《印度 · 尋油 · 台灣妹》: 《二十五》

嘩 ~ 呢本係乜嘢 "球" 星集圖册吖！咁多外國女仔相嘅，個個都著得鬼死咁性感，仲响角落上面注明原產地同價錢，除咗印度之外，竟然仲有越南、印尼、甚至德國，一頁、二頁 …… 有成三、四十頁，好一本死亡筆記，真係少啲定力都忍唔住，想引死人咩，聰明嘅你地都知揀緊咩啦。 


我合埋本野比番花仔，跟住同佢講 


「呢一刻我真係無乜興趣，你自己揀啦！」 


花仔望住我，知我無性趣，都無再迫我，佢接過本相簿，就同 Ankit 交換心得，兩條狗公一時又話呢個樣好，一時又話嗰個大咪，胸多眼亂，一時三刻都仲未揀到。 






揀嚟揀去，最終都係揀番件印度西施，齋睇相就幾好樣，長頭髮，眼大大，輪廓分明，仲有啲波路咁添，不過你知㗎啦，相嘅嘢不能,盡信，貨不對版周時有，可能嚟件豬扒都未定，但係 Ankit 拍晒心口，話擔保滿意，一陣會帶過嚟，我呢啲旁觀者緊係等睇戲啦。 


話就話一陣，實則都要今晚八點先可以開餐，花仔就有印度餐食啫，我唔食呢啲都要食 "癲拿" 㗎，襯仲有時間，我就拉咗花仔落樓下醫肚。 


咁啱得咁橋，竟然坐番第一夜遇到 Priscilla 同 Heidi 嗰張枱，花仔話無乜胃口唔食，齋飲，我就隨便點咗啲野。 






瞓咗成日嘅花仔，叉足電，依家運身是勁，精神奕奕等飯食，相反我就有啲眼瞓，食完飯又有房歸不得，計劃定响池邊搵個位休息一下。 


食食下，忽然記番起，就同花仔講話已經搵到支神油，佢知道之後，笑咗一笑，就問 ……


「嗱，一世人兩兄弟，刀裡刀裡去，火裡火裡去，上刀山 …… 」 






「夠喇，咪講咁多，有乜就直接講！」古古怪怪咁，我一睇就知佢有野所求 


「既係咁，我地身為炎黃子孫，今晚我係以香港特別行政區嘅身份，代表出席一陣嘅港印交流團，雖然我對自己充滿信心，亦都無懷疑過自己實力，但係為 ……」花仔無理會我嘅說話，繼續耍太極 


「ENOUGH，重點啦！」我忍唔住咁話 


「借支神油比我！！！」花仔突然單刀直入咁問 


「吓，你講真㗎？」我完全估計唔到佢提出呢個請求 






「真！！借嚟用一次，我犧牲啲，做人肉實驗品，得嘅話，你就番去立大功，咁唔好彩無料到嘅，仲有聽日半日時間搵過支先上機，你話係咪一舉兩得呢？」花仔駛出一招一箭雙鵰，務求令到自己處於一個不敗之地 


花仔咁講又唔係無道理，開咗個包裝，用一次半次唔多覺嘅，唔多覺！ 


「嗱！攞去用喇！」既然佢講到咁，我無佢符啦 


就响花仔準備接住支神油一刻，條死仔唔知點解突然縮手，支神油直插地下 .....


「嘭」一聲，我再望一望花仔，佢企咗响身，成身震晒，跟住失晒控咁後退、後退，最後極速轉身離開餐廳。 






見到花仔強一連串不尋常嘅行為，令我搲晒頭，又話要，比你又唔接，仲神神化化咁閃咗去，都唔知佢攪乜。 


好彩支神油唔係用玻璃樽啫，我彎低身準備執番起支油，忽然有對腳出現响支油旁邊，同一時間，有人嗌我 


「Da Vinci」 


抬頭一睇，點 …… 點 …… 點解妳會喺呢度出現㗎，妳唔係已經 ………… 唔怪之得花仔好似見到鬼咁啦，神油都唔攞就走咗去。 


响我眼前出現嘅竟然係 Heidi！






未變身嘅Heidi，其實都幾靚， 斯斯文文咁坐咗响我前面，慢慢講番究竟發生咩事，事出突然，我都需要少少時間消化下，忽然 Heidi 好認真咁問咗句 


「你想不想再見 Priscilla？」 


「想，很想！！」我諗都唔諗就答