《印度 · 尋油 · 台灣妹》: 《三十一》

話就話放咗成個禮拜假，實質做咗啲乜，五手指數得晒，洗咗一筆錢、住咗一晚醫院、坐咗十幾個鐘頭機、重新入咗兩個鐘電話號碼同一堆混亂又虛無嘅記憶。 


番到公司，坐都未坐低，珊姐同阿鬼佢地就一輪嘴咁問我印度之旅點樣，有無咩奇遇，唉 …… 我都唔知點答好，咪求其作話幾好玩，啲寺靚到飛天吖，條恆河有河妖，我差啲比佢咬死 …… 下删五百字，佢地又信到十足十，真係吹漲！ 


喺我吹到差唔多完嗰陣，我老頂大鳥哥召咗我入去，仲好鬼認真咁落晒簾，關埋門，氣氛異常凝重！ 


佢叫我坐低先，跟住慢慢咁行埋我身邊，一手搭住我膊頭，笑淫淫咁話 






「點啊，搵唔搵呀？」


「搵咩呀？」我望住佢就問 


「哈，幾時學識咁幽默㗎，嗱嗱臨攞出嚟開工啦！」大鳥哥慢慢收起笑容咁講 






「攞咩啫？大佬」我仍然望住佢咁問 


「嗱，見好就收喇，有冇買到？」大鳥哥忽然認真起嚟 


「買咩？手信？印度無乜嘢買，下次去第二度先補番啦！」我見咁認真咪同佢講 






「玩嘢呀！叫咗你死都要死支番嚟，當我689呀？玩鳩我，小你老母吖！」大鳥哥以為我玩佢，忍唔住爆粗 


「………..… 我尊重你先叫你一聲大鳥哥，我番工唔代表預咗帶埋屋企人，你講還講，咪老母前老母後呀！」由頭到尾我都唔知發生咩事，但係聽到話我屋企人，就勢係假 


「乜撚嘢呀！我小你老母咪小你老母囉，你咬我食呀！」大鳥見我駁嘴，氣難下，仲手指指添 


每個人容忍都有個限度，呢刻真係我忍唔住，起身開門，玩大佢！ 


「你個死人屎忽鬼！！死基佬！！」 






全個 Office 突然靜晒，珊姐、阿鬼呆咗，因為大家都知道得罪大鳥哥一定無運行，依家仲要兜口兜面咁侮辱佢，簡直係伸手入屎坑！ 


「趙志達，你講咩啊？你夠膽就講多次！！」大鳥哥怒不可遏，谷到塊面紅晒，就爆就爆咁 


「講幾多次都得，屎忽鬼，死基佬，你話我咩都得，話我阿媽就唔得！」去到呢刻，橫掂都係死咪死 


「㗅 …… 趙志達，You are fired！Get the heck out of my office！OUT！！！」大鳥哥响眾目睽睽下比我落面，個頭谷到出晒煙 


就喺呢刻，唔知有心定無意，佢講完 OUT 字之後，原本喺手上果個File，竟然甩手直飛向我， 






「啪」一聲，撞落我個頭度，啊 ~~ 好痛啊！！


我摸一摸個頭，成手都係血，彎彎腰，啲血不停滴落地下，滴滴滴 …… 珊姐同阿鬼見到，即時攞啲廁紙比我，我㩒住傷口，怒啤大鳥，佢之前嘅氣勢已經蕩然無存，淆晒底咁望住我。 


啊 ~ 我覺得個頭越嚟越痛，又好似想爆咁，我搖搖頭，一步一步行去大鳥哥前面，我估我依家個樣都幾恐怖，只見大鳥縮下縮下咁後退，最後跣咗落張櫈度，我企响佢面前，伸手去鍊住佢衫領，登大雙眼同佢講 


「個頭呢單嘢我當你跣手，唔同你計，但你頭先大大聲話炒我，咁多人都聽到，我無所謂，但炒還炒，講嘢唔駛咁仆街，攞人地娘親出嚟嘅，我依家走先，遲啲我會番嚟攞番啲人工，你小心啲同我計清楚，收唔收到？」 


「收 …… 到！」大鳥哥嚇到流晒冷汗 







講完之後，我慢慢放開隻血手，跟住行出間房，忍住痛笑笑口同珊姐、阿鬼佢地講句再見，攞番小小嘢，然後一拐一拐咁離開公司。