[真人真事][愛情] 三世書不會記載的事: 19
既然知道她一整天也都會跟同學一起，我也只好閑在家裡，但一整天窩在家裡不出門又覺得不自在。
這就真的要怪她了。半年前，除非很想睡覺，我應是滴酒不沾的好孩子；半年後每晚卻都要跑落附近的便利店買一兩罐啤酒，要不根本睡不著。
想著裕民坊好像快要拆了，不如去作個留影。都市幻化的速度，就像命運一樣，變化之快令人有種捉不著的凌亂感。
從下午就在裕民坊徘徊，看著西斜的太陽，再到街燈的泛黃。反正難得來到，就把三個時段的景象收入腦中。我依然認為眼睛是最好的攝影機，腦開是最好的記憶卡。
走上通往apm的天橋，人有三急起來，去商場的廁所總好過去公廁。才一進入商場，右邊的電梯就站着一群熟眼的學生。是她的同學，探頭一看，她也在裡面。幸好戴著鴨舌帽，她們一行人都沒有發現我。
「妳去咗觀塘？」我發短訊問她。
「你點知㗎。去唱K。」
「我路過。」
「你唔好再嚇我得唔得，我依家去到邊都好驚有記者跟蹤我。」
「食得鹹魚抵得渴，呢個係妳自己攞嚟嘅。」她沒有再回覆我，也不煩她和同學的聚會。
「妳走未？」已經是十一點多，平時她已經睡覺了，但現在卻依然上線。
「就走。」
「你洗唔洗我嚟接妳。」
「唔好。我好辛苦，有同學同我一齊返。我今日先爆完。」
「爆咩？」
「我今日好想就咁一嘢沖落海就算。」
「妳如果想要人陪妳嘅話，我一定會幫妳陪妳，有咩事咪兩個人一齊頂。」
「你講得無錯啊，我係自己攞嚟賤，走去做人情婦。」
「有個人一直都無放棄過妳，係妳自己放棄妳自己。」
「我唔知可以點。我精神壓力就嚟爆煲，就算報咗出嚟，佢會有影響咩，到最後死個個又咪係我。你知唔知如果唔係你話過我自殺會更大鑊，我已經死咗啦。」
「可唔可以唔好吓吓都講呢樣。」
「唔係我可以點，我依家日日都過得好痛苦，出街都成日向後望，驚有人跟住我，你明唔明個種痛苦。」
我不知這還能說甚麼去安慰她。明明一切一切都是她自找的，但我卻覺得好像是我一手造成的。
可能我不應該阻止她去做情婦，可能我不應該騙她事情未解決，可能我當時不應該逞強，可能我不應該裝英雄，可能我不應該多管閒事，可能我應該就當作沒看見，可能我應該讓她自己送死好了。
不，我這樣和害她有甚麼分別。根本由第一秒就沒有不救她的選擇。
「其實呢，佢哋已經無諗住報。正如妳所講，一個教授婚外情真係無咩新聞價值。」
「點解唔報。」
「妳當係我個教授仲係個人，仲識得有惻隱之心，唔想睇住妳，或者可能係唔想睇住我最心愛嘅朋友要孭一個唔附合佢既罪責。」
還是坦白好了。對著她我根本連一根針也不願吞，那就更何況一千根針了。自小我就很會說謊，但要說謊是一件很痛苦的事，要每刻都想著如何把謊言編下去，那倒不如從一開始就徹底的沉默，這更符合我的性格。
這一夜少有的睡得很安穩，不需用酒精來麻醉自己。
================================================
「妳出唔出去。」不用酒精催眠自己，起來的時間都特別早。
「唔出。我好攰。」
「妳無補習咩？」
「本來我星期日要去佢到幫佢做嘢，順便佢幫我補，咁我依家都唔去得啦。」
「無事啦，唔好成日咁樣收埋自己啦。」我經歷過那段痛苦，那段黑暗，我更不希望她會經歷和我一樣的時光。
「唔會完架。無諗住報，但一日啲證據都仲係佢哋手，只要我同佢再有聯絡，就可以又再報架。」我這才想起，我從來都沒有和她說過，證據已經不存在了。
「咁妳咪唔好同佢聯絡。」
「然後要放棄埋份工？」
「工無咗咪搵過第二份。」東家唔打打西家，黃子華都有教啊。
「你以為我老豆重有俾錢我？二百蚊一個鐘，彈性工作，唔洗受氣，仲要學到經濟嘢，你搵俾我。」原來三萬蚊過夜是公道價，我到今天才知道。但當小學生補習都每小時一百五十，工作內容包括性服務時，每小時才二百…
「我唔想你暴露係危險之中。佢都無覺得自己做錯。」
「你又知佢無？」
「佢有嘅話佢唔會再同你聯絡啦。錯一次當唔小心，一時諗歪，但佢錯咗咁多次。」
「咩錯咁多次？」
「佢婚姻有問題，佢唔係去搵婚姻諮詢師解決個問題，反而選擇逃避，然後去製造更多問題，咁仲唔係錯？佢係知錯就唔會有第一段婚外情，然後仲會有第二，第三，第四。啲新問題唔會搞到佢架，但係每一個俾佢拉落水嘅人呢？佢可以大條道理話，咁佢哋貪錢姐，佢但求享樂，利益交換姐。」
「 你可唔可以收聲？你幫咗我咁多，我應該要多謝你，但你有無諗過我有幾痛。我同佢一齊係真係愛佢，就算你係我面前用盡一切方法去抵毀佢，我宜家都未放得低佢。係，佢係錯，咁可以點姐。愛一個人係盲目，你估我同佢一齊之前我唔知呢啲問題？如果兩個人之間既感情問題可以搵個婚姻諮詢師就解決到，日日唔會咁多人離婚啦。」
「我當然知道兩個人嘅問題唔係搵個婚姻諮詢師就解決到，但佢有無去解決過個問題？我只係知佢依家係逃避跟過問題。」
「你又知佢無？」
「咁既然都解決唔到，點解唔離婚。」
「當佢有個女嘅時候，仲點可能貿貿然離婚啊。我只係想講，佢係做錯，但錯在同時有幾段婚外情。」
「妳究竟要點先肯忘記佢，先肯放低佢。」
「其實我唔知佢係扮愛我定真係愛我。如果可以扮到咁出神入化，我無話可說。但我想問係，點解佢見到記者，個記者同佢打招呼，佢都重要拖住我。大家都知我無可能係佢老婆啦！」無話可說的應該是我，可以做到公然婚外情的男人，你想我還能怎樣評價他。我才疏學淺，三年幼稚園加上十二年免費教育，外加一年的大學，我可沒學過一個去形容這種人的詞語。
「因為個陣個記者唔知妳未成年囉。妳又想放低，到我講個事實出嚟妳又唔聽。」
「講真，我知佢出面有其他女人，我明佢做過啲咩，但我真係唔信佢係唔愛我。」
信了這麼多年基督教，黃神父按著她頭這麼多次都沒出事，但她現在就顯然地被芙水京落了降頭吧。
「我真係理解唔到妳，有一個對妳百份百忠誠嘅你唔信，但你繼續信一個客觀證供已經係唔愛你嘅人。」
「邊到嚟一個客觀證據姐。」
「佢同妳否認有其他婚外情個陣，佢諗咗成五秒先答。個五秒心裡面諗緊咩，自己心裡面好清楚啦。」
「我俾你搞到我好亂。」
「唔係我哋搞到你好亂，係你自己唔願意接受個事實。」
「我要見佢，我要同佢面對面問清楚。」
我第一次切身的感受到，死亡距離自己可以這麼近。如果我正和她面對面對話，或者我剛好在街上和她對話，相信不需一個星期，我心臟經常疼痛的理由就能查得出一個究竟。
甚至，假如手中的藥瓶如果再少一顆藥丸的話。
================================================
「妳放棄啦，妳所知道嘅嘢都係我同妳講嘅，況且妳都俾佢呃過一次，妳同佢單對單，妳覺得妳唔會被佢呃多次？妳自己都未識得放低佢，妳對佢仲有感情，咁就自然講咩做咩，妳都會有偏見。」
「我最憎俾人呃，就算要呃，我都要有個明白。我睇人係睇身體語言，講大話幾叻都好，都瞞唔過自己。」那是因為妳見得最多的是我，而我偏偏是一個從不敢對妳說謊的人。
「本來就係錯嘅開始，又何必要清清楚楚，平時又唔見妳咁固執？」
「我就係憎人呃我，如果佢係對我唔住，我要令佢後悔一世。」
「既然如此憎恨，咁就放低啦。」
「除非佢親口認，唔係我唔會信咩證據。我對眼就係證據，我一定要搞清楚。」
「講咩清楚姐。妳應該好明白一日妳仲愛佢，點講都唔會清楚。妳仲愛佢，妳去同佢傾，佢根本就食住妳。我更驚係你同佢傾完，佢又呃到妳，然後妳又繼續同返佢一齊。」
「咁你咪由我死，咁係我自甘墮落。」
「妳叫我點可能眼白白咁救妳出嚟，然後又睇住妳送死多次啊。」
「如果我愛一個人，我唔介意攞條命去博。佢係我心目中係點你根本就唔明。」
「我當然唔明。個個係你一廂情願嘅假象，我明嚟做咩。」
「我無咗佢之後晚晚訓唔好，我胃好痛，但心仲痛。」
「我知道妳呃我之後，我晚晚都兩罐啤酒。」
「我無咗佢我想死啊。你明唔明？」
「妳有咩要咁依賴佢。」
「如果我答你關懷同愛呢？」
所以這麼多年來我對妳做過的一切一切又是甚麼？
關懷？我又何只只是關懷。妳最痛苦的時候我一直在妳身邊。即使妳欺騙我，去做別人情婦，我知道後的第一選擇，是想去盡一切代價把你拯救，帶妳逃離這荒謬。
愛？妳應該比誰都更清楚，我比誰都更愛妳。妳做的事和一個賤婦，一個淫婦，一個蕩婦完全沒分別，我卻依然應該妳只是一事想歪，依然接納妳，依然保護妳。
還是當一切已經是恆常，就會成為理所當然？
「我敢相信，我一路以來對你嘅關懷同愛，絕對比任何人都要多，以前係，依加係，將來都係。」
「我真係好想知佢有無愛過我，你可能覺得佢好多時間，大把錢，唔洗憂，所以成日得閒陪我。但你知唔知，我補習嘅時候，傳訊息同佢講好涷，佢就攞件褸去樓下俾我，我話唔舒服，佢就拋低晒啲嘢嚟照顧我。我想知，如果唔愛，唔重視一個人可以做咁多嘢。」
「佢有架車，開車過嚟拎衫俾妳要幾多時間。妳唔舒服，佢大有藉口同妳獨處一室，點解唔照顧妳。」
「你知唔知佢應承過我，佢話如果我入到大學，五年之後就帶我走。」
對於一個國家來說，當權者只需要不時滿足人民最卑微的，最短期的願望，那就已經十分足夠。人民自自然然會將手中的一票投給他們。至於長期的願望，根本就不需要理會，因為當權者八年後就可以抹抹屁股走人。
和妳相識十多年的妳不信，但卻相信一個相識半年，激情兩月開的五年承諾。
而偏偏他早就信用破產。
================================================
「佢話想見芙水京。」縱使有千萬個不願意，但只要是她的意願，我依然會想盡辦法去幫她，就像轉校的時候一樣。
「啱啦，你上嚟見我，有啲嘢要比你聽。」
我馬上有不詳的預感。前面兩次給我聽的都不是甚麼好事，當然這次亦不會例外。
「你係咪同佢講咗個真相？」
「咩真相？」才剛走進辦公室就有問題，一時之間還未回過神來。
「我已經清理曬所有證據。」辦公桌旁放著一個行李篋，看他的裝束應該是準備出埠，或者是剛出埠回來。
「無喎，佢到依家都覺得呢件事唔會完，你哋遲早都係會報。」
「咁佢仲咁大膽？」
「咩事？」
「你覺得仲可以有咩事？佢哋又開始聯絡啦。」
「無可能喎，佢啱啱先同我講佢想見芙水京。」
「咪就係聯絡完先勾起條癮囉。」
「咁我有同佢講過你唔打算報嘅...但佢今日明明仲係好驚咁。」
「咁就難怪啦。你自己聽佢嘅語氣，妳覺得佢係咪驚。」我把斜孭袋掛在一旁的椅子上，走到教授後方，倚著他的書櫃。一定是要去旅行了，我倒是第一次看見他腳上的不是皮鞋。
完全感受不到憤怒，應該是連絲毫的憤怒感都沒有。和我說對欺騙自己的是充滿怨恨，但對著他卻是說不開心。究竟是要有多麼的厚面皮，才會敢一次又一次的不隱瞞自己賤上加賤的行為。還是她實在愚蠢得太交關，愚蠢得芙水京完全不怕對她一次又一次的暗示，玩文字遊戲？
「仲記唔記得你上次上嚟我講過咩？」教授在電腦打開一個資料夾，裡面的同容和後之前給我的光碟如出一轍。
「小心佢只係利用緊我。」忠言逆耳，但我對逆耳的說話卻十分有記性，又特別是關於她的話。
「去到依家咁你真係要好好諗吓，仲係咪要繼續幫住佢。既然佢完全無諗過要醒，你都要諗吓係時候唔再插手。」
「如果我唔插手，咁同睇住佢死又有咩分別。」
「將你對佢嘅感情放底啦，宇仔。我同你要做嘅已經做曬。」
「但要我見死不救，我根本做唔到。何況係佢。」
「咁無所謂，我知道眼白白，睇住一個自己嘅人送死係好痛苦，但呢個就係人生。仲記唔記得你個場決賽講過咩？『人生就本來應該每一步規劃好，步步為營，諗清楚，每行一步睇清自己手執住幾多本錢，然後再思索之後嘅路。』依家你手頭已經無咁多本錢再去纏擾呢件事。」教授轉過來，身體向著我前傾，語重心長的，像是一個老和尚開解一個受盡塵世煩擾的凡人。
「我聽日就要出去長駐外國一兩個月，到我番嚟你應該到去咗日本留學。我走之前先教你用呢個程式，當係俾你嘅小小心意。」教授打開那個存在光碟裡，但我一直沒有打開過的程式。「用呢個，你就知佢哋有無聯絡。」
其實啊，即使不用你給我的程式，我都能知到她是不是有和芙水京聯絡。
打開telegram，對話欄多出了一條對話。是系統自動傳發的。
「形 joined telegram」
================================================
回到家後輾轉難眠，連飯也吃不下。雖然說飯菜難嚥已是很久的事，大概就在知道她做情婦開始吧。吃不到幾口，明明知道自己也未飽，但再吃就是有作嘔的感覺。但今次卻是連一口也不想碰，完全沒有食慾。
就望著窗外的街道，家對著一條算是主要的道路，徹夜就看著車輛駛過，由初時每分鐘的十多架，到天色完全是一片死黑時，一小時也沒有一架車經過。長夜漫漫的肅靜，靜得像暴風雨來臨前，靜得讓人不寒而慄。或者是發自內心的恐懼，還是憤怒，還是嘆息，五味雜陳般打在一起。
「點解妳仲係要同佢聯絡？」接近清晨時，我忍不住傳訊息給她。
「我無嘢再解釋，我想死你由我。」
「點解妳要利用我。」
「我唔係想利用你，係我真係無咗佢唔得，我無咗佢我好辛苦…」
「點解妳無咗佢就唔得。如果妳覺得，妳唔可以無佢嘅關懷同愛，我絕對可以俾到妳。」
「我已經唔知應該點做。」
「妳好清楚，但妳唔敢做。入到大學就帶妳走，好偉大嘅承諾。妳覺得妳依家抽身，妳對唔住佢，咁佢有對得住過妳咩？妳有無諗過如果妳依加繼續同佢落去，妳對唔住嘅係每一個相信過妳嘅人，妳有無諗過妳父母，如果知道自己個女係去做情婦會點諗。」
「係啊，可能我真係好一廂情願，對唔住好多人。」
「其實由妳同我講大話個一下，妳已經對我唔住。如果我真係介意，我點解要選擇去幫妳。如果我真係嬲妳，妳亦都無所謂嘅我好想死，妳係一早已經變咗骨灰。
我鎅手，妳會喊。妳話你好憎人唔珍惜自己。我都係好憎人唔珍惜自己，特別係有得揀嘅時候。唔好令到我嘅努力，原來係助長人哋去做，我最憎見到嘅嘢，好嗎？」
「但我宜家無左佢都想死…我可以唔見佢…但你要我斷埋聯絡係我真係唔知點…」
「佢話妳入大學，等五年就帶妳走，妳有無諗過佢根本只係開空頭支票，到佢玩厭咗妳，咪一句分手。佢貪妳咩姐，未成年的青春肉體，自動送上門，乖乖聽話。如果佢到妳臨考公開試先講分手，妳會有心考咩？又或者，如果佢根本就覺得妳入唔到大學呢？」
「係，我可能係好天真，但如果係咁，我寧願等五年。」
「等五年，如果等五年妳發現佢真係只係當妳安全套，用完即棄呢？」
「咁我都只係浪費五年姐，我無損失架。」
以前經常聽老一輩勉勵後輩要勇敢往外闖，而他們最常說的話是，我們現在才二十多歲，即使浪費五年光陰，依然只是二十尾三十出頭。我萬萬想不到類似的說話今天我會再聽一次，還要是從一個年紀比我細的人出口。
無損失，我真不知她兩年多的經濟是跟誰學的，還是跟芙水京是被誤人子弟了。時間不是成本嗎？被人操上百次然後換來絕情的欺騙又不是損失嗎？還是無法量化，就不當作是成本了。
我氣得把手機往牆一扔，轉身就睡。擔心大半個月，苦口婆心的勸了一星期，我才是要說不知道應該做怎麼做的人。