《天堂之上 - Upon The Heaven》: 第十七集: 願望
「好喇，經過評判嘅考慮之後，比賽嘅結果已經喺我手上面喇…今次嘅冠軍係…樂淘工作室所創作嘅……」主持人宣布著比賽結果。
阿偉與其他未有得獎的參賽者以及來賓都在台下鼓掌，此次的比賽結果亦是阿偉與組員一早就預料得到的，他們都沒有失望，與大家互相擁抱過後，阿偉便跟隊友將飛機運送回研究室，之後便與隊員道別，伴著身邊的溪流回到家中。
「阿偉，今日比賽我有睇呀，你講得好好…」天冰說道。
「宜家諗返都幾大膽，喺國王面前亂噏嘢…」阿偉說。
「冇獎唔緊要嘅，咪當係見識下囉，你父母一定會以你為傲架！就嚟食得飯架喇，坐低睇下電視先啦。」天冰讓開沙發讓阿偉坐下來。
這天晚上，阿偉很快便進入夢鄉，彷彿完成了任務，放下了包袱一樣，身上的壓力好像一下子釋放了出來。另一天繼續如常工作，阿偉回到研究室，繼續與同事有講有笑。主管給了阿偉一封信，信封印著王室的標誌，紙質十分細緻，表面還有少許的立體花紋，十分精美。阿偉下班回家後，立刻拆掉信封看看究竟是甚麼事。
「係阿斯寄俾我架喎，唔知係咩事呢…」阿偉對著大家說。
「國王想邀請我去同佢見面…？吓，做咩事呀！」阿偉驚訝的說。
「你係咪得罪咗王室啲人呀…國王要向你問罪呀，哈哈。」澄媽開著玩笑。
「唔係呀嘛，咁得人驚！」阿偉笑著回應。
「阿斯約我下個星期去王座城堡嗰度見國王喎。嘩！我真係未去過呀！」阿偉興奮的說。
「可能國王鍾意咗你呀…」阿澄奸笑著。
「鍾意我呀嗱，亂噏！」阿偉笑著說。
時間又過了一個星期，阿偉已經為與國王見面準備好一切，打算以自己最佳狀態面見國王。阿偉來到了王座城堡，只見城堡外圍被高牆圍繞，只有兩個守衛在入口處把守，阿偉拿出信件，守衛便讓阿偉進去。想不到高牆後的，竟是一大片的草地，大約三寸的小草被微風吹著，生氣勃勃的向著同一方向擺動，在晨光照耀下，草地上彷彿反映著天空的景色，與天空融為一體。阿偉沿著長長的石板路，慢慢的向著城堡走去。
「唔好意思，我嚟見國王架…」阿偉對著門外的一個背對著自己的人說。
「咦，阿偉，好準時喎。我帶你入去。」阿斯說。
「阿斯，原來係你。」阿偉說。「係喎，國王搵我…係咩事呢…其實？」
「你上到去咪知囉，總之記住，堅持自己嘅夢想，就咩問題都可以解決！」阿斯帶領著阿偉來到了國王房間門前。
宮殿內來來去去都是穿著絲綢的人，衣服上的花紋十分精緻，阿偉猜想必是大臣或官員吧。
「入去啦，國王等緊你。」阿斯打開門。
阿偉進入了房間，看見房間內放滿的都是書籍和厚厚的簿子，看來晴空之城每天的事務都需要經過國王處理，國王真是非常忙碌，為甚麼他還有時間與阿偉見面呢？想著想著，阿偉終於見到了國王。
「國王，早晨，我叫做陳迪偉呀！你好！」阿偉非常有禮貌地向國王打招呼。
「阿偉，阿斯同我介紹過你架喇，我對你好有興趣…」國王坐下來說。
「唔通真係俾阿澄講中…痴線架…我唔係嗰種喎…」阿偉心想，冷汗直流。
「唔知國王點解咁留意我呢？我一個普通人。」阿偉問。
「你喺嗰日比賽嘅時候所講嘅嘢非常精采，我對你背後嘅故事好有興趣，你可唔可以講多少少…」國王說。
「哦，原來係咁樣…」阿偉鬆了一口氣。
阿偉便對國王講了他的故事，由他第一天到晴空之城，與天冰一家人相遇，第一天上班，以及講到了自己的夢想。國王對阿偉的故事非常受落。
「阿偉，我好欣賞你有咁嘅堅持同埋毅力，我好耐都冇見過好似你咁，咁有決心嘅人…」國王猶豫了一陣子。「我問多你一次，你真係咁想離開去搵你嘅父母？」
「係，呢個係我唯一想做嘅事。」阿偉決斷的回答。
「咁好，我有方法可以幫你完成你嘅夢想。不過……」國王吞吞吐吐的說。
「不過咩呀？」阿偉問。
「冇嘢，你跟我嚟…」國王帶著阿偉離開了城堡。
國王與阿偉從城堡的後門離開，沿著階磚路，來到了一片茂密的森林，森林裡面的空氣十分清新，陽光充沛，仔細聽還有各種鳥獸鳴叫的聲音。
「國王，你帶我嚟呢度，有何用意？」阿偉不解的問。
「你一陣就知…」國王豎起手指，放到嘴邊，吹了一下口哨。「唔好出聲，靜靜地聽下…」
阿偉閉上眼睛，細細聆聽著空氣中的每一絲律動，彷彿聽到了「嘯、嘯」的聲音，聲音越來越近，阿偉睜開眼睛，整個人跌在地上，只見到一隻龐大的、閃閃生輝的生物降落在國王身旁…牠比起國王還要高出一倍，眼睛雪白無暇，看到阿偉後發出了一下隆隆的吼聲。
「雪鳳凰，乖呀，今日心情點呀…」國王撫摸著雪鳳凰的翅膀。
「國王，佢……佢……」阿偉嚇得連話都說不出。
「你唔使驚架，佢係雪鳳凰，係我哋晴空之城嘅守護獸，之前遇到敵國入侵，都係靠佢將敵人擊退咋。佢好乖架，你過嚟摸下佢啦…」國王說。
阿偉便戰戰競競地上前觸摸著雪鳳凰的翅膀，牠動了動翅膀，阿偉便向後退了退。
「阿偉呀，雪鳳凰有穿越空間嘅能力，你如果可以乘住佢，就可以返去你想去嘅地方，同你嘅父母相見。」國王終於說出了方法。
「真架？國王，你真係好人喇！你知唔知我等咗呢日好耐喇！」阿偉興奮地說。「但係你點解要咁幫我呢，你咁尊貴嘅身份，而我只係一個普通人…」阿偉馬上疑惑的說。
「我對任何人都係一視同仁嘅，唔會因為一個人嘅身份或者過去而決定某樣嘢，只要嗰個人係值得，我點都會幫佢。因為我欣賞你嘅決心，呢樣嘢就當係我哋晴空之城送俾你嘅禮物啦！仲有嘅話…可能係緣份呢！」國王說。
「仲有呀，你要多啲同雪鳳凰溝通呀，咁樣佢先會全心全意咁樣幫你架！我見你哋都幾投契呀，你得閒多啲嚟呢度同佢玩下啦。」國王吩咐著。
「咁國王呀，我幾時先可以真正返去呀？」阿偉急不及待地問。
「等我諗下先…應該等兩個月之後嘅聖靈節，嗰日晴空之城邊界嘅力場將會大幅減弱，而守護獸嘅能力亦會大幅提高，如果加上你同佢嘅努力，應該可以成功返去…」國王說。
「真係好多謝、好多謝你呀，國王。我一定會多啲嚟陪佢，增進下感情架喇，多謝你呀國王。」阿偉已經開心得不知所措，只好不斷地向國王鞠躬道謝。
阿偉興高采烈的回家，國王望著阿偉的背影，不禁有少許感慨。
「希望佢見到父母之後唔會後悔啦…」國王對著雪鳳凰說。雪鳳凰點點頭，彷彿明白國王的擔憂。
阿偉回到家中，跟天冰和澄媽說了這件事，兩人都十分喜出望外，又十分驚訝，國王竟然將晴空之城的守護靈獸借給阿偉，讓他可以圓夢。其後，阿偉找到了阿澄，拖著她的手，一同到了莊園的草地上躺下，一口氣的向阿澄說了這件事。
「阿澄呀，我兩個月後就可以返去見我父母喇，我想咗好耐，今次終於可以成真喇！」阿偉開心地向阿澄分享著。
「係呀…？咁…咁咪好囉…可以見到佢哋喇…」阿澄心不在焉的說。
「講起上嚟都差唔多四個月冇見佢哋喇，唔知佢哋點呢？」阿偉說。「死啦，佢哋一定好擔心我喇！佢哋會唔會以為我死咗架…應該唔會掛…你話係咪？」
「唔知呢…唔會掛…」阿澄說。
「做咩呀你，冇嚟神氣咁嘅？唔開心呀？講出嚟俾我聽下啦，咁多次都係我講，今次俾你講。」阿偉說。
「冇事，我有啲唔舒服啫，你…慢慢係度開心下啦，我返上房先…」阿澄急急地離開莊園。
「咁記得食藥喇，早啲瞓呀！」阿偉叫著。
阿偉這晚心情非常好，到了半夜都尚未入睡，倚在窗邊看著窗外的景色。阿偉望著星空，望著那兩顆代表父母的星星，看著看著，兩顆星星上彷彿浮現出父母的臉容，於是阿偉一整晚都在與星星聊天。而阿澄也留在自己房間內，未能入睡，倚在窗邊，呆呆地看著窗外黑漆漆的景色。漸漸的，晴空之城竟下起微微細雨。整夜，阿偉與阿澄都沒有入睡，只是看著窗外的景色。不同的是，一個是滔滔不絕的說話，另一個是默默無言的發呆；一個在房子上層，另一個在房子下層；一個無視著雨點一點一滴的打在窗上，另一個彷彿被雨絲一根一根的刺到心內。