凶港: (13)

阿鋒，女神BB同華姐去咗邊？ 「喂！搵咗佢地先啦！」我急忙同阿龍講。 「佢地應該唔會走太遠嘅，搵咗份計劃出嚟先啦！」阿龍反而急住想攞到凶港計劃。 「佢地...噁...好似出咗出面...」Tony仔啱啱嘔吐完，對住我地講。

屌！出咗去出面？ 「救命呀阿駿！救我呀！」突然間，出面走廊傳嚟阿鋒嘅求救聲。

我衝出去，見到走廊左側有一大批喪屍，而阿鋒就向住我跑嚟，跑到我面前。 「屌你！女神BB同華姐呢？」我大斥。 「你女神啱啱帶咗我去間文件室度攞咗份計劃書，但係又發神經想搵個乜野Dr.Glenn，佢同華姐宜家落咗六樓...但係宜家班喪屍塞住咗條樓梯...」阿鋒說。 「走啦！班喪屍嚟緊啦！」我對住房中嘅阿龍同Tony仔大嗌。 「唔得，阿華仲喺度，點走得？」阿龍問。 「華姐同我女神BB都落咗去啦，蠢炳！」我激動咆哮。

阿龍呆咗一呆，即刻跟住我跑，而Tony仔就攞住袋物資跑。

我地急忙跑落六樓，尾隨一班猙獰嘅喪屍! 「阿華，你喺邊度呀？」阿龍向六樓方向大嗌。 「我喺度呀！」隱約聽到華姐嘅叫聲。





華姐同女神BB手上攞住兩份文件，向我地衝嚟。 「快d啦，有喪屍落緊嚟！」Tony仔警告。

我地一行人即刻跑到地下，發現地下喪屍已經走得七七八八。 「唔好理啦，跑啦！」阿龍指住大埔方向大喊。 「我地...邊度...呼呼...跑到咁快呀...」我氣喘。

阿龍：「沿途睇下有無單車啦！」 我地一直向大埔方向跑，喪屍亦開始追緊上嚟。

好攰，我地究竟會唔會無命到粉嶺... 「單車...單車呀！」阿鋒大叫。

我地睇到面前有幾部單車，車下有一大攤血，車主應該都係俾喪屍食咗... 我急忙上咗其中一架單車，再點算下，五架？我地有六個人喎...... 而女神BB同Tony仔竟然係唔熟踩單車，露出惶恐嘅表情... 「上車，我引開佢地！」阿鋒大喊。 「阿鋒，唔好！」我制止。 「去啦，阿駿，我會跟上嚟！」阿鋒冷冷咁回咗我一句。 「唔好，實有解決方法架！」我失去冷靜。





阿鋒拍拍我膊頭：「信我，我一定會跟上你地，去啦去啦！」 夕陽嘅餘暉映照住我同阿鋒... 喪屍，亦漸漸追上我地... 「阿鋒你坐！我走！我唔用單車，你用！」我歇斯底里。

阿鋒望住我，熱淚盈眶咁話：「阿駿，識到你，真係好開心，再見啦！」 阿鋒回頭向住喪屍方向跑去，務求引開喪屍，以幫我地拖延時間... 女神BB同Tony仔終於控制好單車，Tony仔亦將手上大部份嘅物資放棄以便踩單車向大埔方向駛去... 阿！鋒！

阿龍流淚，向我講：「阿駿...走啦...唔好辜負阿鋒嘅心意...」 我慢慢開始踩... 我一直開車向北嘅路，再向後望，望住阿鋒嘅身影越嚟越遠，消失得無影無蹤... 我強忍淚水... 阿鋒...好兄弟...點解？

我咆哮！ 「呀！！！！！」 廣闊嘅公路上，除咗喪屍嘅叫聲，仲有我咆哮嘅回音... ----------------- 到咗大埔，我地即刻轉路前往粉嶺... 阿龍係香港通，無路難到佢，佢即刻搵到路去粉嶺，我地一路跟住佢，

沿途喪屍追住我地... 天呀！





我唔想再受罪... 阿鋒，你係咪已經死咗？ ------------ 幾經辛苦，我地到咗大埔林村... 天已入黑，阿龍建議入村歇一歇，始終入黑好危險... 村內好靜，連狗吠聲都無。

樹俾風吹到沙沙聲，十分詭異。

村民睇嚟已經北上，去到軍隊所在地。

喪屍睇嚟未入侵依度。

我地入咗其中一間村屋，門無鎖。

我先同阿龍，Tony仔確保屋內安全，大家先進入屋內。

屋內無任何食物同食水。

Tony仔攞住僅餘嘅少量食物同食水，分俾我地每人少少... 我將食物全數俾晒女神BB。 「阿駿...你...你唔食？」女神BB問。 「...」我無胃口。 「因為阿鋒...嘅事...？」佢默然。 「...」 淚水從我雙眼流出。





我咁大個人，未試過兩三日內經歷咁多次生離死別... 離開既仲要係我最好嘅朋友。。。。 我抱頭痛哭... 眾人都唔知應該點做嚟安慰我。

Tony仔借屋外嘅月光，攞起兩份文件閱讀。

我好奇，點解有人要咁做？點解要殺晒我地？

我喊到停唔到... 「咦！？」突然Tony仔出聲。 「乜事？」華姐問。 「你地睇下...」Tony仔面露驚訝嘅表情。

阿龍同華姐都走過去睇，都露出驚訝嘅表情，好似知道咗某種陰謀咁。

我收起淚水，走過去望一望究竟係乜令到佢地咁震驚... 我攞起文件，逐行細閱... 噢！