《印度 · 尋油 · 台灣妹》: 《四十四》完結篇
連日嚟嘅追逐，真係達致身心俱疲，萬念俱灰，我 …… 終於都撑唔住，雙膝頓時無力，整個人跌落萬尺深淵，心裡面好唔忿氣，不停重覆咁問，點解每次都咁唔順利，爭啲啲，永遠都係爭啲啲！
但係諗番剛才嘅對話，Priscilla 傷心成咁，依家嘅我仲响度自怨自艾，浪費時間，都係無補於事，無論如何，只要 Priscilla 仲喺機場，我都一定要搵落去！
我慢慢用手撑番起身，好唔好意思咁同職員小姐道個歉，好奇怪，我見佢笑笑口咁望住我，徐徐地舉高隻右手，指住我背後，我下意識一個轉身！
就响呢一刻，時間彷彿停頓咗一樣，連呼吸都停埋，此情此境，雙眼不期然流下眼淚，我用力去抹走呢兩行淚水，要令自己知道，眼前嘅唔係幻覺，實實在在响我面前出現嘅，就係我朝思暮想都想見到，都想再次擁抱嘅 Priscilla，我嘅小公主 ～ Priscilla！
經歷咗咁多，一個向左走，一個向右走，一個台灣，一個香港，終於、終於响機場重遇！
眼前嘅 Priscilla，身上披住一條棗紅色嘅圍巾，雙眼早已喊到通紅，嚟到呢刻，已經唔再需要講任何說話，我一步、一步咁行前，雙眼再次失控地流下眼淚，張開雙手，將 Priscilla 緊緊的抱入懷，無止境嘅等待，奇妙嘅重遇，夢一般嘅畫面，再次出現，呢一刻我真係好想大聲嗌出嚟，將呢份喜悅嗌晒出嚟！
我望住 Priscilla，佢面上嘅笑容已經完全將淚水融化，再次望住呢個久違了嘅笑容，令我記番起，我曾經講過，要 Priscilla 重現燦爛笑容，呢刻，我 ～ 終 ～ 於 ～ 做 ～ 到 ！
能夠再次擁抱 Priscilla，之前所付出過嘅汗水同淚水，一切一切已經變得唔再重要，只要能夠再次遇上！
之前掉爆手機，其實已經吸引咗啲花生友嘅注意，到重遇一刻，仲隱約聽到啲掌聲支持，集天時地利人和，我要好好把握呢個嘅機會，呢個咁好嘅氣氛，做啲一早計劃好嘅嘢。
我輕輕推開緊抱著嘅 Priscilla，呢個咁奇怪嘅舉動，令 Priscilla 有啲不知所措。
望住 Priscilla，我深～深～深呼吸咗一下，緩緩地將右膝跪落地下，同時間，伸手入去袋裏面，手上雖然無鮮花，但我誠意可嘉，袋裏面嘅手徐徐伸出，手上面多咗一個盒，一個圓形嘅盒，左手將盒蓋打開。
我抬頭一望，Priscilla 雙眼猶如扭開咗嘅水喉，如雨落下，雙手禁不住遮蓋口鼻，一副難以相信嘅模樣！
圍觀嘅花生友一早已經攞出手機，本週之星，指日可待，到咗呢刻，機場已經成為咗我嘅舞台，旅客就變成咗觀眾，花生友開始發揮佢地嘅化學作用，一個又一個拍掌叫囂，不斷講
「Marry Him、 Marry Him ……. 」
我唔介意成為主角，更唔介意聽日上報，姿勢已經擺好，鑽戒亦已準備，望住自己所愛，將心底話一一講出
「Priscilla，因為上天的安排，我們從印度相遇，短短十天，我彷彿經歷了一個世紀，上天不斷給我一個又一個試煉，但我全部也不放眼內，因為我眼內只有妳。
我不能承諾一定有豪宅大屋，更不能承諾天天大魚大肉，但是我可以保證，一定全心全意去愛妳、保護妳。
請妳嫁 … 」
當我正要講「給我吧」之際，成面淚水嘅 Priscilla 經已衝前將我緊緊攬實，用最簡單嘅動作回答，我覺得自己已經成為世界上最幸福嘅人，亦忍唔住大嗌咗句
「我得咗喇！」
周邊嘅花生友全部拍掌歡呼 ，將氣氛推至頂點，我身為主人家連忙揮手致謝，諗落場面都幾攪笑。
熱鬧過後，人群陸續散去，呢一刻，我終於可以清清楚楚望真啲我嘅小公主，熊貓眼嘅 Priscilla，依然係咁靚，咁可愛，我緊緊拖住佢隻手，就講
「今次我不會再放手！」
Priscilla 笑一笑，就話
「你看不出我有什麼不一樣？」
「唔 …… 沒有，一樣可愛！」我望一望就講
跟住佢指一指身上嗰條棗紅色圍巾，微微笑咁話
「謝謝你，我很喜歡！」
「妳為什麼知道我一定是買給妳呢？」唔怪之得，咁熟口面啦，我就問
「不是嗎？你姐姐說的！」Priscilla 帶點生氣咁話
「這條圍巾，我是買給我太太的！」我笑笑口咁講
Priscilla 塊面隨即紅晒，怕怕醜醜咁作勢打我，我一手捉住佢，連隨錫落佢嘴唇上面，輕輕一吻，百般滋味，一嘴再嘴，真係好嘴到唔停到口啊！
成件事發展到呢個匪夷所思嘅地步，好多朋友都問我，文西達（乜唔係達文西咩？）你就爽爽啦，有個又靚又有米嘅台灣妹做老婆，打跛腳都唔駛憂啦！
唉 …… 我唔怕老實話你知，其實惡夢先啱啱開始咋，好多嘢講你都唔信 .....
咩話？你想知？好，有機會先話比你知吖！
「老公 ~」
嚟喇，嚟喇，我又要飛喇，拜拜！
~ 《印度 · 尋油 · 台灣妹》全文完 ~
如果大家睇完有咩意見，可以留言比我，感謝！！