樓梯：「阿駿...我地落去啦！」 「好！」 我地三個人即刻從樓梯跑落去地下室，偌大嘅站入面環迴住Paolo嘅笑聲。 「你地班低等人種，連拖延時間呢d手段都識破唔到。蠢材! 你阿媽一早死咗啦！哈哈，你地準備收死啦！」佢狂笑。 「屌你老母！你個仆街，收皮啦！」我咆哮。
心好難受。
原來阿媽..... 嗷呀！嗷呀！嗷呀！
喪屍繼續從樓梯上跟落嚟... 我地，仲有無出路？ ------------ 我地好快咁跑到落最底，只見有一間物資房，同一間武器房，我一個箭步就衝去物資房，阿鋒就衝去武器房。
依班喪屍竟然比普通喪屍更加快，好快就追上咗我地!
女神BB一個不慎，跌低咗喺地下。
後面嘅喪屍已經追到嚟! 「阿駿...救我...」女神太驚，雙腳乏力，無力起身。
眼見喪屍已經接近女神BB，就算係全力跑過去，都已經趕唔切... 「接住女神BB！」 只見阿鋒一個快步，抬起女神BB，一下將佢推去我身邊。
無奈，喪屍已經湧至....... 「呀！！！！！！」阿鋒痛苦慘叫，有三，四隻喪屍爬到佢身上.. 「阿鋒！！！唔好呀！！」我崩潰。
阿鋒用盡餘力大嗌：「走呀！！唔好理我！！」 我即刻扶起女神BB，入咗物資房，大力閂門... 只聽到門外嘅阿鋒不停痛苦大叫。 「阿駿...呀！！」 「我唔..呀！唔想死！」 「要生存落去！！！呀！！」 「我...地...下世...再做好兄弟...呀呀呀呀呀呀呀呀！！」 不久，佢唔再出聲... -----------
阿駿...阿駿...救我！
嗷呀..！嗷呀..！ 阿鋒...？ 阿鋒...係咪你呀？
呀！！唔好呀！！ 咔嚓，啪嚓。
我睇到阿鋒俾喪屍撕成兩塊，喪屍盡情分食阿鋒嘅身體，
救...命...
--------------- 估唔到個夢依家竟然成真，阿鋒真係命喪屍口。
我無力咁癱軟喺地，我心如刀割，連阿鋒，我嘅好兄弟...佢... 阿鋒，多謝你，你幫我救咗女神BB...同我.... 女神BB訓咗喺地下，狀甚痛苦。 「乜事...？」我問。
女神BB面有難色... 我望一望佢隻腳... 仆街！唔好！唔好呀！
只見女神BB腳上有一口咬痕，隻腳仲流緊大量嘅血... 「唔使驚，唔使驚，我喺度！」我強作冷靜，其實我已經崩潰。 「阿...駿...」女神BB慢慢變得虛弱。 「你會無事架！你會無事架！」我趕緊擁抱住女神BB。 「阿駿...我唔想死...但係...」女神BB不斷咳嗽。 「唔會！唔會！你唔會有事！」我哭泣。 「如果...我死咗...你要...你要殺咗我...」佢越來越虛弱。 「我唔準！唔準你咁講！會有解藥架！」我歇斯底里。 「我唔...想...變喪屍...你一...定要..殺咗我...」 「嗚嗚...唔...嗚嗚...唔會...我...」 我完全唔知點算。
女神BB拖住我隻手，講出咗佢一直心聲：「阿駿...其實我一直...都鍾意你...都知道你...鍾意我...但係我...又一直唔...肯承認...」 我極度崩潰，只能機械式咁安慰佢：「我知道...嗚嗚...你唔...好有事...嗚嗚」
我抱住女神BB入懷。
佢繼續講，但越嚟越虛弱：「我...同...你一齊...真係...好開心...我...愛...你」
我...我只係想你無事... 「我...嗚嗚...你...你撐住...」我語無倫次。
女神BB...慢慢癱軟.... 「呀呀呀呀呀呀呀呀呀呀呀呀！」 我淚流滿面，瘋狂大叫，
出面嘅喪屍發現咗我...開始拍門，撞門，打算衝入嚟... 我完全無力再去反抗... 女神BB漸漸起身，只見佢面無血色嘅樣，我就覺得好噁心。 「嗷呀！嗷呀！」女神BB已經屍變，作勢攻擊我... 我呆坐喺地。
我張開懷抱：「我...嗚嗚...生存...無意義啦...嗚嗚...殺咗我...」 「嗷呀！」女神BB變成嘅喪屍一個箭步衝嚟... 我合埋眼... 再見... -------------- 凌晨，晨光初現。
Davis喺晨光出嚟之前就俾Paolo槍決。
Paolo大喜。因為佢見到班市民嘅眼中嘅恐懼，同埋軟弱。
望住Davis嘅屍體，佢大笑，一腳將Davis踢落刑台。
Paolo番到辦公室，睇住螢幕上顯示嘅金山發射站情況。
喪屍已經完全包圍晒整個發射站... 有喪屍更以為螢幕上嘅Paolo係活人，對螢幕張牙舞爪........ Paolo大笑：「哈哈，宜家發射站已經有喪屍保護，無人可以阻止我地啦！哈哈哈哈，想收我皮，死𡃁仔！」 佢嘅手下都紛紛講「Forza Disater」嚟取悅佢... Paolo傻笑到流出淚水，佢知佢已經贏咗，收服番世界既計畫都可以逐步實行.. 突然間，Paolo手下發現螢幕顯示住一隻呆企住嘅喪屍，佢即刻通知Paolo。
Paolo上次一睇，隻喪屍真係呆企住喺度，唔似普通喪屍咁亂走。
Paolo奇怪：「乜事？個隻喪屍...」 隻喪屍慢慢向螢幕前嘅控制器材。
一手下突然發現隻喪屍有異樣：「長官，個隻好似唔似係喪屍窩...」 「哈！食懵你呀！唔通係人咩。」Paolo一笑置之。 「試試放大畫面...」手下放大畫面。
Paolo望清楚，原來係一個滿身血嘅人。
再睇清楚d............. 「屌！依個咪係...」Paolo終於發現。 「阻止佢！阻止佢！」佢大喊。
無錯，滿身血嘅人就係阿駿。
阿駿慢慢接近控制器材，一手㩒咗落去緊急制... Paolo終於笑唔出，因為佢知道，果個就係電力制。
剎那螢幕變黑，辦公室嘅燈都熄滅咗。
Paolo打開窗簾，只見海底隧道方向不停有喪屍湧進港島.,,?? Paolo無力咁坐低，接受喪屍已經入侵依個現實。
同時，發射站顯示屏係熄滅前，係寫住"香港"既位置顯示左一個骨頭符號... -------------- 我從發射站內室行出嚟，穿插過唔同嘅喪屍。
我已經麻木。
我已經唔再係一個「人」... 我慢慢沿山路走到獅子山。
我登上咗獅子山，遠眺港島嘅情況。
一陣又一陣嘅濃煙冒出，爆炸聲始起彼落... 我坐係獅子山嘅山頂，望住天上嘅太陽。
太陽好似喺度嘲諷緊我嘅渺小... 「各位，我仲生存...」我呢喃。 ---------------- 當我俾女神BB攻擊嘅時候，我已經有必死嘅決心。 「我唔...想...變喪屍...你一...定要..殺咗我...」 女神BB嘅遺願就係唔想變喪屍，但係我竟然做唔到... 「唔好呀！」我大嗌，一下撥開已經變成喪屍既女神BB。
我隨手喺物資房攞起一箱食物。
望住女神BB嘅樣，蒼白如雪。
望住女神BB嘅眼，雙目無神。
佢已經唔係女神BB... 我要幫咁多位報仇！
我一定要生存落去！
BB。。。委屈你。。。。 我愛你！
我一下將箱壓落去佢嘅頭部... 我將屍血搽喺身上... 而啱啱好，門外嘅喪屍奪門而入... 喪屍當然見我唔到... 天譴會，你地準備受天譴... --------------- 諗到依度，我就好攰。
我合埋眼，回憶往事。
由爆發屍變，喺學校逃跑出黎想北上搵救兵等，過程一一都深刻記喺我腦入面... 阿鋒，Tony仔，阿龍，華姐，我地仲會唔會再見？
阿媽，你要喺天上同阿爸好好生活...唔使擔心我... 女神BB，無論如何，我都一樣會愛你，你要好好喺天看顧住我... 我要好好生存落去，唔好辜負佢地對我嘅期望... 陽光好猛烈。
我睜開眼，面對眼前嘅可怕現實... --------- 兩年後 「我叫阿駿，我已經19歲，但係我得到嘅生活，唔係一個19歲嘅青年應該有嘅生活。
雖然我仲係生存緊，但係我嘅行為已經同喪屍無異。
我搽上屍血，經常混入屍群，跟住喪屍踱步。
我間中睇下有無其他倖存者，但係，一個都無... 全港都充斥住喪屍。當然，世界各地都淪陷咗，人類已無機會再重建文明。
我閒時都有番金山發射站。只見螢幕顯示
澳洲都陷落埋，依家只剩低冰島... 我猜想，冰島上嘅人應該就係人類最後嘅希望啦... 我又落去物資室，見到個一具無頭嘅屍體。
我會不自禁落淚... 我想番去舊陣時嘅良辰美景... 個陣仲日日抱怨讀書苦，讀書只為入大學，點知經歷完依一切，先識得珍惜曾經擁有嘅機會... 但係我唔會放棄，一定仲有希望，我等緊人類嘅再次崛起...」 我寫低最後呢段文字，將紙釘喺牆上，慢慢離開個幅牆，我地學校嘅個幅四面牆... 我再次搽上新嘅屍血，繼續喺「凶港」掙扎求生。