《天堂之上 - Upon The Heaven》: 第二十集: 訣別 (大結局)

阿偉乘著雪鳳凰，飛上了半空，這一刻，他回頭望了阿澄一眼，見到阿澄向著他搖手道別，阿偉的心終於踏實下來了，因為他終於作出了選擇。當雪鳳凰飛到了晴空之城的城牆上，阿偉看到了兩旁好像有些東西正飛過來。幾分鐘後，阿偉定睛細看，彷彿有數十架飛機正在向晴空之城飛去，機上還印著晨光之城的標誌。阿偉這時才明白，所謂的協議，只是一個騙局，退兵，更是天方夜潭。阿偉考慮了一會兒，在父母與晴空之城之間，選擇了後者，於是馬上與雪鳳凰回頭，向著晴空之城飛回去。回程路上，炸彈的爆炸聲沒有一刻間斷，轟炸機向著地面投下炸彈，弄得四處漫天煙火。

阿偉心內萬分焦急，希望盡快趕回阿澄身邊，保護她與其母親。同時阿偉也十分後悔，後悔自己竟然掉低阿澄，自私的離開。阿偉心裡面現在只有一個希望，就是阿澄一家人能夠平平安安度過今次危機。可是當阿偉趕到了阿澄的家時，屋內已經沒有人影，不知道阿澄究竟去了哪兒。阿偉從雪鳳凰背上落下，尋找著阿澄。

「阿澄！阿澄！你喺邊度呀？你應下我啦！」阿偉含著淚，激動地說。

「阿澄！！！我真係傻呀，點解會掉低你自己走咗去架！」阿偉捶著自己的胸口說。

不久，雪鳳凰向著路旁的樹叢叫了幾聲，阿偉便立刻趕過去。





「阿澄！你喺唔喺度呀？」阿偉大叫著。

「阿偉？你…你做咩會喺度嘅，你唔係走咗架咩？」阿澄好像立刻重新有了希望。

只見阿澄與澄媽躲在樹蔭下兩塊大石中間的空隙中。

「阿澄！你同媽咪點呀？無事嘛？」阿偉焦急地問。

「點解會無啦啦有轟炸機架，唔係有協議架咩！」阿澄害怕的說。





「佢哋冇遵守到協議，宜家佢哋要突襲我哋呀！」「嚟啦，坐上嚟，我帶你哋去安全嘅地方。」阿偉協助阿澄與澄媽乘上了雪鳳凰的背上。

「爸爸呀！我爸爸仲喺出面呀！」阿澄焦急地說。

「放心，我哋去搵天冰。」阿偉捉著阿澄的手。

這樣，阿澄一邊捉著阿偉，一邊捉著澄媽，三人打算飛到城外的營地尋找天冰。途中，看見地面的守衛軍已經與入侵者對抗，守衛軍也派出了直昇機到空中對抗入侵的轟炸機。在連續的炮火聲與子彈聲中，三人戰戰競競的來到了城外的營地，看見天冰正在曠野上與敵人交戰。阿偉令雪鳳凰降落在營地旁的一處樹林中，希望在沒有暴露蹤下，潛行到友方的營地。曠野上友軍與敵人激烈的交戰著，阿偉觀察了形勢後，發現崖邊有一條小路可以通往營地，於是帶著阿澄與澄媽小心翼翼的走向營地。天冰此時已經解決了身邊的敵人。

「天冰！」「佢哋喺呢度呀，佢哋安全呀，唔使擔心！」阿偉對天冰叫著。





「好隊友！」天冰看見了她們，心裡也安定下來。

阿偉帶著兩人沿著崖邊小路，緩緩地走著。突然一個炮彈打中了三人身旁的巨石，巨石散落向著崖邊掉落，三人都貼著崖邊躲避著碎石塊。在地動山搖之際，阿澄失去重心，跌向懸崖，阿偉立刻反應過來，趴到懸崖邊，用力捉著阿澄的手，澄媽在旁邊拉著阿偉另一隻手，三人形成動彈不得的狀態。阿澄在懸崖邊盪著，崖下是一大片陰暗的雲霧。

阿偉記起了當初第一天來到時，天冰跟他說的話：「呢度係晴空之城嘅邊界，傳說跌落去就會去咗異度空間，靈魂就會永遠流放喺幻境之中。」

「阿澄！」「你頂住呀！唔好放手呀！」阿偉緊張地對著阿澄說。

「阿澄！捉實阿偉呀！我哋一定會拉你上嚟架！」澄媽盈著淚著說。

「阿偉…放開我…如果唔係我哋三個都會跌落去架…」阿澄含著淚水，望著阿偉與媽媽。

「千祈唔好放手呀，捉實我呀，知唔知呀…！」阿偉緊緊捉著阿澄的手。

「放手啦…」阿澄哭著說。





「唔放呀！！」阿偉堅定的說。

阿偉小心翼翼的慢慢地嘗試將阿澄拉上來，可是，另一顆炮彈再次擊中了懸崖，劇烈晃動的山崖令阿偉和澄媽也失去了重心，三人向著懸崖跌落。阿偉緊閉著眼睛，手也緊緊地握著阿澄的手。此刻身邊的炮火聲、嘶殺聲彷彿不存在了，心裡面只感覺到一片安寧。在這千鈞一髮之際，雪鳳凰從遠處趕到，恰恰從崖邊乘起三人，將他們帶回了懸崖上。幸運地，雪鳳凰成功救回三人，阿偉也慶幸自己沒有放開阿澄。於是阿偉帶著兩人繼續走，終於來到了營地門前。阿偉途中一直緊緊拖著阿澄的手，一句說話也沒有說，或許是不必說。阿偉在營地內安頓好兩人，叫澄媽照顧著阿澄，自己坦蕩蕩的走出了營地。阿偉回想起國王的說話，深信憑著自己與雪鳳凰的力量定必能夠擊退入侵者。於是阿偉乘著雪鳳凰，迎著風向晴空之城飛去。

「天冰，我嚟幫你！」阿偉向著天冰說。

「阿偉？」天冰疑惑著。

阿偉乘著雪鳳凰向著敵人進行沖刺，雪鳳凰從眼睛發出一束白茫茫的光線，向著敵人發射，被擊中的敵人彷彿被雪霜所包圍，立刻倒地，並失去行動能力。阿偉向著地面上的敵人發射光線，逐一將他們擊倒，慢慢地守備軍終於取回優勢，地內的地面部隊開始向著城外進發，城外的友軍亦從外圍包圍著敵人，希望盡快解決事件。

「雪鳳凰，做得好呀！來啦，宜家輪到班轟炸機喇！」阿偉對雪鳳凰說。

雪鳳凰吸收了聖靈節的靈氣，越戰越勇，一聲怒吼，向著敵方轟炸機一輪掃射，將它們全部冷凍，慢慢地，轟炸機都失去了動力，逐一逐一墜落地面。突然，阿偉背後出現了一架突如其來的轟炸機，向著阿偉發射了一發飛彈。雪鳳凰立刻轉過身來，用左邊翅膀替阿偉擋下飛彈，接著再以冰凍射線，結束了那架轟炸機。





「雪鳳凰，你點呀…」阿偉摸著雪鳳凰的翅膀說。

「多謝你呀，雪鳳凰…」阿偉哭著說。

阿偉的溫柔的輕撫著雪鳳凰的翅膀，雪鳳凰好像突然忘卻痛楚一樣，繼續勇敢作戰。幾個小時後，空中的敵人已經被完全擊落，而地面上的敵人也被天冰和守衛部隊全部擊退。阿偉和雪鳳凰降落地面，回到營地與天冰一家人重聚。

「阿偉，你點呀？」阿澄急忙過來扶著阿偉。

「我冇事，你呢？」阿偉輕聲說。

「我都冇事呀，你做咩流血嘅？點呀痛唔痛呀…？」阿澄拿著毛巾替阿偉擦掉臉上的血跡。

「呢啲…唔係我嘅血，係雪鳳凰嘅血…佢為咗保護我…幫我擋咗一下飛彈…如果唔係佢，我諗我都返唔到嚟見大家。」阿偉輕輕摸著雪鳳凰的身體說。「今次全靠雪鳳凰同埋大家嘅努力…先可以擊退敵人…」

「國王，我今次表現如何呀？有冇你當年嘅風範呀？」阿偉問。





「有！你指揮得好好，同大家好合拍！」國王捉著阿偉說。

大家休息過一會兒後，牆上的鐘，時針停留了在「11」字上。

「阿偉，你仲想唔想返去見父母呀…宜家聖靈節仲未過架，仲唔快啲？」國王提醒了阿偉。

「係喎！但係…大家…」阿偉吞吐的說。

「放心啦，阿偉，呢度有國王同我哋睇住呀嘛，你放心去做你想做嘅嘢啦！」天冰說。

「係囉，阿偉，仲有一個鐘頭咋…快啲啦！」阿斯說。

「阿偉，你放心啦，我會照顧好阿澄架喇！」澄媽捉著阿澄的手說。





「阿澄…咁你呢…」阿偉輕輕地問。

「行啦，傻豬！」阿澄微微笑著，推阿偉乘上了雪鳳凰背上。

「你來過，我記得…就係緣份！」阿澄深情地說。

於是，阿偉乘著雪鳳凰，向著邊界飛去。阿偉頂著逆向的風，與雪鳳凰一同努力堅持，終於飛出了晴空之城的邊界。阿偉懷著滿心歡喜，期待著與父母見面。不久，便抵達了香港的上空，雪鳳凰慢慢地飛到了阿偉居住的那一幢樓，將阿偉從窗口送到阿偉家中，阿偉便從窗子爬入自己的房間，打算給父母一個驚喜，但是阿偉發現房間內的東西全都不見了，房間內空空如也。阿偉不知道發生甚麼事，於是倚在房間的門上靜靜聽著。

「老公，今日係阿偉三十歲嘅生日，我哋同佢一齊慶祝啦！」偉媽說。

「生日快樂呀，阿偉！」偉爸說。

阿偉心想︰「原來今日係我生日，我都已經唔記得囉。」

「阿偉生日快樂呀，祝你喺上面生活得快快樂樂呀。」阿盈說著。

阿偉心想：「唔通你哋以為我返咗大陸？唔係呀嘛！」

「係呀阿偉，雖然你唔喺度，但係我哋都係最好嘅兄弟，一日兄弟，一世兄弟。」阿聲舉著酒杯堅定地說。

阿偉心想：「阿聲真係呀，講啲咁肉麻嘅嘢。」

最後阿偉下定決心，勇敢的打開房門，走出客廳。

「阿爸阿媽，阿盈，阿聲，我返嚟喇！乜你哋咁齊人呀！」阿偉說。

「阿偉？阿偉！真係你呀…！你幾時返嚟架？老公，你見唔見到呀！阿偉佢未死呀！」偉媽看見阿偉，十分激動的說。

「我啱啱飛返嚟喇！」阿偉開心的說。

「我見到呀！阿偉！你知唔知我哋好掛住你呀！快啲過嚟呀！」偉爸盈著淚說。

「即刻過嚟！」阿偉向著父母走去。

「俾媽媽攬下喇，我真係好掛著你呀！」偉媽張開雙手擁抱阿偉。

「咦，點解…點解…點解我攬唔到你嘅…阿偉…阿偉！」偉媽不斷嘗試著擁抱阿偉，但始終無法觸摸到阿偉。

「媽…媽…點解會咁架…我都攬唔到你嘅…」阿偉也嘗試著擁抱媽媽，但同樣地大家始終無法觸摸到大家。「點解會咁架？」

這時，阿偉的耳邊彷彿聽到了一把聲音，靜靜聽著，是國王的聲音。

「阿偉…有一樣嘢我一直冇同你講，你知唔知點解你當初會嚟到晴空之城？係因為你嘅飛船當初撞到晴空之城嘅邊界，之後被力場帶到去另一個地方，結果你連同飛船喺日本墜落。你嘅軀體因為受到重創，靈魂已經冇辦法再留喺身體入面，所以你嘅靈魂先會留喺晴空之城…換句說話講，其實你...一早已經死咗，只不過係你自己唔知啫…我本來想同你坦白咁講…但係見到你同父母嘅深厚感情，你又咁掛住你父母，加上你咁有決心，我先至破例俾你落嚟人間，見父母同朋友最後一面…對唔住，阿偉，瞞咗你咁耐…」

「阿偉，發生咩事呀？點解…會」阿盈憂心地問著。

「係囉，阿偉，咁耐以嚟你究竟去咗邊度呀？…宜家…」阿聲問著，但也無法組織整件事。

阿偉望望電視前的桌子，見到的是自己的一幅黑白照片，是他穿著太空衣，拿著頭盔的樣子，彷彿明白了一切，原來自己一早已經離開了父母。

「爸…媽…唔使再攬我架喇…你哋唔會攬到我架…因為我宜家只係一個靈魂嚟架咋…我已經死咗架喇…」阿偉哭著說。

「唔會架，阿偉我仲見到你，你點會死咗呀…」偉媽傷心地說，雙手繼續嘗試著擁抱阿偉。

「對唔住呀，媽…呢個…已經係事實嚟…唔好再曬力氣喇……」阿偉勸著媽媽，手也按著媽媽的手，雖然無法感覺得到。

「老婆，夠喇…」偉爸捉著偉媽的手，摟著偉媽…

「阿偉…點解…」阿盈淚流滿面的說。

「呢個係命運嚟架，點都改變唔到架，喊都冇用…大家…只好接受啦。」阿偉對阿盈說。

「阿偉…其實我…有好多說話…以前冇同你講架…」阿盈哭著說。

「我…愛…你…」阿偉緩緩地說。「係咪咁呀？」

阿盈點點頭，擁抱著阿偉，雖然大家不能觸碰大家，但是心聲仍能夠互相傳達得到。

漸漸地，客廳內的哭泣聲也停頓了。阿偉感到有些東西拉著他，慢慢地，阿偉向著窗口飄去，耳邊聽到國王說「夠鐘要返上嚟喇…如果你留喺人間，會灰飛煙滅架…」

「阿偉…！你去邊呀…」偉媽叫著。

「媽，我要走喇…如果我唔走，我會灰飛煙滅架…」阿偉說。

「阿偉…返嚟呀…阿偉…阿偉！」偉媽向著窗邊叫著…

「我真係要走架喇…媽…你要保重身體呀…以後要好似以前咁開心呀，知唔知？」阿偉乘著雪鳳凰緩緩上升。

「爸…你要好好地照顧阿媽呀…多啲陪佢出去玩呀！」阿偉說。

「阿盈…我呢一生最開心嘅事就係遇到你，雖然未來日子我陪唔到你，但係過去發生嘅事，我全部都會記得架。你記唔記得我同你講過啲咩呀？」阿偉說。

「你話幫你照顧你父母呀嘛…我記得架喇…阿偉…」阿盈凝望著阿偉說。

「係喎，我上次問你，你嘅夢想係咩，你都未答我…」阿偉記起往事。

「我嘅夢想咪就係…嫁俾你，同你喺埋一齊囉…」阿盈哭泣的說。

「咁呀，可能要等下一世先可以實現喎…」阿偉說。

「我等…等幾耐都願意…」阿盈感動的說。

「阿聲呀，照顧好阿盈，咁樣先至不枉我同你一世人兩兄弟…至於其他…唔使講啦，喺呢度喇一早！」阿偉指著胸膛說。

「阿爸阿媽…我真係要走架喇…之前應承咗帶你哋去旅行，不過睇怕宜家都實現唔到架喇…下世呀！下一世我都仲係你哋嘅乖仔，到時再帶你哋去玩…」阿偉說。

「仲有，唔使掛住我架，我會喺上面開開心心咁樣生活。不過如果真係好掛住我嘅，就抬高頭望住嗰粒星星啦，見唔見到呀？我會喺上面永永遠遠咁樣守護住你哋架喇…大家保重喇…再見…………」阿偉的聲音越來越微弱…

阿偉乘著雪鳳凰，越飛越遠，最後在天空中化為三顆星星，互相連繫出一個三角形，在眾人心裡面永遠地閃耀著。

晴空之城內，女王為受傷的守衛和倒塌的房屋施行治癒法術，雖然此舉會大傷女王的元氣，但是女王亦義無反顧地盡量將晴空之城變回本來面貌。慢慢地，守衛們的傷勢都減輕了，被破壞的地方和房屋也修復回來，眾人各自回到家中，整理好自己的家園。阿澄一家也回到自己家中，將雜物收拾好。

「好彩今次都化險為夷，大家都冇事！快啲執返好間屋先啦。」天冰安心地說，一邊將雜物放回原位。

「咦！呢個係邊個嚟架？我哋幾時影過張咁嘅相？」澄媽拿起與阿偉的合照，指著阿偉說。「阿澄，係唔係你啲同學呀？」

「我都唔清楚喎……」阿澄望著照片中的阿偉說。

「咁唔好理喇，放埋一邊先啦。」天冰說。

「唔好，呢個人感覺好親切，或者等我諗下，遲啲或者會記得呢！」阿澄將照片收到口袋裡面，繼續收拾屋子。

「國王，我哋會去邊架？」阿偉跟著國王。

「唔知架，你跟住呢條路行就會到架喇。再見喇。」國王指著面前的路，說完便消失了。

阿偉沿著黃黃的溪流往上走，經過藍色的小橋，到達泉水的源頭，之後閉上眼睛，身體慢慢向上升，最後聽到一把聲音。

「縱使人在天堂，其實愛在身旁……你好，歡迎來臨晴空之城！」國王說。