恐怖蔓延令你一讀一驚心《攝魂偽術家》18+ 墮落始源: 第60章 - 法證先鋒

我上了法證事務部一趟，那位專家是一位高級化驗師，英文名字叫添，同事皆稱呼他做添SIR，外表雖然光頭，但勝在笑容可掬，說話有說服力。他親自出來迎接我，還帶我到實驗室去看現場找到那半截繩的證物。
「證物嚮度，由於沈律師對攀山繩有一定程度的認識，所以我想先請妳睇下繩索上面的切口。」添SIR對著我說。
「切口非常齊整，睇起來唔似被尖石經過多次磨擦而割斷咁，但係點解切口側面同時呈現出熔化跡象？」我好奇地問。
「依條繩除咗被人用利器割斷之外，條繩仲俾人用火燒過。」添SIR指著切口旁邊一個疑似被燒焦的痕跡說。
「奇怪，點解會有火燒痕跡？」
「一般應用嚮攀山繩製造上的化學合成纖維，分別有聚丙烯(polypropylene)、聚酉先胺(polyamide)，亦即係俗稱尼龍、同埋聚酯(polyester)等三種，佢地熔點全都嚮攝氏260度之下，所以低熔點正正係攀石繩背後的致命傷，令到繩索唔可以互相劇烈磨擦又或者接近熱源，所以我唔排除有人故意利用火燒，令到繩變得好容易咁被割斷。」添SIR以化學專家的身份解釋火燒繩索背後的用意。
「換句話說，利用依種方法去割斷攀山繩的人係好熟識繩索構造，同時經過精心策劃部署去完成，絕對唔係一時大意錯手割斷，係嘛？」
「我相信兇手利用依個方法殺人應該係攀崖時一早使用快扣將整條攀山繩穿上崖壁頂，然後再沿繩爬落中段作出埋伏，期間利用打火機燃燒繩索表面，等到下方受害人將最接近兇手位置個快扣除下回收後，再嚮下方燒過位置割斷攀山繩，就咁睇住佢跌死。」添SIR閒時亦有涉獵攀山運動，佢根據攀山原理同技巧，推算出整個殺人部署。原來奇雲親眼看著位於上方的邱處榮割繩殺他，怪不得他死得那麼冤枉。

「我差點唔記得邱處榮於案發當晚突然折返意外現場，好似嚮地下搵緊野，佢話過跌咗電話，但我知佢講緊大話。」我突然記起當晚撞鬼後的一些細節。




「可能係搵緊對佢不利的犯罪證據。事不宜遲，妳可以馬上帶我地條TEAM去搵嗎？希望能夠早一步搵到新線索。」

當下我立即答應。我們在下午二時抵達意外現場，並以地毯式搜索每個草叢角落，花了將近三個小時，皇天不負有心人，終於在日落前於奇雲伏屍處約二十碼範圍外找到一把軍用匕首。