凶港: （19）
我苦思對策，但係依間房真係滴水不漏，好難走得甩... 女神BB睇落好驚，身體不停係度震。
阿鋒都心急，好想搵到出路。
唔通我地真係要死喺度？仲要咁樣死？ 「阿媽，阿爸，我地唔好咁樣啦...」門外傳嚟一把溫柔嘅女仔聲，應該係佢地既女。 「細路女唔好理咁多野！」男人怒道。 「呀女你唔好咁擔心啦，食咗先...」婦人安慰道。 「但係......」女孩躊躇。 「唔食就番房！」男人大喝。
跟住就係一片安靜，睇嚟個女仔好驚佢嘅父母。 「你聽唔聽到呀？」阿鋒問我。 「聽到...」我點頭。
阿鋒同我諗緊同一樣野。
個女仔係我地逃離毒掌嘅關鍵。
我極力掙扎，但係繩綁得好緊。 「阿鋒，郁一郁過嚟...」我細細聲向阿鋒講。
阿鋒點頭，慢慢挪動緊過嚟。
突然間房外傳出一陣急促嘅腳步聲。 「老婆我地去捉果兩個人！」男人大喊。 「快啦老公！」婦人急道。
我地被嚇呆，差d俾佢地發現我地掙脫。
腳步聲停咗，睇嚟個對變態夫婦出咗木屋外，我地度房門亦隨之打開咗。 「...哎，你地...靜d啦...」原來係果個女仔，佢睇落應該只有七、八歲。 「妹妹，不如你過嚟幫我鬆綁啦...好唔好？」女神BB溫柔地對女孩說。
原來女神BB都明白我地嘅意思，好配合咁問咗個女仔。 「唔...得架...爸爸媽媽會打死我架...」女孩心虛。 「你幫咗我地先啦...」我打蛇隨棍上。 「但係...點鬆...？我唔識解結架...」女孩猶豫。 「攞你媽媽把刀嚟啦...」我建議。 「係呀妹妹，幫下我地...」阿鋒接龍。
個女仔猶疑咗兩秒，轉身就離開咗間房。
十幾秒後，佢就將個把沾有血鏽跡，睇落唔太鋒利嘅開山刀攞咗入嚟。 「妹妹，幫我切開條繩啦！」我隨即喊道。 「哦...」 個女仔嘅惻隱之心睇嚟仲未俾依個瘋狂世界磨蝕... 佢用佢瘦弱嘅手，攞起把刀，慢慢切開咗我條繩。
呼，終於鬆綁啦。
我即刻拿起女仔手上嘅開山刀，幫阿鋒同女神BB切開繩索
突然間，大廳傳嚟兩把聲。 「唉，咁都俾個兩條友走甩...」男人不忿。 「唯有食住前日條𡃁仔先啦...」婦人回應。 「阿女，出嚟啦！」男人大喊。
弊！對變態夫婦番咗嚟！
我加快速度切開兩人嘅繩索！ 「阿女！」男人不耐煩地大喊。
死啦！快d啦！ 「喂，度門開咗嘅？」婦人驚異。 「快啦阿駿！」阿鋒催促。 「喂！阿女！你...！」個男人已經企咗喺房門，佢雙目怒瞪住我地。
Shit！
我雙腳不斷喺度震... 我從未試過咁驚... 與此同時，兩人嘅繩索已經切開咗。 「你...你...你唔好埋嚟！」我用開山刀指住個男人，歇斯底里咁大叫。
男人慢慢逼近，並質問女仔：「不肖女，你點解要咁做！」 「爸爸，我....」女孩無助咁望住我地。 「衰女，無撚用呀你！」男人惱羞成怒。
男人一拳打落女仔塊臉度，女仔倒地，掩住半邊面流淚。 「你...你唔好過嚟！我斬你架！」我繼續大叫。
阿鋒係房中攞起地下嘅衫，充當武器。
婦人亦同時入房，手上揸住個支大棍，向住我地咆哮：「你班死仆街，今晚我要食晒你地！」 男人同女人慢慢逼近我地，我揸住開山刀亂舞。
但係佢地都係好似唔怕，繼續逼近!
此情此景，我地就好似俾兩隻喪屍圍住咁。
不過係有意識嘅喪屍！
女人攞起大棍，準備一棍打落阿鋒度。阿鋒揮舞住手上嘅衫，作出僅有嘅還擊。
眼見支棍將打出致命一擊，電光石火之間，女孩從地上撲出，幫阿鋒擋咗個一棍。
個女孩後腦即刻血如泉湧，對住阿鋒講：「哥...哥...走呀...」女孩暈咗喺地下。
婦人見狀大吃一驚，上前抱住女孩：「阿女！」佢懊惱。
我見狀即刻反擊，攞起開山刀向女人劈去：「你個仆街，食屎啦！」 「呀！」女人痛苦大叫。
刀劈落咗女人個頭度，佢即時倒地，但係開山刀唔夠鋒利，卡住咗喺個女人嘅頭骨度。
我正打算拔出開山刀嘅時候，個男人就發咗狂咁撲埋我度，我見狀即刻避開，然而佢無攻擊我，佢就抱住喺地下嘅妻少。
女人嘅頭不停流血，身體不停抽搐，睇嚟俾我斬中神經要害... 而個女仔就暈倒喺地，頭亦不停滲血... 「你個死𡃁仔！你做咗d乜！？」男人痛苦大嗌。 「俾你加餸呀屌你老味！」我回敬一句。 「仆街仔！」男人發瘋咆哮。
佢攞起地上嘅大棍，向我地展開攻勢！佢個樣猙獰到極似一隻老虎，食人嘅老虎!
我停低咗，因為我已經驚到唔識郁... 男人準備好一棍打落嚟，而我嘅身體就唔聽指示... 郁呀阿駿！避呀！
正當支棍準備打中我嘅時候，一部收音機狠狠咁飛咗落男人塊臉度。
我向收音機飛嚟嘅方向望，原來係女神BB用Tony仔部收音機拋向男人度! 「你個死𡃁妹！」男人轉而攻擊女神BB。 「唔好呀！」我身體郁番，衝向女神BB方向，
女神BB就呆咗喺度，一時唔知點算... 突然間，男人停咗喺度，我望一望，原來係個女人變咗喪屍，頭上仲插住個把開山刀，血流披面，就好似一個地獄惡魔咁，狠狠咁咬緊個男人。
男人大嗌「老婆，你做乜...？呀！唔好咬！唔好咬！」 男人被女人喪屍拖行啃食... 我見狀即刻帶住女神BB衝出房，阿鋒就抱起個女仔，四人一齊離開咗間屠房...
------------- 沙沙沙沙沙
出面再落大雨... 一離開，我地望住窗口，原來有大批喪屍喺屋外圍住，一定係啱啱嘅大吵大鬧，吸引咗佢地嚟！
阿鋒抱住女孩，手上沾滿個女孩嘅血，向我問：「點算好呀？」
「...」我沉默... 我望住窗口嘅喪屍，我地已經被大包圍，無路可走... 我無晒力，我地啱啱先脫離險境，點解要咁對我地？
屌你！ 「仆你個街！」我崩潰... ------------ 我跪咗喺地...
我無力再走... 阿龍，華姐，Mrs Wong... 我諗起佢地，我想見番佢地... 嗷呀！嗷呀！
女神BB好驚，瑟縮喺地下... 阿鋒都呆咗，佢都知我地身陷絕境... 點算好？仲有無方法走？
屍血？雨又落啦，同一招唔可以用兩次... 強攻？武器都無，點突圍？
萬念俱灰之際，一把虛弱嘅聲音發出， 「...上...上二樓...有...路...走...」