恐怖蔓延令你一讀一驚心《攝魂偽術家》18+ 墮落始源: 第81章 - 攝魂術

何定邦後來將事件通報了灣仔總部，總部立即調派幾名伙記與何定邦一同前往管理處調查。從管理處的CCTV得知，下午6時45分有可疑人物接近何的車輛，並且爬入車底，那人在車輛附近工作了一段時間，似乎是在安裝一些零件，最後在晚上7時20分離開。經過初步檢查核實，車輛懷疑被安裝了觸碰式感應器，可能連接上炸彈這一類的裝置，於是何定邦馬上要求總部派出拆彈專家趕赴現場，經過一輪工夫，終於從車輛內部拆除了一枚炸彈。
「馬上連接上天眼，睇下疑犯嚮街上沿途經過的地方以及分析佢行走路線。」何定邦向伙記說。

經過灣仔總部利用天眼數據庫的資料追蹤和分析後，查出可疑人物經常往來的地方，警方派出多名探員順利將疑犯緝捕歸案。
「嚮X月X日6時45分，我地警方CHECK到你到過中環XX道停車場，嚮呢架私家車上面裝咗個電子儀器，證實係炸彈，想知你到底有乜目的？」何定邦在灣仔警署問話室把車輛照片遞給疑犯觀看。疑犯在北角經營一間汽車電子零件店。
「對唔住呀SIR，當日我自己做過乜野，我已經完全唔記得晒啦。」疑犯一臉惘然地說。
「何SIR，CHECK過條友冇案底，有老婆仔女，全部仲讀緊書，間舖係由佢自資經營。」一名探員在門外以手勢示意何定邦外出，然後跟他細聲地說話。
「先生，請你回憶案發當天所發生的事情，咁我地先可以幫你洗脫嫌疑。」何定邦回到問話室說。
「我記得當日係我老婆生日。原本仲諗住中午食晏後做多兩三個客，然後下晝索性收舖同屋企人一齊去慶祝，點知大約兩、三點左右突然有個好古怪的人出現，但我諗極都記唔起佢個樣同埋衣著外表，我剩係記得佢身上帶有一種腐爛臭味，好難聞，就好似死老鼠咁。佢問我識唔識去中環XX道停車場，我話識，之後佢仲攞出一盒生日蛋糕上櫃檯，拆開後居然係一具電子零件，我問佢咩事，佢定眼咁望住我，當時佢對眼珠慢慢咁由黑轉白，最後得番一對反白眼，我當時好驚，全身打冷震完全唔識反應，跟住落嚟我做過咩連自己都唔記得，醒返個陣係夜晚，我部手機起勢響，原來係老婆打俾我，當時我嚮屋企樓下一個人漫無目的咁行。」





三天後，何定邦跟上司葉志深警司在灣仔總部辦公室討論案情。
「就係咁，案發當日舖頭裡頭所有CCTV紀錄都DELETE晒，就好似上次嚮尖沙嘴警署會客室事件咁。」何定邦說。
「你認為兩單案有關聯？」葉志深說。
「唔排除有咁可能，因為賈惺惺仍然在逃。」
「馬上跟進調查，因本案涉及殺警，上頭非常著緊要破案。」葉志深說話時取出放在桌面的哥爾夫球把玩，他的桌面放滿了許多哥爾夫球比賽獎盃。「話時話，興展堂個CASE有冇新線索？最近查成點？」
「我個卧底仲追查緊唐龍新任老婆並且起緊佢底，由於對手嚮警方安插咗線眼，我地一舉一動都被佢知道，就連關武雄都被滅口。」
「咁你自己千祈要小心，特別要留意身邊的伙記，為咗安全，最好同我通報行蹤以策萬全。」
「明白。」