《印度 · 尋油 · 台灣妹》: 《三十三》

食飽飯，我行去媽子耳邊，細細聲講 


「媽子，今晚辛苦妳喇！」 


然後喺佢面上錫咗啖，媽子摸不著頭腦，我望一望老豆，笑一笑，老豆扮睇唔到，低頭繼續食嘢。 


入到房，開著部電腦，响 Facebook 上搜尋 Priscilla To，一眼我就認得出，我嘅小公主！ 






望住 Priscilla 嘅動態，內心嘅情感又再次被牽動，一張一張笑容滿面嘅相片，大學畢業與同學所拍嘅、與 Heidi 一齊去旅行所拍嘅，與一班朋友食飯時所拍嘅、生日時與父母所拍嘅 …… ，每一張都係開開心心！ 


除咗一張，一張尋日上傳嘅相，相入面無任何表情，只得一隻雪白嘅手，一隻被插住針嘅手！ 


我望住呢一張相，一張無我出現，但因我而起嘅相，因為我，Priscilla 先會暈倒，因為我，Priscilla 先要打針，因為我，Priscilla 先會唔開心！ 






我同自己講，我要改變，我要令小公主重獲笑容！ 


於是我打比花仔，跟住就同佢講 


「花仔，後日出發！」






「做乜咁急？」花仔好奇咁問 


「我等得，Priscilla 唔等得！」 


「吓，佢有咗呀？」花仔表現出震驚嘅反應 


「你都黐㗎，都話無食咯！」我反反眼咁話 


「咁咩等唔切啫？」花仔唔明原因咁問 






「你受咗傷都要即刻消毒同睇醫生喇，依家 Priscilla 個心傷咗，如果唔盡快修補，傷口就會好難好番！」我好認真咁答 


「嘩 ~ 情聖，咁你諗住點做啊？」花仔急不及待咁追問 


「求 · 婚！」我慢慢咁講出兩個字 


「咩話？求 ~ 婚？你撞傷咗個頭未好番呀？我過嚟帶你去檢查清楚！！」花仔以為我撞親個腦 


「我認真㗎！人一生，好難先可以搵到一位自己鍾意，仲可以為對方犧牲嘅，呢一刻，我搵到！」我吸口氣就話 






「但係 …… 會唔會急咗啲啲，快咗啲啲同又急又快咗啲啲呢？」花仔對我個決定有啲擔心 


「我唔覺，我考慮得好清楚 （真係？），雖然我知道喺某啲人眼中可能好荒謬，但係正如你响的士高所講，錯過咗，只有後悔同遺憾，我唔想有後悔，更加唔想有遺憾，今次世紀大戰車仔對南華，無得輸吖！」我拍一拍心口壯膽，就同花仔講 


「既然你玩到咁大，我無奶油唔去見證一下㗎，一陣我訂機票同酒店，就當做支持你啦！」花仔無我符就話 


「真係好多謝你，花瘤！」 


「仆街啦你！」 






「哈哈哈 ……」


兩日後，香港國際機場，星巴克 


「花仔，你話人生幾咁奇妙，上個禮拜先同你去印度，眨下眼又去台灣！」我一邊享受咖啡，一邊同花仔講 


「你黐線，我陪你癲啫，有幾奇妙，點啊？好緊張呀？」花仔笑笑口咁講 


「緊係緊張啦，又想開大添！」我摸摸個肚 






「嗱，咪話我唔夠兄弟喇，尋日已經再打咗比 Heidi，幫你搭通晒天地線，Book 咗架車，訂埋九十九支玫瑰，一落機就飛去 Priscilla 屋企，比個驚喜佢，算唔話得喇啩！」花仔戚戚眉就話 


「挑！我自己打咗比 Heidi 啦，你借啲意打比佢啫，扮嘢！」我犀一犀佢 


「專登打比佢，咪玩啦，有得分咩？幫你咋！」花仔聽到之後，有啲緊張 


「明，收到，你話咩就咩啦！」 


「喂喂，你睇下，果邊帶cap帽嗰個似唔似少時嘅允兒？」花仔講講下，指向右邊 


「邊個？紅色帽嗰個？咁遠，睇鬼到咩！」 


「熟口熟面咁！」花仔自言自語咁講 


「你緊係唔知响邊度溝過啦，咪發夢，飲埋入閘！」我無佢咁好氣咁話 


上到機，心情越嚟越緊張，坐响度不停咁諗，一陣見到面第一句應該講咩好呢？


「你好！很久不見，我記得你了！」 唔得，太老土 


「Yo ~ Check it out！Miss me baby？」咁講好似黐咗線 


「BB豬，辛苦你了，現在我來到，我們一起吧！」太港式，唔得、唔得 


「 Priscilla，我什麼都記得了，對不起！」 呢個都可以，不過可以更好 


突然花仔拍一拍我，指一指窗口，我唔係好明，就問 


「咩嘢？」 


「冷靜啲，到喇！」 


我轉身望番窗，係喎，原來已經到咗台灣上空，乜咁快嘅，仲未諗好開場白，瀨嘢，既然係咁，唯有睇情況臨場發揮啦！ 


花仔見我緊張成咁，就拍拍我心口 


「唔駛驚喎，一定順順利利抱得美女歸！」 


「我驚嚇親佢啫！」我有少少缺乏信心咁 


「放心，我撑硬你，有咩唔對路，咪綁佢番香港！」花仔手舞足蹈咁講 


「吓，咁唔好搭飛機，太貴，寄平郵算，平啲！」 


「哈哈哈 ……」兩兄弟响飛機上大笑起上嚟，啲人就用奇怪眼光望住我地，就咁我地就到咗台灣！